Read Lamnso 2 Afòn 21 Bible Online

2 Afòn 21 - Lamnso bible

2 Afòn 21

¹Manasse‑eè dzə̀ kiyá nshòv sibaà e ghvə̀m e ghan se vé‑eè koʼorin wun ji fon woó Juda. Wù sáʼ vifon kiyá nshòv sitàn e mtàn, a wù dzə́ e Jerusalem. Yè wov‑iì dzə̀ Hefsiba.

²Manasse‑eè yii vinyo ve ví wáa bir NYÙY TÀR, jumrì vinyo ve koʼoyín ví ve vitúm ve NYÙY TÀR‑iì jùmèn fo wír veé Israyí mbìy vi‑iì yii.

³Wù kfə̀n‑eè bòm virə́ʼ vé anyùy ve tàr wov Hesekiya‑aà kètìn ne. Wù sii bòm kíy se cù, á wáa cù nyùy woo *Baal fo, e kfə̀n fèr wúr nyùy woo wiíy woo *Ashera, kù mo Ahav woo fon woó Isray‑iì fèrìn. Wù‑uù cu vifá vidzə̀m ve ví bán e yuv, kfə̀n lim fo vifá vee shooy vi.

⁴Wù kfə̀n‑eè bòm kíy se cù see sé anyùy e NYÙY TǍR lav e Jerusalem, a NYÙY TÀR‑iì sùúy ne ji á kù wíy a cù a dzə̀ á wun fo.

⁵Wù bóm símóʼ sí é maàndzə see sibaà seé lav cù, a dzə̀ kíy se cù se vifa ve ví bán e yuv vidzə̀m.

⁶Wù‑uù lì wán və, e tòn ji cu. Wù‑uù du, shwéŋ fú, du ŋgám, kfə̀n bee vé ŋgàŋe, bee wír ve á mbaa aŋkfə. Wù‑uù yii vinyo ve bi ví é ŋàŋ, a NYÙY TÀR yú bír.

⁷Wù‑uù lì wúr nyùy woo Ashera ye wù‑uù fèrìn, e tìír e lav cù, a dzə̀ kirə́ʼ ke NYÙY TÀR‑iì yòŋèn ne e Davir wùn wan və Solomon jii, «M shòʼ ne Jerusalem fo mvə̀m ràm seé Isray sidzə̀m ji kirə́ʼ kém, aá kù wíy a cù mo a dzə̀ é lav fèn, e wìy dù, e mày.

⁸A wír veé Israyi gòʼ, a yiì vinyo vidzə̀m ve m yòŋèn aáwune, e kfə̀n a yunín nsər sidzə̀m se ŋgaà lìm wom woo Mooser‑iì foon aáwune, bo áwune yòʼ dzəə́ wìy lò fo nsay ye mò‑oò foon áàtǎr atàr véví.

⁹Yii bèy, wír veé Israyi tén fó a yunín NYÙY TÀR, bo taaka Manasse wo wù‑uù səŋrì wíri, aá yii vinyo ve bi ví é ŋàŋ, shaa vitúm ve NYÙY TÀR‑iì laàrìn fo áwuné mbìy.»

¹⁰NYÙY TÀR nèn lò sùŋnín, e shaà fo aŋgàa lìm və́ ve yì‑iì dzəə̀n aŋgàa ntum vəə́ jii,

¹¹«Vinyo ve joònè ve Manasse woo fon woó Juda yiìn ví kùʼ ne e ŋàŋ. Wù bùʼtì ne vinyo ve bi ví, ví shaá vé wìr veé Amor ve vé‑eè dzəə̀n fó fo mbìy, a wù domsì wír veé Isray e mebvə̀m mvə mè, aá yii vinyo ve bi ví.

¹²Á bèy, mo woo NYÙY TÀR, Nyùy wìr veé Isray nén a suúy jii, m lo, e màʼ ŋgeʼ ye tavín e Jerusalem wùn Juda kitu, e màʼ e dzəə ye shúu má wir dzə̀m wo wù yíi yu.

¹³M yíi màʼ kiwó, e ghar Jerusalem sho réŋréŋ mo mò‑oò màʼàn e Samaria, e màʼ e kfə́ə Ahavi. M yíi səʼsí wíri fó Jerusalem mo wìr sə̀ʼsí meŋkfəŋ fo kighin bey, e bìnèr, e kfə̀tì.

¹⁴M yíi màʼày áwune vee kibér ke wìr vém, e way aàŋgàa vibàn véví wo, aá ton áwune, e kùúy vifá vév.

¹⁵M wíy yiì bèy, bìʼ fo áwune kù‑uù yii vinyo ve bi ví e mǒ si, ŋáʼar dòʼshwíiy wom shó, e kèʼ fo kishiíy ke atǎr atàr véví‑iì fəən fó wòŋ Ejiv, e wìy shem lán.»

¹⁶Nyùy‑iì yoŋ bèy, a Manasse‑eè yùyrí ne wír vee alàjay anín, Jerusalem wáa dzə mensə́ mensə́. Wù‑uù yiì kin, kí kfən tàtí ke wù‑uù dan wír veé Juda, aá ghvə́m anyùy kisaŋe, nèn yii vinyo ve ví wáa bir NYÙY TÀR.

¹⁷Ké vinyò vímóʼ ví vee Fòn Manasse mvə̀m saʼ, à vinyo vidzə̀m ve wù‑uù yiìn ví, à ké vinyò ve bi ve wù‑uù buʼtì vi, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

¹⁸Fòn Manasse‑eè lày, á lìtì wun e kiboo ke kí kù‑uù dzəə̀n é shweesí woó ntoʼ, aá yoŋ ji ké Ussa. Amon woo wán və nèn yì vifon, a saʼ e wun ntaʼ.

¹⁹Vé‑eè kòʼór Amon ji fon woó Juda, a wù dzə̀ kiyá nshòv sibaà e mbaà. Wù sáʼ vifon viyá vibaà, a wù dzə́ e Jerusalem. Yír yè woví‑iì dzə̀ Meshullemet, a dzə̀ wan Harus woó Jotba.

²⁰Wù‑uù yii vinyo ve ví wáa bir NYÙY TÀR, kù réŋréŋ mo tàr wov Manasse‑eè yii.

²¹Wù‑uù jumrì kinyo kidzə̀m a dzə̀ ké tàr wov, cu mebvə̀m me tàr wov‑iì cu, kfə̀n fó ghvə́m e mebvə̀m mee shooy mè.

²²Wù‑uù màʼày NYÙY TÀR woo Nyùy atàr və́, e nèn tèn fó a ghan e wun mbòv.

²³Atǎr ntoʼ Fòn Amone wìy lò, e kàr menàŋ e fòn bàm, e laàr wun e wun ntoʼ.

²⁴Wír veé Judàa nèn lò kév, e yùyrí wir dzə̀m wo wù‑uù kér kiwó e fòn kpu, e nèn kòʼór Josia woo wán və ji fon, wù lì kilíŋ ke tàr wov.

²⁵Ké vinyo vímóʼ ví vee Fòn Amon mvə̀m saʼ, à vinyo ve wù‑uù yiìn ví, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

²⁶Vé‑eè lìtì Fòn Amon e wun fəm wo wú‑uù dzəə̀n e Ussa kiboo. Wàn Amon woo Josia nèn kù a saʼ e wun ntaʼ.