Read Lamnso 2 Afòn 9 Bible Online

2 Afòn 9 - Lamnso bible

2 Afòn 9

¹Wáa dzə e ghan fóo fèy, Elisha woo *ŋgaà ntum Nyùy jàŋ wír woó ŋgoo aŋgàa ntum Nyùy, e sùúy e wun jii, «Kúr ndzə̀y sí, é sí táv, e lì kiyóʼóy ké meŋgvə̀r kin ki, e dù sho e Ramot‑Gilead.

²À mee fo, à tàʼ fo Jehu dzəə̀n, Jehu woo wan Jehoshafat wo kfə̀n dzəə̀n wan wàn Nimshi. À yéné, à fə̀ə́r fó mvə̀m ŋgoo, e nə̀ə́ sho e lav yee fó mvəm.

³À nəə, à nèn lì kiyóʼóy, e cuùrì meŋgvə́r e wun kitu, e sùúy sho ji NYÙY TÀR yoŋ a ji wun yóʼ a wun bèn ji fon woó Isray. À maysì, à nèn mvə̀ʼ shúu lav, a leʼ. À du, lá à yòʼ tìytíy fo.»

⁴Á bèy, wánlè nsùm woo ŋgaà ntum nèn dù e Ramot‑Gilead.

⁵Wù meé fó, e yèn amfòómé, aá dzə̀ fó dzə̀ʼə̀m. Wù yòŋ jii, «Tàá mfòómé, m kér ntum yè.» Jehu dzə́r jii, «Dzə̀ ye la fo ver viné mvəm?» Wù bìnèr jii, «Dzə̀ ye.»

⁶Jehu nèn ŋàʼáy, wùn wánlè nsùm və̀y nəə́ é mvə̀m lav, wù nèn cuùrì meŋgvə́r e Jehu kitu, e yòŋ jii, «NYÙY TÀR woo Nyùy wìr veé Isray suuy jii, ‹M yóʼ wò bèn ji fon wìr vém veé Isray.

⁷À yíi yuyrí tàr won woo fon, wo dzəə̀n wan Ahav, é m fiʼ siìr ŋkfə́tir mensə me aŋgàa ntum vém wùn à me aŋgàa lìm vémé adzə̀m ve Jesebel‑iì yuyrin.

⁸Rám Ahav e dzə̀me wíy səʼsí. M wíy laàr wón vee vilum vee rám Ahav fo Isray, kìn dzə̀ wan nsay, kìn dzə̀ kwàn.

⁹M wíy yiì, é rám Ahavi wáa dzə moo yé Jeroboam woo wan Nebat, e kfə̀n a dzə moo yé Baasha woo wan Ahija.

¹⁰Fo ké Jesebel ki, jwí si wíy kfər dzə́n rə́ é nsay Jesreel, é la wìr yòʼ dzəə̀mè wun. Wánlè nsùm və̀y màysì kisúŋnìn kìn, e nèn mvə̀ʼ shúu lav, e lèʼ.› »

¹¹Jehu nèn fəə̀, e kfə̀n fo amfòómé ámóʼó kì dzəə̀n. Á dzə́r e wun jii, «Kí kù dzə̀ kijuŋ à? Ŋgaàbaá və̀n kì wiy, e yen wò ji ka?» Wù bìnèr aáwune jii, «Vèn kì wun, a vèn kfə̀n kì sá dzə́ə rə kisuŋnìn.»

¹²Áwune yòŋ jii, «Dzə̀ kimboʼtì, suúy e vèr lèn kinyo ke kí dzəə̀n kí.» Wù bìnèr jii, «Wù kì táŋri a dzə̀ lám vèr wun, suuy ji NYÙY TÀR yoŋ a ji wun woo NYÙY TÀR sí yóʼ a mo ben ji fon woó Isray.»

¹³Á bèy, wìr dzə̀m nèn a gìtì, wìr wáa lì kikúm kfə́, a sàŋrì e Jehu si, e kirə̀ʼ ke á sèʼtìn ji wù kóʼ, a tiy a sho. Á nèn a toŋ sóŋ, a ndzəʼ jii, «Jehu sì fon.»

