Read Lamnso 2 Afòn 4 Bible Online

2 Afòn 4 - Lamnso bible

2 Afòn 4

¹Wiiy ŋgaà ŋgoo wùmòʼ fo aŋgàa ntum Nyùyi wìy lò, e tòŋ e Elisha jii, «Lum wom woo ŋgaà wò lìm kpù ne. À kì ji wù‑uù kér a fán Nyùy. Yii bèy, ŋgaà kaa və wìy ne ji wun li a wón vém vee abaà ji akwàn və́.»

²Elisha dzə́r e wun jii, «À taʼ ji m yée le e wò? Suúy e mò, à kér a dzə̀ ka é lav?» Wù bìnèr jii, «Wánlè wò yòʼ fə̀m kér kifá, kù jòʼsì shiŋgvə́ŋgvə́r she shí dzəə̀n é kiŋgà.»

³Wù nèn sùúy e wun jii, «Fəə́, e dù, e lònrí viŋgà vé meŋgvə̀r vee kisáŋ vi fo wír vee wò shweesií. Lón vinín.

⁴À wiy sho, vèn à wóné sə̀tí vitú vén é lav, e nèn a baarì meŋgvə́r fo wò kiŋgà, a kunsí e viŋgà fey. Kee shó ki rúné, à tsə̀ʼ, e tìír fo ghaŋ.»

⁵Wiíy və̀y nèn kfə̀n é laʼ, e sə̀tí lav e wùn à wóné kitu, e nèn kèʼ, a kunsí meŋgvə́r é viŋgà, a wóné li viŋgà, fó, a wù kúnsi sho.

⁶Viŋgà viy vi rúnkír, wù kfə́n a yòŋ ji wan və wiy á e kímóʼ kí. Wàn bìnèr ji kímóʼ kí yòʼ waà dzə̀ə́. Á bèy, meŋgvə́r mè nèn tìnén.

⁷Wù nèn kfə̀n dù, e yèn Elisha woo ŋgaà ntum Nyùy, e sùúy sho. Elisha suúy e wun jii, «Dùu, e fiìnè meŋgvə́r mè, e làʼ kaá yée, é vèn à wón vée wáa yi kibér.»

⁸Kishiíy kímóʼ kí fəə́, Elisha dù e Shunem, a wiíy wùmòʼ dzə̀ fó, a dzə̀ ŋgaà kav. Wù yòŋ ji Elisha wàá ku yìkír. Á bèy, Elisha nén lóo shaà fo, wù kù bìn, e yìkír.

⁹Wiíy və̀y wìy lò, e sùúy e lum və jii, «Leéy mbà, wìr wo wù lo wù wàa shaà fèn ghán sí ghán sí və̀n dzə̀ ŋgaà lìm Nyùy, a dzə̀ ŋgaà ntum və.

¹⁰Wòsò baʼri wan lav e kikfəv ke lav, e tìír kikún wùn à kidàŋ ki fó, à ntaʼ, à lame. Wù wiy ji wun ghán wòsò, é wù nəə́, e shìíy fo.»

¹¹Elisha wìy dù e Shunem e kishiíy kímóʼ kí, e kòʼ, e nə̀ə́ e wun wàn lav, e meèmè,

¹²e lò sùúy e Gehasi woo wánlè və ji wù jaŋ á wiíy woo shooy, é wù wàá wiy. Wù wìy, e tìím e Elisha si.

¹³Elisha suúy e wánlè və jii, «Dzə́r ó e wun ji kinyo ke juŋ ke a dzə̀ m yiì e wun, bìʼ ŋgeʼ se wù yén bìʼ vèsən kí sà dzə̀ ka á? A tàm e ghanmóʼ, wù wàa kòŋ ji m du, e bùn a fon, kìn ji m du, e yèn á mfòómé kùm kinyo kfə́.» Yii bèy, wiíy bìnèr ji wun dzə̀ á kijuŋ, bìʼ fo wun dzə́ a dzə̀ á e wír vəə́ mvəm.

¹⁴Elisha nèn a ghay ji bo kinyo ke dzə̀ á yiì shó lèn ki sà dzə̀ ka á? Gehasi bìnèr jii, «Wù yòʼ kér wán, a lum və sì ŋgàywìr.»

