Read Lamnso 2 Afòn 15 Bible Online

2 Afòn 15 - Lamnso bible

2 Afòn 15

¹Vé‑eè kòʼór Ussiya[19] woo wan Amatsiya ji fon woó Juda, a Fòn Jeroboam woo baà sí sáʼ Isray ji kiyá nshòv saàmbà e mbaà.

²Ussiya‑aà kèʼ sáʼ, a wù dzə̀ kiyá nshòv ntuùfú e ghvə̀m, e wìy sàʼ vifon kiyá nshòv sibaà e mtàn, a wù dzə́ e Jerusalem. Yè wov‑iì dzə̀ wán woó Jerusalem, a yírí dzə̀ Jekolia.

³Fòn Ussiya‑aà yii vinyo ve ví wáa gheén NYÙY TÀR réŋréŋ mo tàr wov Amatsiya‑aà yii.

⁴Yii bèy, á yòʼ‑oò lo laàr virə́ʼ vé anyùy, a wíri kù‑uù dzəə́ cu anyùy, ton kiláy fó.

⁵Á bèy, NYÙY TÀR nèn màʼ shivnsay e Fòn Ussiya wùn, wù wáa jòy sho, e dù mèé e wun kishiíy ké kpu. Wù‑uù dzə́ lav rə jeéy, a wù sótí ne wó rə́ fó vinyò ve saʼ, wáa lìm wán və Jotam vinyo vìn vidzə̀m, a saʼ woŋ.

⁶Ké vinyò vímóʼ ví vee Fòn Ussiya mvə̀m saʼ, à kinyo kidzə̀m ke wù‑uù yiìn kí, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

⁷Fòn Ussiya‑aà lày, á lìtì wun aàtàr vəə́ ghaŋ e Ŋkàlaʼ Davir. Jotam woo wán və nèn yì vifon, a saʼ e wun ntaʼ.

⁸Vé‑eè kòʼór Sekariya woo wan Jeroboam e Samaria ji fon woó Isray, a Fòn Ussiya woó Juda sí sáʼ ji kiyá nshòv waamé é mtaár. Sekariya‑aà sàʼ ŋwee ntuùfú.

⁹Wù‑uù yii vinyo ve ví wáa bir NYÙY TÀR, kù réŋréŋ mo tàr wov‑iì yii. Wù yòʼ‑oò lo lèʼ vinyo ve bi ví ve Jeroboam woo wan Nebat‑iì yii, domsì wír veé Isray, aá yii sa.

¹⁰Shallum woo wan Jabesh nèn lò, e kàr menàŋ kùm Sekariya. Wù‑uù ghàr wun e wírí si[20], e yùyrí, e nèn yì vifon.

¹¹Ké vinyò vímóʼ ví vee Fòn Sekariya mvə̀m saʼ, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

¹²Mo á yuyrin Fòn Sekariya bèy, kinyo ke NYÙY TÀR‑iì suuyin e Jehu ki ku nèn ghèén. Wù‑uù sùúy shó jii, rám yée wíy saʼ kfəə́ yeé Isray, e dù, e meé ŋgwàʼ sikweè.

¹³Vé‑eè kòʼór Shallum woo wan Jabesh e Samaria ji fon woó Isray, a Fòn Ussiya woó Juda sí sáʼ ji kiyá nshòv bvə̀ʼə̀ e mtaár. Shallum‑eè sàʼ ŋwee e mòʼón.

¹⁴A kí‑iì dzə̀ jii, Menahem woo wan Gad‑iì kòʼ fó Tirsa, e wìy e Samaria, e ghàr Shallum woo wan Jabesh, e yùyrí, e nèn dzə̀ʼə̀m e kàvàʼ.

¹⁵Ké vinyò vímóʼ ví vee Fòn Shallum mvə̀m saʼ, à menàŋ me wù‑uù karin mè, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

¹⁶Yì‑iì dzə̀ é ghan see shooy, Menahem lò fo Tirsa, e laàr Tifsa[21] à wìr dzə̀m wo wù‑uù dzəə̀n fó, à virə́ʼ ve ví‑iì kaarin fó vi, bìʼ fo vé‑eè tenen fóo mvə̀ʼ shuu sév sé kày. Wù nèn laàr fó, e toʼtí bvəm se vikìy vee bvə́me adzə̀m.

¹⁷Vé‑eè kòʼór Menahem woo wan Gadi ji fon woó Isray, a Fòn Ussiya woó Juda sí sáʼ ji kiyá nshòv bvə̀ʼə̀ e mtaár. Menahem‑eè sàʼ kiyá e ghvə̀m e Samaria.

¹⁸Wù‑uù yii vinyo ve ví wáa bir NYÙY TÀR. Fo viya ve wù‑uù sáʼá, e dù meé mo wù‑uù làyìn, wù yòʼ‑oò lo màʼtì vinyo ve bi ve Jeroboam woo wan Nebat‑iì yii, domsì wír veé Isray, aá yii.

