Read Lamnso 2 Afòn 6 Bible Online

2 Afòn 6 - Lamnso bible

2 Afòn 6

¹Kishiíy kímóʼ kí gheén, shiŋgoo she aŋgàa ntum Nyùy she shí‑iì dzəə̀n e Elisha sar shi suúy e wun jii, «Leéy, e yèn, kirə́ʼ kin fo vèsən lo, á dzə̀ʼə̀m kí fárninè.

²Bòŋ ji wìr mòʼón mòʼón fo vèr du é ghaa Jordan fo dzə̀ wù kòóy kicí ke á baʼri kirə́ʼ ke vèsən wáa shiíy sho.» Wù biímé jii, «Vèn du ri.»

³Wùmòʼ woo wír lón ji Elisha ku dù a wùn áwune. Wù biímé.

⁴Á bèy, wùn áwune nèn dù, e mèé e Jordan, e kèʼ a gwàr vicí.

⁵Wìr wùmòʼ fo áwuné mvəm lòo gwàr kicí, njàm shóʼóm, e tò é ndzəv. Wù tóŋ kitávín jii, «Tàr wor, kí kòóy ne. Dzə̀ njàm, a m kì lòn lónén.»

⁶Elisha nèn dzə̀r jii, «Yì tò a dzə̀ feé?» Wù ròm fo yì kì toon. Elisha shèr kicí, e màʼ e mvəm fóo fèy, e nèn yiì, njàm kóʼ, a laʼ e kitu ke ndzəv.

⁷Elisha yòŋ sho jii, «Fəə́r fó fo.» Wù nèn ràmsì kiwó, e fə̀ə́r.

⁸Wáa dzə e ghan símóʼ sí, Fòn woó Siiria táŋ rə́r sée nəə́ Isray sho. Wù toóy atǎr ntoʼ və́, e naàrì kirə́ʼ fo kiláʼáy kfə́ kí yíi a dzə.

⁹Elisha kù nèn tsə̀nsí ntum e fòn woó Isray ji wù wáa yen a fóo shaà e kirə̀ʼ fóo fèy, bìʼ á fo wír veé Siiriàa sí sə́y a fo.

¹⁰Fòn woó Isray nèn tsə̀nsí a dzə̀ wíri, á dù, e kìy fó. Elisha kù‑uù kantì fon bèy, akàŋ akàŋ, a wù nèn kim kitú kfə́, baʼàr kpú e virə̀ʼ fóo fèy.

¹¹Vifií vé fòn woó Siiria vi‑iì bvəə́ri, bìʼ kinyo ke kí‑iì kooy kìn. Wù nèn tòóy atǎr ntoʼ və́, e dzə̀r aáwune jii, «Dzə̀ la e vèsə́n mvəm, wo wù li vinyo, du, suuy e fòn woó Isray? Vèn yoŋ ŋgaàŋ e mò.»

¹²Taà ntoʼ wùmòʼ bùn fon, e yòŋ jii, «Taàtá wòm, yòʼ dzə̀ á wír fo vèr, dzə̀ á Elisha woo *ŋgaà ntum Nyùy wo wù dzəə̀n é Isray. Li a wun vinyo ve fòn suuy e wun faáy kishiíyí, du, suuy e fòn woó Isray.»

¹³Fòn suúy ji á du, e lèéy a fo wù dzəə̀n, é wun tsə́nsí á wíri, aá du, e koò. Sáʼka nèn wìy e fòn ji Elisha dzə̀ á e mvə̀mlaʼ yee Dotan.

¹⁴Wù tsə́nsí mànjòŋ nyanyày, aá kér nyám se ŋkoʼ wùn à *viténtén vé rər ví, á dù vitsə́ʼə́, e gìŋ ŋkàlaʼ rə̀y, e kaàrí, e tàr.

¹⁵Bvəə́shí a dzə kijàvndzə kijàvndzə, wánlè lìm Elisha nànèn e yuv, e lòo fəə fo ndzə, e yèn, a vé rərí gíŋ ne mvəmlaʼ, e kaàrí, e tàr, aá kér nyám se ŋkoʼ wùn à viténtén vé rər ví. Wù kfə́n é bàm, e yèn Elisha, e sùúy sho jii, «Tàr wor, kinyo ki kòóy ne. Vèsən lo, e yèe?»

¹⁶Elisha suúy shó jii, «Lá à yòʼ a fàn. Vé rər ve á dzəə̀n vèsən áwuneé kùʼ, e shaà ve á dzəə̀n fó.»

¹⁷Elisha nèn a bùnrì fo wun, a suúy jii, «Éè NYÙY TÀR, m lón wò ji à ku mvə̀ʼ a sí rə́, é wù yén kinyo.» NYÙY TÀR nèn mvə̀ʼ sí wánlè nsùm və̀y, wù yén nyám se ŋkoʼ wùn à viténtén vé rər ví vinín, a ví shwínin və́y, a ví rún agwan ve á kaarin wùn Elisha, e tàr.

