Read Lamnso 2 Afòn 17 Bible Online

2 Afòn 17 - Lamnso bible

2 Afòn 17

¹Vé‑eè kòʼór Hoshea woo wan Ela ji fon woó Isray, a dzə̀ é kiya ke Fòn Ahas woó Juda‑aà sí sáʼ ji kiyá nshòv sibaà e ghvə̀m. Wù‑uù sàʼ Isray e Samaria kiyá bvə̀ʼə̀.

²Wù‑uù yii vinyo ve ví wáa bir NYÙY TÀR, yii bèy, a bó ví yòʼ‑oò lo a dzə ŋgèrì vé afòn veé Isray vee wun mbìy.

³Fòn Shalmaneser woó Assiriya lò, e nə̀ə́ Fòn Hoshea e rə́r sí. Hoshea gbù wun, e nèn a fo nshwì e wun viyá vidzə̀m.

⁴Yii bèy, wáa dzə e kiya kímóʼ kí, Hoshea tsə́nsí vé ntume fo So woo fon woó Ejiv wùn, ji wù sə́ á wun. Wù tsə́nsí bey, e nèn yàr nshwì wo wù‑uù fó e fòn woó Assiriya. Fòn woó Assiriya nèn yèn ji Hoshea fèn fiìnè ne a wun, e nèn koò Hoshea, e wày é sháŋ, e fìn fo.

⁵Fòn woó Assiriya‑aà nə̀ə́ rə́r woŋ Isray e dzə̀m, e nèn sùm ŋkàlaʼ Samaria e bǎm viya vitaár.

⁶Wáa dzə, a Fòn Hoshea sí sáʼ ji kiyá bvə̀ʼə̀, wír veé Assiriyàa nèn tòn Samaria, e kùúy wír veé Isray, e dù sho e Assiriya, e lèm ámóʼó é Hala, e lèm ámóʼó é Gosan e ghaa ndzəv yee Habor, ámóʼó é ŋkà se laʼ seé Media.

⁷Vinyo vìn vi‑iì kooy bèn, bìʼ fo wír veé Israyi‑iì yii vinyo ve bi ví e NYÙY TÀR woo Nyùy wov, wo wù‑uù liìn áwune, e kòʼ shó fo Ejiv, e bòyìr fo Farao wo. Áwune‑eè cu anyùy kisaŋe,

⁸jumrì liì wo vitúm ve NYÙY TÀR‑iì jùmèn fo áwuné mbìy vi‑iì kérí. Áwune‑eè jumrì sa liì wo afon veé Israyi‑iì neèrìn.

⁹Wír veé Israyi‑iì yii vinyo e NYÙY TÀR woo Nyùy wov, a yòʼ dzə̀ vee tìítiy. Áwune‑eè lò kév, e bòm virə́ʼ vé cù vee vé anyùy aáwuné mvə̀m sé laʼ sidzə̀m, e kèʼ fo ntèʼ ŋkiy, e dù, e mèé e ŋkàlaʼ ye á bomen kay, e kaàrí sho.

¹⁰Vé‑eè tùúy sə́y se anyùy wùn à wúr sé nyùy woo *Ashera aàgwan adzə̀m, e kfə̀n yiì bèy e sar se vici ve rəŋsìn ví vidzə̀m.

¹¹Vé‑eè ton kiláy é virə̀ʼ vé anyùy réŋréŋ mo vitúm ve NYÙY TÀR‑iì jùmèn fo áwuné mbìy vi‑iì tonè. Vé‑eè yii vinyo ve kisaŋ vi é ŋàŋ, e nèn ŋàʼár dòʼshwiiy NYÙY TÀR.

¹²Áwune‑eè ghvə́m mebvə̀m, a NYÙY TÀR‑iì yòŋ ne aáwune jii, «Lá vèn yòʼ a ghvəm.»

¹³NYÙY TÀR‑iì ló a kàntì wír veé Isray wùn à veé Judàa, a shaà fo aŋgàa ntum vəə́, kfə̀n shaa fo ve á yén vinyóo. Wù‑uù kantì, suuy jii, «Vèn maʼti liì kisaŋ, a lèm nsər sém wùn à ntir sém sí, se sí dzəə̀n é Ŋwàʼ Nsər wo mò‑oò foon áàtàr véné. Mò‑oò fò ŋwàʼ və̀n, e shaà a dzə̀ fo aŋgàa lìm vémé, áwune vee aŋgàa ntum vém.»