¹⁵Elisha yòŋ ji Gehasi jaŋ á, é wù wiy. Wù wìy, e tìím e shùu lav.

¹⁶Elisha suúy shó jii, «E ghan fen, e kiya ke kí wiyì, à wíy a ker wán lumèn e wò koy.» Wiíy və̀y yòŋ jii, «Nyaa mǒ tàr wor, *ŋgaà ntum Nyùy, lá à yòʼ a boʼtí wánlè wò.»

¹⁷Wiíy və̀y nèn wìy bòŋ bvəm, e dzə̀ə́ wán lumèn e ghan see shooy se Elisha‑aà yòŋèn.

¹⁸Wàn kúy, wáa dzə e kishiíy kímóʼ kí, wù fəə́, e dù, e yèn tàr wov é kwaʼ, a wù dzə̀ wùn à wír ve vé‑eè káv vifáa.

¹⁹Wù nèn sàsìn, e tòŋ jii, «Kitú kém éèy, kitú kém éèy.» Tàr wov suúy e wánlè lìm wùmòʼ ji wù li, e dù a sho, e fò e yè wov.

²⁰Wù lì, e dù, e fò e yè wov. Wù kíkí e wun kibìy, ntìntìn shùy gheén, wù nèn kpù.

²¹Yè wov lì, e kòʼ shó e Elisha wàn lav, e neèr e wun kikun, e fəə̀, e sə̀tí shúu lav,

²²e nèn jàŋ lúm və, e sùúy sho jii, «Tsə́nsí wánlè wò wùmòʼ wùn à kimbèʼbìy kímóʼ kí, é m du cércér, e yèn ŋgaà ntum Nyùy, bó a kfən e bàm.»

²³Lum və dzə́r jii, «À du, e yen wun a dzə̀ lán bìʼ ka? Lán yòʼ dzə̀ *Ŋkǎʼ Ŋwee wo Fíyi, kìn kishiíy ké bam.»[7] Wù bìnèr ji ntéŋ yòʼ waà dzə̀.

²⁴Wù nèn kùr kimbèʼbìy, e sùúy e wánlè və jii, «Á jùm kimbèʼbìy kí, a dù sho cércér. Lá à yòʼ sìʼím, a bó m suúy.»

²⁵Wùn wun nèn fəə̀, a dù fo ŋgaà ntum woo Elisha wùn, é Gwan Karmel. Elisha yén wun, a wù wiyì, e sùúy e wánlè və woo Gehasi jii, «Leéy wiíy woó Shunem və̀sə mo wù wiyì.

²⁶Léʼ, e dù, e yèn wun, e dzə̀r shó ji wùn à lum və, à wàn sa kù tàvkír a?» Wù dù, e dzə̀r, wù bìnèr ji vinyo vi dzə̀ á vijuŋ.

²⁷Wù wìy, e yèn Elisha e Gwan Karmel, e baàmé wúu rə́. Gehasi wìy, a tsə̀ʼ wun fo fo. Yii bèy, Elisha suúy shó jii, «Màʼtì wun fo bèy, bìʼ fo wù dzəə̀n é mvə̀m nyar ye tavíné. A NYÙY TÀR kì lìtì ne, e làa yòʼ suúy kinyo kfə́ e mò.»

²⁸Wiíy və̀y dzə́r e wun jii, «Taàtá wòm, mò‑oò ló a tàʼ wán á? Bó m yòʼ‑oò lo sùúy ji lá à yòʼ bòʼtí mo a?»

²⁹Elisha bìnkìr, e sùúy e Gehasi jii, «Koórí ndzə̀y sé si, e kùr, e lì mbàŋ yem e wò kiwo, a dù. À tárnin vèn wìr, lá à yòʼ shàʼtì. Wìr shaʼtì wò, lá à yòʼ biìmé. Ku dù fo tìítiy, e dù, e neèr mbàŋ yem e wǎn kitu.»

³⁰Yìy à wàn suúy e Elisha jii, «M suuy kin, fan a dzə̀ Nyùy, a m kfə̀n fan sa wò. Yòʼ dzə̀ m màʼtì wò, e kfə̀n vèr mòʼón.» Á bèy, Elisha nèn ŋàʼáy, wùn wun wáa dù.

