Read Lamnso 2 Afòn 20 Bible Online

2 Afòn 20 - Lamnso bible

2 Afòn 20

¹Wáa dzə e ghan see shooy, Fòn Hesekiya gbù yàsí, e bèr gheéy fó kpu. *Ŋgaà ntum Nyùy woo Aysaya wo dzəə̀n wan Amot nèn dù, e yèn wun, e sùúy sho jii, «NYÙY TÀR suuy a ji wù náŋsín vinyo vee wun lav, e sìysì, bìʼ á fo bó yòʼ dzə̀ á wù lùŋ. Wù waà lo, e kpu.»

²Hesekiya yú bey, e nèn bìnkìr, a leéy wún lav, a bùnrì NYÙY TÀR jii,

³«Éè NYÙY TÀR, m lón wò lónén. Kuúmé mo mò‑oò ghán e wò mbòv tìítiy, e shilív shém shí shidzə̀m.»

⁴Aysaya lò ji wun tósín á maàndzə ŋgày, NYÙY TÀR yòŋ wun, e sùúy jii,

⁵«Kfə́n é bàm, e yòŋ e Fòn Hesekiya wo wù sáʼ wír vém jii, mo woo NYÙY TÀR, mo woo Nyùy Davir woo tàr à atàr vén, m yù ne bunrì yé, a m lo, e fèr wò.

⁶M yíi dzə̀sì dzəʼə̀m yé viyá nshòv sitàn e ghvə̀m. M yíi fəə́r vèn à ŋkàlaʼ rə̀n fo fòn woó Assiriya kiwo, e kìŋsìn ŋkàlaʼ yee shoon e shií wo m kér bìʼ yír yém, à shií wo m kér bìʼ Davir woo ŋgaà lìm wom.»

⁷Aysaya nèn sùúy e wír ve vé‑eè kér fone ji á taʼ á nyaàŋgùv woo fèr e mentuʼ me *fig mè, e wìy sho, e wày e fòn kivav, é wù fiʼ bònén.

⁸Fòn Hesekiya dzə́r e Aysaya jii, «Kisəəm ke kí din ji NYÙY TÀR yíi fèr mo ki dzə̀ ka? A dzə̀ m kìíy fó feé ji m yíi dù e lav cù e bǎm vishiíy vitaár?»

⁹Aysaya bìnèr jii, «NYÙY TÀR yíi fo wò kisəəm, áà kiíy ji wù yíi yiì a kinyo ke wù kàʼàn kin. À koŋ ji kindzə̀ə́ndzəm ki gbu é dzəə ye seʼtìn yeé ntoʼ, e dù fo mbìy ŋkèʼ e ghvə̀m, mo à koŋ ji kí gbu, e kfə̀n é bàm ŋkèʼ e ghvə̀m a?»

¹⁰Fòn Hesekiya bìnèr jii, «Kí dzə̀ fó tèr fo kindzə̀ə́ndzəm ki du fó mbìy ŋkèʼ e ghvə̀m. M koŋ ji kí kfə́n á kfənén é bàm ŋkèʼ e ghvə̀m.»

¹¹Aysaya woo ŋgaà ntum Nyùy nèn bùnrì NYÙY TÀR, wù yiì kindzə̀ə́ndzəm ki kfə́n é bàm ŋkèʼ e ghvə̀m e dzəə ye seʼtìn ye Fòn Ahas‑iì bomen.

¹²Wáa dzə e ghan fóo fèy, Merodak‑Baladan woo fon woó Babilon, a dzə̀ wan Baladan yú ji Fòn Hesekiya waà joyì, e sàŋ ŋwàʼ, e tsə̀nsí e wun, wùn à fómo.

¹³Vé ntume dù, Fòn Hesekiya səə́sí áwune, e dìn vifá vidzə̀m ve ví‑iì dzəə̀n e wun vitàv, a ví dzə̀ jii, *kisha ke mbàm ke fəvír kí wùn à ke baar kí, à virə̀ʼtìn ve vifa vi, à meŋgvə́r mee rèéŋ mè, e bóo lì vifá və́ vé rər. Kifá ki yòʼ‑oò lo bèr e wun kitàv, kìn e wun ntoʼ ke bó wù yòʼ‑oò lo dìn aáwune.

¹⁴Aysaya woo *ŋgaà ntum Nyùy nèn dù, e yèn Fòn Hesekiya, e dzə̀r shó jii, «Wír vìne wìy a dzə̀ fó feé, aá wìy bèy, e sùúy e wò ji ka?» Hesekiya bìnèr jii, «Á wìy fo wòŋ wúmóʼó kwaʼda feyì. Á wìy fo Babilon.»

¹⁵Ŋgaà ntum Nyùy kfən dzə̀r jii, «Áwune kì yèn a dzə̀ ka e wò ntoʼ?» Fòn Hesekiya bìnèr jii, «Á kì yèn kifá kidzə̀m kee mǒ ntoʼ. Kifá ki yòʼ dzə̀ shó e mǒ kitàv ke m yoʼ lò dìn aáwune.»

¹⁶Aysaya nèn sùúy e Fòn Hesekiya jii, «Yú kinyo ke NYÙY TÀR suuy ki.

¹⁷Á kiíy ji ghán sí wíy wìy se á wíy kuúy kifá kidzə̀m kee wò ntoʼ, kifá kidzə̀m ke atàr vée‑eè kéŋ, lemè, e wìy shem lán. Aá kuúy bey, e dù sho e Babilon, é la kifá ki yòʼ bèr. Á mo NYÙY TÀR suuyì.

¹⁸Á wíy lì sa wón ve dzəə̀n vitó vé ámóʼó, e dù sho, e sòŋ, aá wáa lìm e fòn woó Babilon ntoʼ.»

¹⁹Fòn Hesekiya suúy e Aysaya jii, «Kinyo ke NYÙY TÀR yòŋèn, à suúy e mò kin ki dzə̀ kijuŋ.» Fòn‑eè suuy bèy, kwaʼtì ji mo nyaáŋ yíi a dzə e wun ghan, bo wun yòʼ kér a kinyo ké a fàn.

²⁰Ké vinyò vímóʼ ví vee Fòn Hesekiya mvə̀m saʼ, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda. Á sàŋ mo vitaáví və́ ví‑iì dzəə̀n, e kfə̀n sàŋ mo wù‑uù sərin ndzə́v, e fèr nshwàn wo mendzə́v mè wáa leŋ sho, a dù e mvə̀mlaʼ.

²¹Fòn Hesekiya wìy lày, Manasse woo wán və nèn yì vifon, a saʼ e wun ntaʼ.