Read Lamnso 2 Afòn 22 Bible Online

2 Afòn 22 - Lamnso bible

2 Afòn 22

¹Vé‑eè kòʼór Josia ji fon, a wù dzə̀ kiyá waamé. Wù sáʼ vifon kiyá nshòv mòʼón e mtaár, a wù dzə́ e Jerusalem. Yír yè woví‑iì dzə̀ Jedida, a dzə̀ wan Adaya woó Boskat.

²Josia‑aà yii vinyo ve ví wáa gheén NYÙY TÀR. Wù‑uù jumrì kinyo kidzə̀m a dzə̀ ké tàr wov Davir, ghán e wun mbòv, a wù yòʼ‑oò fəə́ fo ŋwàn.

³Wáa dzə, a Fòn Josia sí sáʼ ji kiyá nshòv waamé e ghvə̀m, wù túm Shafan woo ŋgaà saŋ woó ntoʼ e NYÙY TǍR lav. Shafan‑eè dzə̀ wan Asalia, Asalia woo wan Meshullam. Josia‑aà túm Shafan bèy, suuy jii,

⁴«Dùu, e yèn Hilkia woo taà cù wo kuʼùn, é wù leéy mo mbàm se á wìyìn ne sho e lav cù si dzəə̀n. Dzə̀ mbàm se atàá cù ve á lim e shùu lav cùu sə́ fo wíri.

⁵Suúy, é wù fó e wír ve á leey fo NYÙY TǍR lavi, aáwune wáa làʼtì vé lìme shó, ve á tsə́mri lav cù,

⁶aá dzə̀ jii, vé kintaa, vé kimbome, à vé tiy ye buʼúné. Á lóo làʼ wíri, á yùn vicí ve toʼón ví wùn à tíy ye sanéné, aá wáa yiì lim sho.

⁷Wír ve á leey lime dzə̀ vé suuyruú, a bó shií yòʼ dzə̀ wó a sòv ji áwune naari é naáy naáy mo áwune lìmèn e mbàm se á wayin aáwuné kiwo si.»

⁸Shafan nèn dù, e fìʼtì ntum fòn e Hilkia woo taà cù wo kuʼùn. Wù suúy e wun ji wun sìíy ne, e bòŋ á Ŋwàʼ Nsər Nyùy fo lav cù. Wù suúy bey, e nèn fò, Shafan yòŋ.

⁹Wù yòŋ bèy, e nèn kfə̀n é bàm, e fìʼtì e fòn jii, «Aŋgàa lìm fòne sìyrí ne a mbàm se sí‑ii dzəə̀n e NYÙY TǍR lav, e fò á e wír ve á leey lim yee fóo.»

¹⁰Wù kfən sùúy ji Hilkia woo taà cù kì fò á ŋwàʼ e wun. Wù nèn yòŋ ŋwàʼ və̀y e fòn si.

¹¹Fòn yú jí se sí‑iì dzəə̀n é Ŋwàʼ Nsər Nyùy, kindzə́m kí gwàr wun, wù saàsì ndzə̀y sə́,

¹²e yòŋ Hilkia woo taà cù wùn à Ahikam woo wan Shafan, à Akbor woo wan Mikayia, à Shafan woo ŋgaà saŋ, à Asaya woo nshìylav fòn, e sùúy aáwune jii,

¹³«Vèn du, e tàr fo NYÙY TÀR kùm kinyo ke á saŋen é ŋwàʼ fèn. Vèn tar, e fò e vèr à wíri, à woŋ Judàa e dzə̀m. NYÙY TÀR shwiiy kilòŋ vèsən áwune é dzəə ye bi, bìʼ fo atàr vesəné yòʼ‑oò lo yùnín jí seé ŋwàʼ fèn. Áwune yòʼ‑oò lo yiì vinyo ve á saŋen shó kùm vèsən.»

¹⁴Á bèy, Hilkia woo taà cù wùn à Ahikam, à Akbor, à Shafan, à Asaya nèn dù, e yèn Hulda woo *ŋgaà ntum Nyùy, a wù dzə́ e mbìv Jerusalem ye vé‑eè bàʼrìn e fíy. Lum və‑əə̀ dzə̀ Shallum wo wù‑uù leey fo ndzə̀y sé atàá cù si. Shallum və̀n‑eè dzə̀ wan Tikva, Tikva woo wan Harhas.

¹⁵Hulda dù, e sùúy aáwune ji á du, e sùúy a e wìr wo wù tumen áwune fo wun wùn ji NYÙY TÀR woo Nyùy wìr veé Isray yoŋ a jii,

¹⁶«Wun yíi màʼ ŋgeʼ e Jerusalem, e màʼ e wír ve á dzəə̀n fó adzə̀mé kitu réŋréŋ mo á saŋen é mvə̀m ŋwàʼ wo fòn woó Juda kì taŋen.

¹⁷Áwune màʼày a ne wun, a tòn kiláy, a cù anyùy ámóʼó shó, e kfə̀n a ŋaʼár a dòʼshwíiy və e mebvə̀m me áwune fèrìn e wó yéví mè, a wù baári bìʼ Jerusalem, a wìr wóo ndzəmér yòʼ waà dzə̀.»

¹⁸Hulda tiísí bey, e sùúy jii, «Ké fòn woó Juda wo wù tumen ven ji á wiy, e tàr fo NYÙY TÀR kí wáa dzə jii, wun woo NYÙY TÀR woo Nyùy wìr veé Isray suuy e wun a jii, wun yù á ne jí sə́,

¹⁹e yù á kinyo ke wun suŋnin kibiíbí kùm Jerusalem wùn à wír vee fóo, ji dzə̀ kirə́ʼ, a kí wíy lày a làyìn kisáŋ, aá wáa kuù kuùn. Mo wù səəsin jí sìn e shilív she juŋ shi, e lì kitú kfə́ kitérí, a neŋ e wun sar, e kfə̀n saàsì ndzə̀y sə́, a toŋ e wun si, wun woo NYÙY TÀR nén a suúy e wun a jii, wun yù á ne tóŋ rə́.

²⁰A wun wíy yiì, wù jumrì atàr və́, aá liti á wun kijuŋ, é la sí rəə́ yòʼ shòv á ŋgeʼ se wun wíy màʼ e wòŋ fèn.» Vé ntume nèn lì kinyo ke wiíy və̀y suuyin, a kfən, e dù, e yèn fon sho.