¹⁴Yii bèy, wíri tén fó a yunín Nyùy, nèn kù a tav kitú moo atàr vév ve vé‑eè tenen fó way shilív e NYÙY TÀR woo Nyùy wóv wùn.

¹⁵Áwune‑eè tèn sáʼ rə́, e màʼày *mensaŋ me wù‑uù gwàrìn wùn aàtàr véví, e ŋwày kantì ye wù‑uù kantì áwune. Áwune nèn a jùmrì a dzə̀ anyùy kisaŋe, e nèn a dzə wír kisaŋe. Vé‑eè bìʼnìn vitúm ve ví kaarin áwune, a NYÙY TÀR‑iì lo yòŋ aáwune jii, «Lá vèn yòʼ a yiì moo áwune.» Áwune kú a yiì vinyo ve NYÙY TÀR‑iì shaʼnin.

¹⁶Áwune‑eè màʼày nsər se NYÙY TÀR woo Nyùy wov sidzə̀m, e nèn fèr wón nàʼ abaà e kisha ki, a ghvəm ji Nyùy. Á kfən fèr wúr nyùy woo wiíy woo Ashera, e kfə̀n a ghvəm mejiy meé yuv, a ghvəm sa nyùy woo *Baal.

¹⁷Á kfə̀n‑eè ton wón vév vee vilum wùn à vee vikìyí, cu anyùy sho, kfə̀n maʼ fú, wáy ŋgám. Vé‑eè fiìnè vitú vév, a yiì vinyo ve ví wáa bir NYÙY TÀR, a toònè shilív sə́.

¹⁸Á bèy, NYÙY TÀR wáa yu bír e ŋàŋén kùm wír veé Isray, e nèn jùm áwune fo wun si, la wìr yòʼ kfə̀n bèr, bánlà wír veé ram Juda cáʼ.

¹⁹A bó wír veé Judàa yòʼ fə̀m‑eè ló a yunín nsər se NYÙY TÀR woo Nyùy wov. Á kù‑uù jumrì a dzə̀ liì wo wír veé Israyi‑iì neèrìn.

²⁰NYÙY TÀR nèn tèn wír veé Isray adzə̀m, e màʼ ŋgeʼ aáwuné kitu, e wày áwune áàŋgàa vibàn véví wo, e dù, e meé mo vé‑eè màyìn fo wun si.

²¹A kí dzə̀ jii, mo NYÙY TÀR‑iì jàvsìn Isray fo Davir lav, áwune nèn dù, e kòʼór Jeroboam woo wan Nebat ji fon. Jeroboam nèn yiì, la Isray yòʼ dzə́ə a jùmrì NYÙY TÀR, e yiì, áwune búʼ kinyo ke bi ke tavín kí.

²²Wír veé Israyi kù‑uù buʼtì vinyo ve bi ví ve vé‑eè yén, a Jeroboam yii. Áwune yòʼ‑oò lo neèr vinyo vee shooy.

²³Kù bey, kù bey, e dù, e meé mo NYÙY TÀR‑iì jùmèn wír veé Isray fo wun si, kù mo wù‑uù yiìn, aŋgàa lìm ve yì‑iì dzəə̀n aŋgàa ntum vəə́ wáa fìʼtì fo ghan. Á bèy, NYÙY TÀR nèn fə̀ə́r wír veé Isray fo áwuné nsay, e dù sho e Assiriya, á wáa dzə fo e kwaʼ nsàm, e wìy shem lán.

²⁴Mo vé‑eè liìn wír vée Isray, e dù sho e kwaʼ nsàm bey, fòn woó Assiriya nèn wìy e wír ve səné, e dzə̀ʼə̀r e ntèʼ seé Samaria[25] ji á li á kirə́ʼ ké wìr veé Isray. Wù‑uù wìy e wíri fó Babilon, Kuta, Avva, Hamat wùn à fó Sefarvayim, áwune yòv vifá veé Samaria, e nèn a dzə e ntèʼ see fó.

²⁵Á kèʼ, e lòo dzə fo, e làa yòʼ a ghvəm NYÙY TÀR. Á bèy, wù nèn tsə̀nsí abvərə̀ʼ, á yúyrí wír vév ámóʼó.

²⁶Fòn woó Assiriya nèn lò, e yù ji wír ve wun‑eè kuuyin, e dù, e lèm e ntèʼ seé Samaria vìyi yòʼ kì á nsər nyùy woó nsay yee fó. A nyùy woó nsay foo fèy tsə̀nsí a ne abvərə̀ʼ aáwuné mvəm, á wáa yuyrí a áwune, bìʼ fo áwune yòʼ kiìn á nsər nyùy woo shooy.

