Read Lamnso 2 Afòn 8 Bible Online

2 Afòn 8 - Lamnso bible

2 Afòn 8

¹Elisha‑aà sùúy e wiíy wo wun woo Elisha‑aà nànèn wán və fó kpu jii, «Vèn à kfə́ə yée lo, a dù fo vèn‑éè du, bìʼ fo NYÙY TÀR yòŋèn ne ji jìŋ waà wiyì, a yì yíi a dzə a e wòŋ kiyá saàmbà.»

²Wiíy və̀y nèn ŋàʼáy, e yiì, kù mo wìr Nyùy suuyin e wun, wùn à kfə́ə rəə́ nèn dù e wòŋ Filistia, e dzə̀ʼə̀m fo viyá saàmbà.

³Viyá vee saàmbà vi mày, wiíy və̀y kfə́n é bàm fó wòŋ Filistia, e dù ji wun bun á fon, a lon ji fòn ku siìr a lav rə wùn à súm vəə́ e wun.

⁴Wù wáa dù bèy, a fòn kì sùŋnín ne wùn Gehasi woo wánlè lìm Elisha, e yòŋ sho ji wù wàá fer á e wun viŋgaʼnìn ve vinyò ve Elisha yiìn.

⁵Wù nèn a fèr, e lòo fèr mo Elisha‑aà nànèn wír fo kpu, wiíy wo Elisha‑aà nànèn wán və fó kpu nèn wìy, a lon fon ji wù siir á lav rə wùn à súm vəə́ e wun. Gehasi nèn bùn fon e yòŋ jii, «Nyàr, taàta wòm woo fon, wiíy və̀y waà və̀ne, a wan və waà və̀ne wo Elisha‑aà nànèn á fo kpu.»

⁶Fòn sii dzə̀r e wiíy woo shooy, wù naàrì e fòn. Fòn nèn shòʼ taà ntoʼ wùmòʼ, e sùúy sho ji wù fó á kifá ke wiíy və̀n sho kidzə̀m, e kfə̀n dzə̀sì a vifá ve vé‑ee káv fo wun sum sí vidzə̀m, e kèʼ fo kishiíy ke wù‑uù loòn fó wòŋ, e wìy meé lán.

⁷Elisha nèn wìy lò, e dù e Damaskus. Wù wáa dzə fo, a Ben‑Hadad woo fon woó Siiria kì lumkìrì. Á nèn lò, e bùn fon ji wìr Nyùy waà wìy a fo.

⁸Fòn suúy e Hasael jii, «Lì kifá ki, e dù, e fò e wìr Nyùy, é wù tar ó fo NYÙY TÀR ji m sà yíi bonén a?»

⁹Hasael nèn lì kifá kée dù, e fo e wìr Nyùy, a yì‑iì dzə̀ kfəə́ se vifa ve juŋ vi veé Damaskus, akameri bèʼèy mkweè. Hasael dù, e tìím e wìr Nyùy si, e sùúy jii, «Wan wò woo Ben‑Hadad woo fon woó Siiria tùm mo fo wò wùn ji à leéy á ji wun sà yíi bonén a?»

¹⁰Elisha bìnèr jii, «Dù, e sùúy sho ji wù waà yíi bonén. Yii bèy, NYÙY TÀR yòŋ ne e mò ji wù waà yíi kpu.»

¹¹Elisha nèn kù tùytí sí e Hasael wùn, a kiy wun, kitú ki lùm Hasael, Elisha nèn lò, e kèʼ a toŋ.

¹²Hasael dzə́r shó jii, «Taàtá wòm, à tóŋ ji ka?» Wù bìnèr jii, «Bìʼ fo m kiìn vinyo ve bi ví ve à wíy a yiì e wír veé Israyi. À wíy a tòn virə́ʼ vév ve tavkín ví e və́yí, a yuyrí wónlě nsùm vév é shùu rər, a ndzən wón vév ve terií é nsay, aá wáa kpukír, e siì kfə̀n a toʼtí bvəm se vikìy vév ve á dzəə̀n e bvə́me.»

¹³Hasael dzə́r jii, «A dzə̀ wánlè wò, wo dzəə̀n kiŋgà ké jwi fo kiŋgà ké jwi, wù ghàn é le, e bó a yiì vinyo ve ghaʼtín vin?» Elisha bìnèr jii, «NYÙY TÀR dìn ne e mò ji à wíy a dzə a fon woó Siiria.»