¹⁴Jehu woo wan Jehoshafat, a kfə̀n dzə̀ wan wàn Nimshi nèn a kur menàŋ e Fòn Joram bàm. Kí wáa koóy bèy, a fòn kì kfə̀n ne e bàm é Jesreel ji wun bónén á fo wun vileemé ve wír veé Siiriàa‑aà lemerin wun e ghan se wù‑uù fùnèn Hasael woo fon woó Siiria. Fòn Joram wùn à wìr dzə̀m woó Isray‑iì dù rə́r sin a dzə̀ é Ramot‑Gilead. Jehu‑uù sùúy áàŋgàa ŋgoo vəə́ jii, «A kwaʼtì yesəné dzə̀ e mòʼón, vèn wàa yen fo wìr soóné, e fəə̀ ŋkàlaʼ, e dù, e fìʼtì sáʼka e Jesreel.»

¹⁶Wù nèn kòʼ kár ye səŋ nyám si, a dù e Jesreel fo Joram‑eè néŋ, joyì. Wù wáa dù bèy, a Fòn Ahasiya woó Juda kì wìy sá fo ji wun leéy á Joram.

¹⁷Ŋgaà ŋkiy wo wù‑uù tíy e kitu ke lav ŋkiy e Jesreel‑iì yèn vé rə́r Jehu, aá wiyì, e nèn yòŋ jii, «M yèn, a wíri wiyì.» Joram suúy shó jii, «Leéy wír wo wù yii kóʼ nyamŋkoʼ, e tùm, é wù du, e dzə̀r aáwune ji á sà kù wiy bèn, a dzə̀ wiy ye juŋe á?»

¹⁸Ŋgaà wo wù‑uù koʼon nyamŋkoʼ nèn dù, e yèn Jehu, e sùúy sho jii, «Fòn dzə́r ji wiy ye à wiy fèn rə̀ne sà kù dzə̀ wiy ye juŋe á?» Jehu bìnèr jii, «À yii ka e wiy ye juŋe? Shaà ben, a ghan e mǒ bàm.» Ŋgaà ŋkiy nèn jàŋ, e fìʼtì ji ŋgaà ntum dù ne, e yèn á wír ve wù kì du e yen, e nèn gòʼ a fo góʼon.

¹⁹Á kfən tùm wir nyàmŋkoʼ wùmòʼ. Wù dù, e yèn áwune, e sùúy jii, «Fòn dzə́r ji vèn sà kù wiy a dzə̀ wiy ye juŋe á?» Jehu bìnèr jii, «À yii ka e wiy ye juŋe? Shaà ben a ghan e mǒ bàm.»

²⁰Ŋgaà ŋkiy sii jàŋ, e fìʼtì ji ŋgaà ntum dù ne, e yèn á wír ve wù kì du, e yen, e nèn gòʼ a fo góʼon. Dzəə̀ ye kár si wiy sho, sí wiy a moo sé Jehu bèy. Wù yii kóʼ kfə́ kár moo ŋgaàbaá bèy.

²¹Á bèy, Joram nèn yòŋ jii, «Wìy e kár yémé cér.» Á wìy sho, wùn Fòn Ahasiya woó Juda nèn ŋàʼáy, wír e rə́ yee kári, a dù ji á tárnín á wùn à Jehu. Wùn áwune nèn dù, e tàrnín e ghaa sum wo yì‑iì dzəə̀n wó Nabot woó Jesreel.

²²Joram yén Jehu, e dzə̀r shó jii, «Jehu, wiy rə̀ne kù dzə̀ ye juŋe a?» Jehu bìnèr sho jii, «A dzə̀ wàa dzə ye juŋe é le, aànyùy kisaŋe wùn à virim ve yè won Jesebel vi kù kuʼ kùʼùn ben?»

²³Joram nèn bìnkìr, a leʼ, a suúy e Ahasiya jii, «Yímóy, Ahasiya, wìr wo kpuún sì.»

²⁴Jehu sə̀ŋ kinte kfə́ e vitaáví ví, e tè Joram sho fo ndzə̀m, mvəne nəə́ e wun tim, wù gbù e wun mvə̀m kar.