¹⁹Wáa dzə e ghan fóo fèy, Pul[22] woo fon woó Assiriya lò, e nə̀ə́ rə́r é Isray. Menahem nèn lò kfə́, e fò wun *kisha ke mbàm ke fəvír kí akilu nsə̀kì nshòv sikweè e mtaár (34,000) ji wun fiʼ koò wun e viŋkar, é wù sə́ wun, e tòm á vifon və́, é ví tuúy.

²⁰Menahem‑eè sə̀ mbàm sìn a dzə̀ fo wír veé Isray ve yì‑iì dzəə̀n vé mbàme, a wìr mòʼón mòʼón‑eè kér fóo fo mbàm *ashekel mtàn, a dzə̀ see kisha ke mbàm ke fəvír kí, aá fó e fòn woó Assiriya. Á bèy, fòn woó Assiriya nèn kfə̀n é bàm e wun wòŋ.

²¹Ké vinyò vímóʼ ví vee Fòn Menahem mvə̀m saʼ, à vinyo vidzə̀m ve wù‑uù yiìn ví, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

²²Fòn Menahem‑eè lày, wan və Pekahia nèn yì vifon, a saʼ e wun ntaʼ.

²³Vé‑eè kòʼór Pekahia woo wan Menahem ji fon woó Isray, a Fòn Ussiya woó Juda sí sáʼ ji kiyá mtàn. Pekahia‑aà sàʼ é Samaria viyá vibaà.

²⁴Wù‑uù yii vinyo ve ví wáa bir NYÙY TÀR. Wù yòʼ‑oò lo màʼtì vinyo ve bi ve Jeroboam woo wan Nebat‑iì yii, domsì wír veé Isray, aá yii.

²⁵Peka woo wan Remalia, wo yì‑iì dzəə̀n mfòómé və nèn kùr menàŋ wùn à wír veé Gileadi mtàn, e nèn yùyrí wun e faáy kishiíyí e Samaria. Peka yúyrí bey, e nèn yì vifon, a saʼ e wun ntaʼ.

²⁶Ké vinyò vímóʼ ví vee Fòn Pekahia mvə̀m saʼ, à kinyo kidzə̀m ke wù‑uù yiìn kí, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

²⁷Vé‑eè kòʼór Peka woo wan Remalia e Samaria ji fon woó Isray, a Fòn Ussiya woó Juda sí sáʼ ji kiyá nshòv sibaà e mtàn. Peka‑aà sàʼ kiyá mbaà.

²⁸Wù‑uù yii vinyo ve ví wáa bir NYÙY TÀR. Wù yòʼ‑oò lo màʼtì vinyo ve bi ve Jeroboam woo wan Nebat‑iì yii, domsì wír veé Isray, aá yii.

²⁹Yì‑iì dzə̀ é ghan sé Fòn Peka woó Isray sìn, Tiglat‑Pileser woo fon woó Assiriya wìy, e faàsì ntèʼ see Ijon, Abel‑Bet‑Maaka, Janoa, Kedesh, e lì Hasor, e kfə̀n faàsì ŋgvən seé Gilead, wùn à seé Galeli, à seé Navtali si sidzə̀m. Wù faàsì bèy, e koòrí wíri, e dù sho e Assiriya.

³⁰Hoshea woo wan Ela nèn lò, e kàr menàŋ e Peka woo wan Remalia bàm, e koò, e yùyrí, e nèn yì vifon. A kí‑iì kòóy a dzə̀ é ghan se Jotam woo wan Ussiya‑aà sí sáʼ Juda ji kiyá mbaà.

³¹Ké vinyò vímóʼ ví vee Fòn Peka mvə̀m saʼ, à kinyo kidzə̀m ke wù‑uù yiìn kí, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

³²Vé‑eè kòʼór Jotam woo wan Ussiya ji fon woó Juda, a Fòn Peka woo wan Remalia sí sáʼ Isray ji viyá vibaà.

³³Jotam‑eè kèʼ sáʼ, a wù dzə̀ kiyá nshòv sitàn e mbaà, e wìy sàʼ vifon kiyá nshòv ntuùfú e ghvə̀m, a wù dzə́ e Jerusalem. Yè wòv‑iì dzə̀ Jerusha woo wan Tsadok.

³⁴Wù‑uù yii vinyo ve ví wáa gheén NYÙY TÀR, kù réŋréŋ mo tàr wov Ussiya‑aà yii.

³⁵Yii bèy, wù yòʼ‑oò lo kètì virə́ʼ vé anyùy. Wíri nèn kù a yiì cu si fó, e kfə̀n a tòn kiláy. Wù‑uù bòm shúu kày woó dzəə ye yì nəə e NYÙY TǍR lav fo kùy.

³⁶Ké vinyò vímóʼ ví vee Fòn Jotam mvə̀m saʼ, à kinyo kidzə̀m ke wù‑uù yiìn kí, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

³⁷Yì‑iì dzə̀ é ghan see shooy, NYÙY TÀR nèn kèʼ, a tum Resin woo fon woó Siiria wùn Peka woo wan Remalia ji á wáa nəə́ a wír veé Juda e rə́r sí.

³⁸Fòn Jotam‑eè lày, á lìtì wun aàtàr vəə́ ghaŋ e Ŋkàlaʼ Davir. Ahas woo wán və nèn yì vifon, a saʼ e wun ntaʼ.