³¹Gehasi dú fó mbìy, e neèr mbàŋ e wǎn kitu, la wàn yòʼ wàʼ, bóo fə̀m kiisí. Á bèy, Gehasi nèn a kfən e bàm, wùn Elisha tárnín, wù suúy shó ji wàn yoʼ waà wàʼrì.

³²Elisha yiì wìy, e nə̀ə́ e lav, e yèn wán, a wù néŋ e wun kikun, a wù kpú ne.

³³Wù nèn nə̀ə́, e sə̀tí lav e wùn wǎn kitu, e bùnrì NYÙY TÀR,

³⁴e kòʼ, e neèm e wǎn kitu, e tsə̀m shuu və́ e wó wané, sí rə́ e yé wané, wó rə́ e yé wané. Mo wù nàsìn, e tsə̀m wún e wǎn kitu bèy, wún wané nèn kèʼ a lùm.

³⁵Elisha kfən lò e yuv, e ghànrí e nsaàlav, e nèn kfə̀n, e neèm, e nàsì wún e wǎn kitu. Wàn shém kàŋ saàmbà, e nèn mvə̀ʼ sí.

³⁶Elisha jàŋ Gehasi, e sùúy sho ji wù yoŋ á yeè wàn. Wù yòŋ, yeè wàn wìy, Elisha suúy shó jii, «Wan wò və̀ne.»

³⁷Wù nəə́, e gbù e Elisha wuù, e làʼ kitú fo nsay, e nèn lì wán və, e fəə̀ shó e ndzə.

³⁸Elisha wìy a kfən e bàm é Gilgal, a jìŋ koó ne. Wùn aàŋgàa ntum ve wù‑uù yéʼeyìi dzə̀ʼə̀m, wù lò, e sùúy e wánlè və jii, «Tiír kíŋ ye kuʼùné é kiy, e nàá nshèví, e fò aáwune.»

³⁹Wo mòʼón woo wír fo áwuné mvəm nèn dù e kwaʼ ji wun kéŋ a nyóo, e yèn bóʼghvəə́y, a wù yòʼ kì kifá kee shó. Wù ku nèn kòy mo yì‑iì dzə̀ wù keèrí e wun kikum. Wù wìy sho, e seè, e wày é nshèv.

⁴⁰Á yiì sə̀ʼə́r ji áwune wàá yí. Á kèʼ yí, e nèn a toŋ jii, «Éméy ŋgaà lìm Nyùy, éméy ŋgaà lìm Nyùy, kpúu dzə̀ é kìŋ fen.» Á bèy, la áwune yòʼ dzəə yù fóo yi.

⁴¹Elisha nèn yòŋ ji á wiy á e meŋkfəŋ mè. Á wìy sho, wù shùʼ e kìŋ, e sùúy jii, «Vèn wáyrí, é wíri wáa yi.» Á nèn a yi, a bó kinyo ke bi kí yòʼ kfə̀n dzə̀ə́ sho.

⁴²Wìr wùmòʼ nèn wìy fo Baal‑Shalisha, a wù kér ntuʼ se kiban ke tonèn kí kee sáŋ yee *barli yé mbìyi. Sí‑iì dzə̀ mbaà wùn à vitú ve saŋ ve vé‑eè tinen, a ví dzə̀ə́ vishoòŋ vi. Wù‑uù wiy sho ji wun fó á e Elisha woo wir Nyùy. Elisha nèn yòŋ e wánlè və ji wù fó á, é wíri yí.

⁴³Wánlè və dzə́r jii, «A dzə̀ m ghàn é le, bóo jàv viyíkìr vìn e wíri wií?» Elisha bìnèr jii, «Fó, é wíri wáa yi, bìʼ fo NYÙY TÀR yoŋ jii, ‹Áwune yíi yi, é kibér ki bér.› »

⁴⁴Á bèy, wù nèn lì, e tìír aáwuné si, e jàv. Á yí, kibér ki kfən bèr, kù réŋréŋ mo NYÙY TÀR‑iì suuyin.