Read Lamnso 2 Afòn 25 Bible Online

2 Afòn 25 - Lamnso bible

2 Afòn 25

¹Tsədekiya nèn wìy lò, a tav kitú fo Fòn Nebukadnessar woó Babilon. Á bèy, wáa dzə, a wù sí sáʼ ji kiyá bvə̀ʼə̀, Nebukadnessar wùn à vé rər və́ adzə̀me nèn wìy e kishiíy kee ghvə̀m fo ŋwee woo ghvə̀m, a nəə́ Jerusalem e rə́r sí. Á tám kiláʼáy kév é ghaa ŋkàlaʼ, e nèn ràŋ kay, e kaàrí ŋkàlaʼ sho ye yòʼ dzə̀ wìr fəə̀.

²Ŋkàlaʼ nèn kù gòʼ e raŋèn bey, e dù, e meé e kiya kee nshòv mòʼón e ghvə̀m mo Tsədekiya‑aà sí sáʼ vifon.

³Wáa dzə e kishiíy kee bvə̀ʼə̀ fo ŋwee woo kweè[30], e kiya foo fèy, a jìŋ sì é ŋkàlaʼ e távín, a wír vee fóo yòʼ dzəə́ kér kifá kée luʼ e shuù,

⁴wír vée Babilone tóʼ kay yeé ŋkàlaʼ. Fòn wùn à və́ vé rərí nèn woòné vitsə́ʼə́, e meè fó mvə̀m ŋkàlaʼ, e fəə̀ fó shùu kày e nsàn virə̀v vé kày see sibaà, e ghaa kiboo keé ntoʼ, a wír veé Babilone kaárí ne ŋkàlaʼ, e tàr. Áwune tósín, e lèʼ, e nèn a dù e dzəə̀ kiwòóy kee Jordan.

⁵Vé rər veé Babilone jùm Fòn Tsədekiya, e koò é mboʼ yeé Jeriko. Vé rər və́ adzə̀me léʼ, e màʼày wun fo.

⁶Vé‑eè koò wun bèy, e lì, e wìy, e yèn fon woó Babilon sho e Ribla, wù sáʼ wun, e wày é sháŋ.

⁷Á kfə̀n‑eè yùyrí wón Tsədekiya, a wù yéné, e nèn fə̀tí sí sə́, e kùr wun aàsháŋé, e lì, e dù sho e Babilon.

⁸Wáa dzə e kishiíy kee saàmbà fo ŋwee woo tàn, e kiya ke Nebukadnessar woo fon woó Babilon‑eè sí sáʼ ji kiyá nshòv bvə̀ʼə̀ e ghvə̀m, Nebusaradan, wo dzəə̀n mfòóme ŋgoo rə̀r ye yì shiy fon woó Babilon, a kfə̀n dzə̀ ŋgaà ntir fòn, wìy e Jerusalem,

⁹e tòn lav cù NYÙY TÀR, e tòn ntoʼ, e tòn lav se wìr ve kuʼkìné sidzə̀m.

¹⁰Vé rər adzə̀m ve vé‑eè dzəə̀n e wun sari nèn kèr kay ye vé‑eè bomen, yí kaárí Jerusalem.

¹¹Nebusaradan nèn kùúy wír ve vé‑eè berin é ŋkàlaʼ, e tàtí wùn à wír veé Isray ve vé‑eè leʼen rə́r, e wìy nə̀ə́ e fòn woó Babilon sar shwiné, e kfə̀n lì kibér ke wìr ve vé‑eè kiìn lím kiwoo[31], e dù sho e Babilon ji akookòŋé.

¹²Yii bèy, wù‑uù lèm wír ámóʼó é bàm ve yì‑iì dzəə̀n aghéʼncey, e tsə̀ə́r ji á wáa lìm a súm sé vitiír vé *vayin, e kfə̀n a lìm sé vifa ve yi.

¹³Wír veé Babilone‑eè kètì vitóm vee NYÙY TǍR lav ve vé‑eè fèrìn e kisha kee *brons ki, e bvə̀ʼtí, e bvə̀ʼtí sa vitiir ve mbìʼ sí, e kfə̀n bvə̀ʼtí màkìghìn wo vé‑eè fèrìn e kisha kee brons ki, e nèn bèʼèy kisha kee brons kìy, e dù sho e Babilon.

¹⁴Vé‑eè lì sá kíŋ sí wùn à visoó vi, à kfə́ə vimfar vímóʼ ví ve vé‑eè náŋsin akfə̀ə́ làm sho vi, à vighín ví, à kifá kidzə̀m kee kisha kee brons ki, ke vé‑eè yii lim sho e lav cù.

¹⁵Vé‑eè lì kifá kidzə̀m ke vé‑eè fèrìn e *kisha ke mbàm ke baar kí, à vee fèr e kisha ke mbàm ke fəvír kí, e lì sa vighín ve terí ví wùn à vikáŋ ve vé‑eè li və́y shó vi.

¹⁶Kisha kee brons keé vitom vee vibaà, à keé màkìghìn kí, à keé vitiir ve mbìʼ ve Fòn Solomon‑eè fèrìn ji vee NYÙY TǍR lav vi, kí‑iì kùʼ é ŋàŋ ye bó yòʼ‑oò dzə̀ á fìʼ.

