Read Lamnso 2 Afòn 7 Bible Online

2 Afòn 7 - Lamnso bible

2 Afòn 7

¹Elisha bìnèr jii, «Yuúrí ri jí NYÙY TÀR. NYÙY TÀR suuy jii, ‹E ghan fen kibvəə́shí, á bvəə́shi, a fìʼ meŋkfəŋ me kpuún mè, a fiìnè *shekel e mòʼón mòʼón, e kfə̀n a fìʼ sáŋ yee *barli mfìʼ sibaà, a fiìnè shekel e mòʼón mòʼón, e shùu kày yeé Samaria.› »

²Kilìmbìy ke fòn kì yéʼti e wùn wó ki nèn a ghay e wìr Nyùy jii, «A NYÙY TÀR kitú kfə́ fə̀m mvə̀ʼ shúu yuv, kinyo kìn ki kòóy á?» Wù bìnèr jii, «À bvəə́shi, e yen e sí yée, yii bèy, a bó à yòʼ‑óò yí.»

³Vé shìvnsay ámóʼó‑oò dzə̀ akweè e shùu kày woó Samaria fo ndzə. Á nèn a ghay wún jii, «Vèsən kù dzə́ fèn ji kpúu wiy, e lì vèsən ji ka?

⁴A vèsən yòŋ ji vé‑éè nəə́ é mvə̀mlaʼ, bo jìŋ kù‑úù yúyrí vèsən fó. Vèsən goʼ, a dzə fèn, bo á kù‑úù kpú. Vèn lo, é vèsən du e wír veé Siiriàá kilaʼáy. Aáwune màʼtì vèsən atin, é vèsən wáa dzə sho. Á yúyrí vèsən, bo ntéŋ ntéŋ yòʼ dzə̀, bìʼ fo vèsən kù kì sí yìi kpu.»

⁵Á bèy, áwune nèn ŋàʼáy e meraaràŋ, a dù e wír veé Siiriàá kilaʼáy. Á meé é ghaa kilaʼáy, e làa yòʼ yen wír fo fə̀m e mòʼón,

⁶bìʼ fo NYÙY TÀR kì yiìn ne, vé rər veé Siiriàa yú, a *viténtén vé rər ví wiyì, e yù nsən se nyám se ŋkoʼ, e yù mo vé rərí giv agháʼán, e nèn a kwàʼtì ji fòn woó Isray làʼ a ne afon veé Hit wùn à veé Ejivi, à wír véví ji á nəə́ á áwune e rə́r sí.

⁷Áwune‑eè nyèŋ e kitú kév kí é meraaràŋ foo fèy, e màʼày táv sév wùn à nyám sév sé ŋkoʼ si, à vimbèʼbìy vév ví. Kiláʼáy kí ku nèn gòʼ fo wùn à vifá vi vidzə̀m.

⁸Vé shìvnsay vìyi meé é ghaa kilaʼáy bey, e kù nèn nə̀ə́ e tàv wúmóʼó, e yì vifá, e nò ve noón ví. Áwune kfən kùúy *kisha ke mbàm ke baar kí wùn à ke fəvír kí, à ndzə̀y sí, e nèn dù, e lìtì. Á lìtì bèy, e nèn siì kfə̀n é bàm, e nə̀ə́ e wúmóʼ woo táví, e kùúy sa vifá fo fo, e dù, e lìtì.

⁹Áwune nèn lò, a dzə̀mnìn, a suúy jii, «Kinyo ke vèsən yii kìn ki yoʼ bòŋ. Mo vèsən kooyin sáʼka wo juŋ lán bèn, a vèsən lòo dzə, a lèm ji ndzə bvəə́shí, e ràn, é bo á wáa fèr, bo ŋgeʼ si‑íì nəə́ vèsən. Vèsən du, e fìʼtì e ntoʼ.»