¹⁸Wír veé Siiriàa sə́y, e gìm Elisha, wù bùnrì NYÙY TÀR, e yòŋ jii, «Dzə̀v wír vìne, aá fir.» NYÙY TÀR nèn dzə̀v áwune, á fìr, kù mo Elisha kì bùnrìn.

¹⁹Elisha nèn sùúy aáwune jii, «Vèn jày ne dzə́ə. Mvə̀mlaʼ rə̀n yòʼ dzə̀ ye vèn taʼà. Vèn wáa wìy e mǒ bàm, é m li ven, e dù sho fo wìr wo vèn taʼà.» Wù nèn lì áwune, e dù sho e Samaria.

²⁰Kù mo áwune nəən é Samaria, Elisha nèn bùnrì jii, «Éè NYÙY TÀR, ku mvə̀ʼ sí wír vìne, aá wáa yen virə́ʼ.» NYÙY TÀR nèn mvə̀ʼ sí yév, áwune yén, aá sì a dzə̀ é mvə̀m Samaria.

²¹Fòn woó Isray yén áwune, e dzə̀r e Elisha jii, «Tàr wor, m seérí wír vìn a? M seérí áwune á?»

²²Wù bìnèr jii, «Lá à yòʼ seèrí áwune. A fə̀m dzə̀ wír ve koon wò e wó yée e kwaʼ rər, bo à kì yíi yuyrí a? Aày, ku fò áwune viyíkìr wùn à kifá ke á nó kí, e nèn màʼtì, aá wáa kfən e bàm, e dù, e yen fon wov.»

²³Wù nèn bàʼtí ŋkàʼ wo kuʼùné, á yí bìʼ áwune. Á màysì viyíkìr wùn à nóo, wù nèn siìr áwune é bàm, á kfə́n, e dù, e yèn tàr wov. Á bèy, la wír veé Siiriàa yòʼ dzə́ə a nəə́ rə́r, a faàsì vifá fo nsay Isray.

²⁴Ntàm lòo dàr, Ben‑Hadad woo fon woó Siiria báʼtí vé rər və́ adzə̀m, e kòʼ, e gìŋ Samaria e rə́r sí.

²⁵Mo rə́r sí gìŋèn Samaria, jìŋ nèn koò é mvə̀mlaʼ, á wáa fiìnè kitú ke kimbèʼbìy *ashekel mwaamé vee *kisha ke mbàm ke fəvír kí, a fiìnè jáŋ kibìŋ[9] ashekel atàn vee kisha ke mbàm ke fəvír kí.

²⁶Fòn woó Isray yiì lò, a shaà e kitu ke kày ye vé‑eè bomen, e kaàrí láʼ sho, wiíy wùmòʼ wáa toŋ, a yòŋ e wun jii, «Taàta wòm woo fon, á sə́ á mo.»

²⁷Wù bìnèr jii, «A NYÙY TÀR dzə̀ làa yòʼ sə wò, bo dzə̀ m sə̀ kém wò e ka kí? M kér sáŋ mo m kér meluʼ a?

²⁸«Yii bèy, kíghàʼ wò dzə̀ ka?» Wiíy və̀y bìnèr jii, «Wiíy və̀n‑ee suúy e mò ji m fó á wán wom, é vèr wun kfə́r, bvəə́shi lóo dzə a kibvəə́shí, aá kfə́r á və́ə.

²⁹Vèr wun nèn‑ee naá wán wom, e kfə̀r. Ndzə bvəə́shí, e ràn, m wáa yòŋ sho ji vèr wun naá ri a və́ə woo wán, e kfə̀r, a wù kì lì á ne, e lìtì.»

³⁰Fòn yú jí se wiíy və̀y, e saàsì ndzə̀y sə́, e yiì lòo ghan e kitu ke kày, wíri lòo leéy wun, e yèn, a wù kér ndzə̀y sé kpu e wun sar kikum.

³¹Wù nèn lò e yòŋ jii, «A kitú ke Elisha woo wan Shafat ki gòʼ fo lán, la m shóʼ, Nyùy kù màʼ ŋgeʼ e mǒ kitu, e kfə̀n dzə̀sì.»

³²Fòn nèn tùm wánlè ntoʼ ji wù du, e tàʼ a Elisha. A Elisha kù dzə̀ e wun lav, aàtǎr kfəə wíy ne, wùn áwune wáa dzə. Bo wánlè ntoʼ wáa meé, a Elisha kì sùúy ne aàtǎr kfəə jii, «Bó vèn yòʼ yén mo kinjuyrìwìr kìn ki tumen ne wír ji wù wiy, e tìn kitú kém a? Wù mee fèn mbà, vèn sə̀tí shúu lav, e làa yòʼ biimé, é wù nəə́. Fòn kitú kfə́ sí wiy e wun bàm.»

³³Kù mo wù súŋnin, a wù yoʼ màysì, ŋgaà ntum nèn mèé fo. Fòn wìy, e sùúy jii, «Lòn və́ne lò a dzə̀ fo NYÙY TÀR. A dzə̀ m kfə̀n a shìy wun e gha lèn.»