Read Lamnso 2 Afòn 3 Bible Online

2 Afòn 3 - Lamnso bible

2 Afòn 3

¹Vé‑eè kòʼór Jehoram woo wan Ahav e Samaria ji fon woó Isray, a dzə̀ é kiya ke Fòn Jehoshafat‑iì sí sáʼ Juda ji kiyá nshòv waamé e ghvə̀m. Wun woo Jehoram‑eè sàʼ Isray kiyá nshòv waamé e ghvə̀m.

²Wù‑uù yii vinyo ve ví wáa bir NYÙY TÀR, yii bèy, la ví yòʼ mèé e vé tàr wov wùn yè wov ví. Wù‑uù bvə̀ʼtí shibvə̀m shee *Baal she tàr wov‑iì bomen.

³Yii bèy, Jehoram kù‑uù ghàr vinyo ve bi ví ve Jeroboam‑eè yii, domsì wír veé Isray, aá yii sa. Wù‑uù ghàr, e làa yòʼ màʼtì.

⁴Fòn Mesha woó Moav wáa dzə, a wù liy anjiì, lo, wù wàa fo nshwì e Fòn Ahav woó Isray. Nshwì və́ne‑eè dzə́ wón njiì nsə̀kì wií (100,000) wùn à wuy ye á komen fo viyáʼ vee nsə̀kì wií ví wùn.

⁵Yii bèy, mo Fòn Ahav‑iì làyìn, fòn woó Moav nèn kèʼ, a tav kitú fo fòn woó Isray.

⁶Fòn Jehoram nèn lò fo Samaria, e dù, e bàʼtí vé rər veé Isray adzə̀m,

⁷e tsə̀nsí ntum e Fòn Jehoshafat woó Juda ji fòn woó Moav kèʼ a ne, a tav kitú wùn wun. Wù sà yíi tom wun, é wùn wun du rə́r é nsay Moav a? Wù bìnèr jii, «Wùn à wír vəə́ dzə̀ á kibáʼtín, à nyám se ŋkoʼ si.

⁸Yii bèy, á sà yíi dù dzə́ə fó feé á?» Vé ntume wìy, e yèn Jehoram, wù bìnèr ji á yíi dù a dzə́ə fó woʼ yeé Edom.

⁹Á bèy, fòn woó Isray wùn à woó Juda, à woó Edom nèn a dù. Á dù, a kaarí mvəm wòʼ vishiíy saàmbà, mendzə́v mè nèn lò, e mày, la vé rərí kìn nyám si yòʼ dzə́ə a ker mendzə́v mé a no.

¹⁰Fòn woó Isray nèn a ghay ji NYÙY TÀR sà jàŋrì afon vee ataár vìn ji wun wáy e wír veé Moaví wo a?

¹¹Fòn Jehoshafat nèn dzə̀r jii, «Ŋgaà ntum NYÙY TÀR[4] yòʼ dzə̀ fen wo dzə̀ vèsən lòn, wù tàr fo NYÙY TÀR a?» Nshìylav fòn woó Isray yìmòʼ nèn bìnèr jii, «Elisha woo wánlè lìm Elija waà dzə̀ á fèn, Elisha wo dzəə̀n á wan Shafat.»

¹²Fòn Jehoshafat nèn bìnsí jii, «NYÙY TÀR dzə̀ wùn wun.» Fòn woó Isray wùn à Fòn Jehoshafat, à fòn woó Edom nèn sə̀y fo wun woo Elisha wùn.

¹³Á dù, Elisha suúy e fòn woó Isray jii, «Wòsò kér ka ké a taŋ? Dùu, e yèn aŋgàa ntum Nyùy vee vé tàr won wùn à vé yè woné.» Fòn woó Isray bìnsìn jii, «Àáy, kù dzə̀ wun woo NYÙY TÀR wo wù jàŋrìn afon vee ataár vìn ji wun wáy á e wír veé Moaví wo.»

¹⁴Elisha bìnèr jii, «Mo NYÙY TÀR woo Taà Mànjòŋ wo m ghvə́mé dzəə̀n shó, a là koŋ ye m kér fo Fòn Jehoshafat woó Juda, bo bó m yoʼ lò a leéy wò, bó a gwàrìr.