²⁷Fòn woó Assiriya nèn yòŋ jii, «Vèn tsə́nsí taà cù wùmòʼ fo wír ve vèn‑eè kuuyin, e wìy sho fène, é wù du, a dzə fo, a yeʼéy áwune nsər se nyùy woó nsay foo fèy.»

²⁸Á bèy, taà cù wùmòʼ fo ve vé‑eè kuuyin fó Samariàa nèn dù, a dzə e Betel, a yeʼéy áwune mo dzə̀ á wàa ghvəm NYÙY TÀR.

²⁹Yii bèy, vitúm ve ví‑iì wìyìn, a dzə e nsay Samaria vi kú a dù fo mbìy, a fèr vév vee anyùy, a lèm e virə̀ʼ vé cù ve yì‑iì dzəə̀n vé wìr veé Samaria fo mbìy. Vitúm vidzə̀m vi kù‑uù fer shév shee shibvə̀m e ntèʼ yee fo áwune‑eè dzə́.

³⁰Wír veé Babilone fèr shibvə̀m she nyùy woo Sukkot‑Benot, veé Kutàa fér shibvə̀m she nyùy woo Nergal, wír veé Hamati fér shibvə̀m she nyùy woo Ashima.

³¹Wír veé Avvìi fér shibvə̀m she nyùy woo Nibhas wùn woo Tartak, wír veé Sefarvayime nén a lì wón vév, a tòn ji cu e nyùy woo Adrammelek, e kfə̀n a tòn e nyùy woo Anammelek.

³²Wír vìn adzə̀me‑eè cu sa NYÙY TÀR, yii bèy, á kù‑uù shóʼti kév wíri fo áwuné mvəm là nyaʼ ji atàá cù, aá lim aáwuné virə̀ʼ vé anyùy, yii cu sév fó.

³³Vé‑eè ghvə́m NYÙY TÀR, kfə̀n ghvə́m sa anyùy vév réŋréŋ mo liì wov vitum woo fo vé‑eè liìn áwune‑eè dzəə̀n.

³⁴E wìy shem lán, áwune kù dzəə́ tíy aáwuné liì wo mvə. Áwune yòʼ ghvə́m NYÙY TÀR yée a yu sáʼ rə́, a yunín vinyo ve wù‑uù tinen. Áwune yòʼ jumrì nsər se NYÙY TÀR wùn à ntir sə́ se wù‑uù foon e rám Jakovi, Jakov wo NYÙY TÀR‑iì shuùn yír rə́ yímóʼó ji Isray.

³⁵NYÙY TÀR‑iì lòo gwàr *mensaŋ wùn à wír veé Israyi, e yòŋ aáwune jii, «Lá vèn yòʼ a ghvəm anyùy. Lá vèn yòʼ a tsəm aáwuné si. Lá vèn yòʼ a lìm fo áwune. Lá vèn yòʼ a cù áwune.

³⁶Vèn kú a ghvəm a dzə̀ NYÙY TÀR wo wù‑uù fəərin ven fó Ejiv e vitaáví və́ ve ghaʼán ví, aá yén kóy və́ wo tavíné. Dzə̀ wun wo vèn yíi a tsəm e si wo, a kù dzə̀ wun wo vèn yíi a cù.

³⁷Vèn yén ji vèn lem á nsər wùn à ntir se m saŋen, e fò e vèn sin. Lá vèn yòʼ a ghvəm anyùy ámóʼó.

³⁸Lá vèn yòʼ làysìn mensaŋ me mò‑oò gwàrìn vèsən. Lá vèn yòʼ a ghvəm anyùy ámóʼó.

³⁹Vèn kù yíi a ghvəm a dzə̀ NYÙY TÀR woo Nyùy won, é wù yiì fə̀ə́r ven fo aŋgàa vibàn véné wo.»

⁴⁰Yii bèy, la wír vìyi yòʼ yuùrí feyì. Á kú a tiy a dzə̀ é kinyò ke vé‑eè sí yii.

⁴¹Vitúm vìn vi kù‑uù ghvə́m NYÙY TÀR, kfə̀n ghvə́m mebvə̀m mev. E wìy shem lán, wón vév wùn à wón won véví kù dzəə́ jumrì kinyo ke atàr véví‑iì yii.