²⁵Jehu suúy e Bidkar wo wù‑uù sə́ wun, səŋ kár rə́ jii, «Fəə́r wun, e màʼ e sum wo yì‑iì dzəə̀n wó Nabot woo wír woó Jesreel. Kuúmé kinyo ke NYÙY TÀR‑iì yòŋèn e Ahav woo tàr à Joram kitu ki, e ghan se wòsò‑oò koʼon kár kintatì, a jùmrì wun woo Ahav.

²⁶NYÙY TÀR‑iì yòŋ e wun ji wun‑eè yèn á mensə́ me Nabot wùn à me wón və́ mè, a wun yíi yiì, é wù laʼ á e kirə̀ʼ fen, suuy a wun woo NYÙY TÀR.» Jehu nèn sùúy e nsə̀ŋ və jii, «Shúr wun, e dù, e màʼ e Nabot sum fey mo NYÙY TÀR‑iì yòŋèn.»

²⁷Fòn Ahasiya yén kinyo ke kí kooyin, e nèn a leʼ e wun kar, a dù e dzəə̀ ŋkàlaʼ Bet Haggan, a Jehu jum, jaŋ jii, «Vèn té wun.» Á nèn tè wun[10] e wun kar, a wù sí kóʼ e Gur e ghaa Ibleyam. Wù ku nyèŋ, e dù, e kpù a dzə̀ é Megiddo.

²⁸Atǎr ntoʼ vəə́ lì wun e kar, e kfə̀n shó e Jerusalem, e lìtì wun e wun fəm, aàtàr vəə́ ghaŋ e Ŋkàlaʼ Davir.

²⁹A wun woo Ahasiya‑aà yì vifon e Juda, a Joram woo wan Ahav sí sáʼ Isray ji kiyá nshòv mòʼón e ghvə̀m.

³⁰Jehu‑uù wìy, e mèé e Jesreel, Jesebel yú kinyo ke kí kooyin, e nèn shìm sí rə́, e nàŋsín kitú kfə́, e tìím, a màʼ sí fo shùu wundu.

³¹Jehu lòo tosín shúu kày, wù jàŋ jii, «Simri, wò wo à yuyrin tàr won, à wìy a dzə̀ wiy ye juŋe á?»

³²Wù nàn sí, e lèéy wundu, e jàŋ jii, «Dzə̀ la e mǒ mbìv? Dzə̀ la? Nsheèlav se sí yii leey fo vikǐy ntoʼo[11] moo sibaà bey, kìn sitaár, si nèn a tsənsí sí fo wundu, a leéy wun fo nsay.»

³³Wù suúy jii, «Vèn maʼ Jesebel fo nsay.» Á nèn màʼ fo nsay, mensə́ mvə mè saámé é wǔn lav wùn à e nyám se ŋkoʼ sí wùn. Jehu jùm nyám se sí səŋ kár rə́, e shaà sho e kitu wo.

³⁴Jehù nèn nə̀ə́ e ntoʼ, e yìkír, e nò kifá, e bóo lò, e suúy jii, «Wiíy wo lòné shovin ne wun və̀y dzə̀ wan ntoʼ. Vèn li, e dzəə̀mè.»

³⁵Á dù ji á du, e lì, e dzəə̀mè, e làa yòʼ yen kifá, e shaà là ŋgéreʼ kitu wùn à vighvə́r vé wuù ví, à vé wo vi.

³⁶Á kfə́n é bàm, e dù, e sùúy e Jehu, wù yuúrí, e sùúy jii, kin ki dzə̀ kinyo ke NYÙY TÀR‑iì suuyin ji kí waà wíy koóy, a wù‑uù sùúy, e shaà a dzə̀ fo *ŋgaà ntum və woo Elija woó Tishbe. Wù‑uù sùúy jii, «Jwí si wíy kfər a wún Jesebel e nsay Jesreel,

³⁷é dzə́n rəə́ wáa neŋ ji jàʼkìkì moo jáŋ bèy fo nsay, a bó yòʼ dzə̀ wìr kfə̀n kìíy ji dzə̀ á Jesebel.»