¹⁰Áwune nèn kfə̀n é ŋkàlaʼ, e yòŋ anshìy veé shùu kày, e sùúy jii, «Vèr dù e wír veé Siiriàá kilaʼáy, bó vèr yoʼ yèn wír, bó vèr yoʼ yù kikum ke wìr. Kù mày nyám se ŋkoʼ wùn à vimbèʼbìy ví ve ví tsə́ŋ fo, à táv sév sí, se sí kù tíy fo bèy.»

¹¹Anshìy vìyi wáa jàŋ, a fìʼtì sáʼka və̀y, á nèn yù é ntoʼ.

¹²Fòn nèn lò e yuv vitsə́ʼə́, e sùúy e nsheèlav sə́ sí jii, «M lo, e suúy ven kinyo ke wír veé Siiriàa báʼti, taáme vèsən shó. Áwune kì ji jìŋ koò á vèsən. Á bèy, áwune nen màʼtì kiláʼáy kév, e dù, e làáy e kwaʼ. Aá kí kév ji vèsən yíi fəə fo ŋkàlaʼ ji á taʼ a vifá ve yi, aáwune nèn koòrí a vèsən fó ndzə atin, e nèn nə̀ə́ ŋkàlaʼ fo tèr.»

¹³Nshìylav rə yìmòʼ nèn sùúy jii, «Mo wír veé Isray ve á dzəə̀n fen lène kù siìn ji aŋkfə moo ŋkfə̌n wìr vév ve á kpuun ne, bo bòŋ, aá maysi nyám se ŋkoʼ see sitàn, e tùm wír ámóʼó shó, aá du, e yèn ó ji sà kòóy ka fó a?»

¹⁴Á nèn bàʼtí vé koʼo, á lì viténtén vé rər vibaà. Fòn nèn tsə̀nsí áwune ji á du, e yèn ó a ji sà kòóy ka vé rər veé Siiria a?

¹⁵Á jùmrì kiwuú ké wìr veé Siiria, e dù, e mèé e ndzəv yee Jordan, aá kù yén a dzə̀ ndzə̀y wùn à vifá ve wír veé Siiria vi, a ví néŋ dzə́ə e dzə̀m mo vé‑eè du kigir kigir bèy, a ví túmkirì. Á bèy, áwune nèn kfə̀n, e naàrì e fòn.

¹⁶Wír veé Samariàa nèn fəə̀, e dù, e kùúy vifá fo wír veé Siiriàá kilaʼáy. Á nèn kù a fìʼ meŋkfəŋ me kpuún mè, a fiìnè shekel e mòʼón mòʼón, e kfə̀n a fìʼ sáŋ yee *barli mfìʼ sibaà, a fiìnè sa shekel e mòʼón mòʼón e Samaria, kù mo NYÙY TÀR‑iì suuyin.

¹⁷Kí wáa koóy bèy, a fòn woó Isray kì lèm ne mfòómé wo wù‑uù yéʼti e wùn wó, wù wáa shìy shúu kày. Mo wíri keèmèn ji á fəə́, e nèn nyèŋrì wun fo, wù kpú. Kí ku nèn ghèén e kinyò ke Elisha‑aà suuyin é ghan se fòn‑eè səyin, e yèn wun.

¹⁸Wù‑uù sùúy e fòn jii, «Bvəə́shi lòo dzə e ghan sin kibvəə́shí, aá wáa fìʼ meŋkfəŋ me kpuún mè e shùu kày woó Samaria, a fiìnè shekel e mòʼón mòʼón, e kfə̀n a fìʼ sáŋ yee barli mfìʼ sibaà, a fiìnè sa shekel e mòʼón mòʼón.»

¹⁹Kilìmbìy ki‑iì bìnèr e Elisha jii, «A NYÙY TÀR kitú kfə́ fə̀m mvə̀ʼ shúu yuv, bo a dzə̀ kinyo kìn ki kòóy a?» Elisha‑aà sùúy jii, «À bvəə́shi, e yen e sí yée, yii bèy, a bó à yòʼ‑óò yí.»

²⁰Kinyo ki nèn kù kòóy rú wun, wíri nyéŋrí wun e shùu kày, wù kpú.