¹⁵Kee lèn ki, wìy e ŋgaà lùŋ.» Ŋgaà lùŋ wìy, e lòo kùm lúŋ, vitaáví vé Nyùy vi nèn wìy fo Elisha,

¹⁶wù wáa suúy ji NYÙY TÀR suuy a jii, «Wun yíi yiì, é mendzə́v mè wáa tiy aàláŋ áàláŋ, e nshwǎn ndzəv wo ndzə́ví yumen ne fo fo və̀n.

¹⁷A NYÙY TÀR kfə̀n suuy a jii, ‹Á yòʼ yíi yen a shwér, kìn wuú. Yii bèy, ndzə́ví yíi run a e nshwǎn ndzəv fen, é vèn à nàʼ won, à nyám sén sí wáa no.›

¹⁸Kee shoon ki dzə̀ kinyo kee fó tèr ke dzə̀ Nyùy yiì, a wù kfə̀n yíi way sa wír veé Moav e wò kiwo.

¹⁹À wíy tòn ŋkà se laʼ sév sidzə̀m se á bomen kay, e kaàrí sho, e tàr, e tòn mvə́m se laʼ se kuʼkìn sí sidzə̀m, e gwàtì vicí ve juŋ ve á koy, kfə́rí vidzə̀m, e sətí ntòŋ sév sé ndzəv sidzə̀m, e siì tayrí tíy, e sətí súm sév se juŋ si shó sidzə̀m.»

²⁰Á bèy, ndzə bvəə́shí, e ràn, e lòo meé moó ghan sé cù[5] bèy, ndzə́ví nèn sàsìn, e wìy fo mbìv Edom, e rùn woŋ.

²¹Wír veé Moav adzə̀me‑eè ghàn, e yù ji afon vìyi kòʼ á ne ji á nəə́ á áwune e rə́r sí. Á nèn jàŋ wir dzə̀m wo yì‑iì dzə̀ wù màʼ rə́r, e kèʼ fo wánlè, e dù, e meé e ŋgàywìr. Vé‑eè jàŋ bey, e dù, e tìír e bìíy wòŋ.

²²Á bvəə́shí, e lò e yuv kijàvndzə, shùy lòo ban e ndzəv, wír veé Moav ve vé‑eè dzəə̀n fó ndzən wùmòʼó wáa yen, a yí baŋ moo mensə́ bèy,

²³e nèn a suúy jii, «Kin ki dzə̀ mensə́. Afone dzə̀, aá fùnèn ne, e kpùkír. Vèsən vee wír veé Moavi du lèn, e kùúy káv wóv.»

²⁴Wír veé Moavi dù, e mèé e wír veé Israyí kilaʼáy, wír veé Israyi nèn ŋàʼáy, e tsə̀ə́m rə́r wùn áwune. Wír veé Moavi yú ntéŋ, e kèʼ kileʼ, wír veé Israyi wáa jùm, a gwàtì.

²⁵Wír veé Israyi tòn ŋkà se laʼ seé Moav, e kètì kètìn. Á kfən màʼ tíy e wír veé Moaví sum sí, yí sə́tí súm se juŋ si sidzə̀m. Á kfən sə̀mrì adàn adzə̀m, e gwàtì sa vicí vidzə̀m ve ví‑iì koomè. Kù‑uù jòʼsì ŋkàlaʼ yee Kir‑Hareset ye á yòʼ‑oò lo tòn, aá yòʼ‑oò lo kèr.[6] Yii bèy, vé rər ve vé‑eè kér viŋkoʼo gìŋ fó, e sùm e rə́r sí.

²⁶Fòn woó Moav yén ji rə́r sí ghàʼ á ne wun, wù nèn lì vé rər ve vé‑eè kér nyùy sí, wír ghií saàmbà, ji wùn áwune tósín á e mvə̀m rə̀r, e dù a fo fòn woó Edom wùn, kí gháʼ fo áwune tósín.

²⁷Wù nèn lì wán və woo ŋgàywìr wo wù‑uù yíi yi vifon, e yiì cu ye tonèné shó e kitu ke kày ye vé‑eè bomen, e kaàrí láʼ sho. Kinyo kìn ki beémé wún wìr veé Isray, á nèn lò fo fo, a kfən e bàm aáwuné wòŋ.