¹⁴Hasael nèn màʼtì Elisha, e kfə̀n fo tàr wóv wùn, wù dzə́r e wun jii, «Elisha sùúy e wò ji ka?» Wù bìnèr jii, «Wù sùúy e mò ji à waà kù lo, e bonén.»

¹⁵Yii bèy, wáa dzə e kishiíy ke kí‑iì batin, Hasael lì bvə̀ràŋgí, e sə̀v e mendzə̀v, e sùm kitú ke fòn sho, e dù meé mo fòn‑eè làyìn. Á bèy, Hasael nèn yì vifon, e dzə̀ʼə̀m e Ben‑Hadad ntaʼ.

¹⁶Jehoram woo wan Jehoshafat‑iì kèʼ, a saʼ ji fon woó Juda, a Joram woo wan Ahav sí sáʼ Isray ji viyá vitàn.

¹⁷Vé‑eè kòʼór Jehoram ji fon, a wù dzə̀ kiyá nshòv sibaà e mtaár. Wù sáʼ vifon kiyá waamé, a wù dzə́ e Jerusalem.

¹⁸Wù‑uù kér wiíy a dzə̀ wan Ahav, e nèn a jùmrì liì kfəə yee shooy, a bùʼtì vinyo mo afon veé Israyi‑iì buʼtì. Wù kù‑uù yii vinyo ve ví wáa bir NYÙY TÀR.

¹⁹Yii bèy, la NYÙY TÀR yòʼ laàr wír veé Juda. Wù ku bàvtí bìʼ Davir woo ŋgaà lìm və wo wun woo NYÙY TÀR‑iì kàʼàn ne ji rám rəə́ waà kù wíy a saʼ a vifon, e wìy dù, e mày.

²⁰Wáa dzə e ghan sin se Jehoram‑eè sáʼá, Edom tén sáʼ yeé Juda, e nèn kòʼór wóov woo fon.

²¹Jehoram nèn lì *viténtén və́ vé rər, e dù sho e Tsayir. Wír veé Edome nèn lò, e gìm wun, e kaàrí, e tàr. Yii bèy, wáa dzə vitsə́ʼə́, wùn à vilìmbìy və́ vé rər veé vitenténé túmnín, e kìv dzə́ə, mànjòŋ və léʼ, e kfə̀n é melaʼ.

²²Bó Edom yòʼ‑oò dzəə ghàn biìmé sáʼ yeé Juda, e wìy e shem lán. Yì‑iì dzə̀ é ghan fóo fèy, Libna ku tèn sá sáʼ yeé Juda.

²³Ké vinyò vímóʼ ví vee Fòn Jehoram mvə̀m saʼ, à vinyo vidzə̀m ve wù‑uù yiìn ví, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

²⁴Fòn Jehoram‑eè lày, á lìtì wun aàtàr vəə́ ghaŋ e Ŋkàlaʼ Davir. Wan və Ahasiya nèn yì vifon, a saʼ e wun ntaʼ.

²⁵Ahasiya woo wan Jehoram‑eè kèʼ, a saʼ ji fon woó Juda, a Joram woo wan Ahav sí sáʼ Isray ji viyá nshòv sibaà e ghvə̀m.

²⁶Ahasiya‑aà dzə̀ kiyá nshòv sibaà e mbaà é ghan se wù‑uù kèʼèn sáʼ. Wù sáʼ vifon kiyá kimòʼón, a wù dzə́ e Jerusalem. Yè wòv‑iì dzə̀ wan wàn Fòn Omri woó Isray, aá yoŋ yír rə́ ji Ataliya.

²⁷Wù kù‑uù kér liì a dzə̀ wo kfə́ə Ahavi‑iì kérí, a wù kù yii vinyo ve ví wáa bir NYÙY TÀR mo kfə́ə Ahavi‑iì yii, bìʼ fo wù‑uù dzəə̀n sə Ahav.

²⁸Fòn Ahasiya wìy lò, e tàtí Fòn Joram woo wan Ahav, wùn wun dù, e nə̀ə́ Fòn Hasael woó Siiria e rə́r sí é Ramot‑Gilead. Wír veé Siiriàa lémér Fòn Joram fo,

²⁹wù nèn kfə̀n é bàm é Jesreel, a dzə fo ji vileémé və́ ví wàá bónén. Fòn Ahasiya woó Juda nèn sìíy lò, e sə̀y é Jesreel ji wun du, e lèéy a Fòn Joram woó Isray wo wù‑uù joy vileémé ve wír veé Siiriàa‑aà lemerin wun sho e Ramot‑Gilead, e ghan se wùn à Fòn Hasael woó Siiria‑aà maʼ rə́r.