Read Lamnso 2 Afòn 24 Bible Online

2 Afòn 24 - Lamnso bible

2 Afòn 24

¹Fòn Jehoyiakim kú a saʼ bèy, Nebukadnessar woo fon woó Babilon nèn lò, e nə̀ə́ rə́r é Juda, Fòn Jehoyiakim fó shiŋkfəŋ, e nèn a yu sáʼ a dzə̀ fo wun. Wù kú a yu sáʼ bèy, wáa meé e bǎm viya vitaár, wù bvə̀rkìr, e tàv kitú.

²NYÙY TÀR nèn tsə̀nsí ŋgoo vé rərí fó Babilon wùn à fó Siiria, à fó Moav, à fó Ammon ji á wiy, e nə̀ə́ a Jehoyiakim e rə́r sí, e laàr a Juda mo NYÙY TÀR‑iì yòŋèn, e shaà fo aŋgàa lìm və́ ve dzəə̀n aŋgàa ntum vəə́.

³Rúrú, kin ki‑iì kòóy wír veé Juda, a dzə̀ mo NYÙY TÀR‑iì yòŋèn ne ji wun kù laar a áwune fo wun si, bìʼ vinyo ve bi ví ve Fòn Manasse‑eè bùʼtìn,

⁴jòkìnyàʼ wír vee alànjò ve wù‑uù yuyrin. Wù‑uù yiì, mensə́ me wìr vee alànjò mè wáa leŋ Jerusalem e dzə̀m, a bó yòʼ dzə̀ NYÙY TÀR làysìn jay və.

⁵Ké vinyò vímóʼ ví vee Fòn Jehoyiakim mvə̀m saʼ, à vinyo vidzə̀m ve wù‑uù yiìn ví, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

⁶Fòn Jehoyiakim wìy lày, wan və Jehoyiacin nèn yì vifon, a saʼ e wun ntaʼ.

⁷Bó fòn woó Ejiv yòʼ kfə̀n‑eè fəə́ woŋ və́ ji wun du a rə́r, bìʼ fo fòn woó Babilon‑eè yòvìn ne virə́ʼ ve wù‑uù tònèn, a saʼ vidzə̀m, e kèʼ fo kiwoóy keé Ejiv, e dù, e meé e ndzəv yee Yufret.

⁸Vé‑eè kòʼór Jehoyiacin ji fon, a wù dzə̀ kiyá nshòv waamé e ghvə̀m, wù sáʼ vifon ŋwee e taár, a wù dzə́ e Jerusalem. Yè wov‑iì dzə̀ Nehushta, a dzə̀ wan Elnatan woó Jerusalem.

⁹Wù‑uù yii vinyo ve ví wáa bir NYÙY TÀR, kù mo tàr wov‑iì yii.

¹⁰Yì‑iì dzə̀ é ghan se Jehoyiacin‑eè sáʼ sìn, vé rə́r Fòn Nebukadnessar woó Babilone nəə́ é Jerusalem, e gìm fó e rə́r sí.

¹¹Fòn Nebukadnessar wìy lò, e kòʼ, a meé fo, aá kù dzəə́ gim fó gímen,

¹²Fòn Jehoyiacin woó Juda, wùn à yè wov, à wón vəə́, à vé lìm vəə́, aàtǎr ntoʼ vəə́ nèn fəə̀, e fò vitú vév e Nebukadnessar woo fon woó Babilon. Wù nèn lì Jehoyiacin ji wir sháŋ, a ghán sin si dzə̀, a wun woo Nebukadnessar sí sáʼ Babilon ji kiyá waamé.

¹³Wù‑uù kùúy vifá veé kitàv keé lav cù wùn à veé kitàv keé ntoʼ vi, e dù sho. Wù‑uù lì vifá vee *kisha ke mbàm ke baar kí ve Fòn Solomon‑eè fèrìn ji á wáa ker a e lav cù, e tìnrí e vintsə̌m vintsə̀m réŋréŋ mo NYÙY TÀR‑iì suuyin fó ghan ji kí wíy koóy a bèy.

¹⁴Wù kfən kùúy wír veé Jerusalem ji vé sháŋé, e dù sho e wun wòŋ. Wù‑uù kùúy atǎr ntoʼ adzə̀m, e kùúy wír ve yì‑iì dzə̀ á màʼ rə́r adzə̀m, à wír ve vé‑eè kiìn lím kiwoo adzə̀m, e bóo lì vé kilàme adzə̀m. Wìr dzə̀m‑eè dzə̀ nsə̀kì e ghvə̀m. Kù‑uù gòʼ aghéʼncey é wòŋ.

¹⁵Nebukadnessar‑iì lì Fòn Jehoyiacin ji kù sì á wir sháŋ, e dù sho e Babilon. Wù‑uù lì yìy à Fòn Jehoyiacin wùn à vikǐy ntoʼo, aàtǎr ntoʼo, e kfə̀n lì wír ve tavkíné vee Jehoyiacin wòŋ, e dù sho e Babilon.

¹⁶Wù kfə̀n‑eè kùúy vé rər ve tavkíné adzə̀m, aá dzə̀ nsə̀kì saàmbà, e lì wír ve á kiìn lím kiwoo wùn à vé kilàme nsə̀kì, aá dzə̀ sá atávkín ve dzə̀ á màʼ rə́r, e bàʼtí adzə̀m, e dù sho ji sì á vé sháŋé.

¹⁷Nebukadnessar woo fon woó Babilon‑eè sù Jehoyiacin, e nèn kòʼór Mattania woo fər tàr à Jehoyiacin ji fon. Wù kóʼór bey, e nèn kùvsín yír Mattania, yí wáa dzə ji Tsədekiya.

¹⁸Vé‑eè kòʼór Tsədekiya ji fon woó Juda, a wù dzə̀ kiyá nshòv mòʼón e mbaà, wù sáʼ vifon kiyá nshòv mòʼón e ghvə̀m, a wù dzə́ e Jerusalem. Yè wov‑iì dzə̀ Hamutal woo wan Jeremia woó Libna.

¹⁹Wù‑uù yii vinyo ve ví wáa bir NYÙY TÀR, kù réŋréŋ mo Jehoyiakim‑eè yii.

²⁰Ví màysì, e ŋàʼár dòʼshwiiy NYÙY TÀR, wù nèn lò, e jùm wír veé Jerusalem wùn à veé Judàa adzə̀m fo wun si, e màʼày e kwaʼ nsàm.