¹⁷Vida ve vitom vi‑iì dzə̀ kóy e kweè kweè e kimbéʼ ki, aá fér tán sí é vitu wo, a kù dzə̀ e kisha kee brons ki, a vida vi dzə̀ é mbuù ntàm se kiwo sibaà fó koy. Vé‑eè nàŋsín vitú e nsáŋtí woo wo ashàŋ, aá tátí wùn à wo vitùʼtúʼ, e kaàrí sho, e tàr, a kù dzə̀ sá e kisha kee brons ki.

¹⁸Nebusaradan woo mfòómé‑eè koò sá Serayia woo kitú ke atàá cù, e koò Tsəfaniya woo taà cù wo wù tóm wun, à wír vee ataár ve á yii tíy e shùu lav cùu.

¹⁹Fo wír ve vé‑eè dzə̀ə́ e ŋkàlaʼa, wù lì kitú ke vé rər ke kí‑iì wám rə́r, e kfə̀n lì sa atǎr ntoʼ atàn ve yì‑iì dzəə̀n aŋgàa ntir fòn. Wù kfə̀n‑eè lì ŋgaà saŋ mfòómé wo wù‑uù fəər sáʼ mfòómé, e kfə̀n lì vé wòŋ ámóʼó sá wír mntuùfú ve vé‑eè dzə̀ə́ e ŋkàlaʼ.

²⁰Nebusaradan woo mfòómé‑eè lì áwune adzə̀m bèy, e wìy, e fò e fòn woó Babilon e Ribla.

²¹Wù nèn yòŋ, á ndzə́n áwune, e yùyrí e Ribla foo fèy e nsay Hamat. Á mo vé‑eè kuuyin wír veé Juda bèn, e fəə̀ woŋ wóv shó, e dù sho e wòŋ wo səné.

²²Nebukadnessar woo fon woó Babilon‑eè kòʼór Gedalia woo wan Ahikam, a kfə̀n dzə̀ wan wàn Shafan, ji taà saʼ woó Juda ji wù wáa saʼ a kibér ke wìr ke á yòʼ‑oò lo lì, e dù sho e Babilon.

²³Vilìmbìy ve rər vidzə̀m wùn à vé rər ve á yòʼ‑oò ló ne fò shiŋkfə́ŋe nèn lò, e yù ji fòn woó Babilon kòʼór ne a Gedalia ji taà saʼ, á nèn wìy wùn à wír véví, e tàtí Gedalia e Mispa. Vilìmbìy ve rər vin vi‑iì dzə̀ jii, Ishmael woo wan Netania, Johanan woo wan Karea, Serayia woo wan Tanhumet woó Netofa, e bóo lì Jaasania woó Maakat.

²⁴Gedalia súŋnín aáwune, e kàn yír Nyùy, e sùúy aáwune wùn à wír véví jii, «Lá vèn yòʼ a fàn vilìmbìy veé Babilon. Vèn wáa dzə e nsay fèn, a lìm fo fòn woó Babilon, é kinyo kén kidzə̀m ki wáa ghan kijuŋ.»

²⁵Yii bèy, wìy lòo dzə e ŋwee woo saàmbà e kiya foo fèy, Ishmael woo wan Netania wìy kfə́ wùn à wíri e ghvə̀m, e ghàr Gedalia, e yùyrí. Ishmael‑iì dzə̀ wan wàn Elishama, a dzə̀ kfə́ə wón ntoʼ. Wù‑uù yùyrí Gedalia bèy, e kfə̀n yùyrí sa wír veé Juda wùn à veé Babilone, ve wùn áwune‑eè dzəə̀n é Mispa.

²⁶Wìr dzə̀m woo fó, kìn wo terí, kìn wo kuʼùn, à vilìmbìy ve rər ví nèn tùmnín, e lèʼ, e dù e Ejiv, bìʼ fo vé‑eè fan wír veé Babilon.

²⁷Wáa dzə e kiya ke Evil‑Merodak kì sí sáʼ ji fon woó Babilon, wù nèn shàm Fòn Jehoyiacin woó Juda, e fə̀ə́r wun fo sháŋ. Wù‑uù fə̀ə́r é kishiíy kee nshòv saàmbà e mbaà e ŋwee woo nshòv sibaà e ghvə̀m, e kiya kee nshòv saàmbà e mtaár, e kèʼ mo vé‑eè liìn Jehoyiacin ji wir sháŋ.

²⁸Fòn Evil‑Merodak ku nèn a ker wun kijuŋ, e nèn fò wun ntaʼ wo kuʼùn, e shaà mo wù‑uù foon áàfon ámóʼó ve vé‑eè koon sá wùn áwune, e wày é sháŋ é Babilon.

²⁹Á bèy, Jehoyiacin shóʼtí ndzə̀y sə́ sé sháŋ, e nèn a yikír wùn fòn ghán sidzə̀m, e dù, e mèé mo kpúu‑uù liìn wun.

³⁰Fòn woó Babilon‑eè lo, wù wàa fo kifá keé kitu ke kishiíy ke Fòn Jehoyiacin wáa ker e kibàm. Wù kú a fo bèy ghán sidzə̀m, e dù, e mèé mo kpúu‑uù liìn Fòn Jehoyiacin.