Read Lamnso 1 Wòŋ 12 Bible Online

1 Wòŋ 12 - Lamnso bible

1 Wòŋ 12

¹Yì‑iì dzə̀ é ghan se Davir‑iì lir Fòn Saul woo wan Kish e Tsiklag, wír ámóʼó wìy, e yèn wun fo. Wír vìne‑eè dzə̀ antav ve vé‑eè sə́ wun, maʼ rə́r.

²Áwune‑eè kér vinte, aá kì móo màʼ mvən kijuŋ, aá kfə̀n kì móo rəvír kiŋkoʼ wó e dzə̀m. Wír vìne dzə̀ vee rám Benjamin, a dzə̀ rám ye kfə́ə Fòn Sauli ràmèn fó fo.

³Vilìmbìy vév ví‑iì dzə̀ Ahiyeser wùn Joash vee wón Shemaa woó Gibea. Wír ve vé‑eè dzəə̀n aáwuné sari‑iì dzə̀ Jesiel wùn Pelet vee wón Asmavet, wùn à Beraka, à Jehu woó Anatot,

⁴à Ishmayia woó Gibeon wo yì‑iì dzəə̀n ntav e mvə̀m antav vee mtaár, a kfə̀n dzə̀ sá kilìmbìy ke antav vee mtaár vee shooy. Ámóʼó‑oò dzə̀ jii, Jeremia wùn à Jahasiel, à Johanan wùn à Josabad woó Gedera,

⁵à Elusay, à Jerimot, à Bealiya, à Shemaria wùn à Shefatia woó Haruv,

⁶à Elkana, à Ishia, à Asarel, à Joeser wùn Jashobeam vee wír vee kfə́ə Kora,

⁷e bóo lì Joela wùn Sebadiya vee wón Jeroham woó Gedor.

⁸Wír vee rám Gad ámóʼó‑oò wìy, e tàtí sa ŋgoo Davir e ghan se wù‑uù dzəə̀n é kirə̀ʼ ké kilìr ki é woʼ. Áwune‑eè dzə̀ antav ve ghaʼtíné, kiiy móo fùnèn e ŋkeè wùn à kòŋé, aá kér melív, kfə̀n káv vishí, beéme moo bvərə̀ʼ, shúrkir moo meshùy meé agwan.

⁹Eser‑iì dzə̀ kitú kév, a Obadia tóm wun, a kibér ki nèn dzə̀ e wun bàm jii, Eliav,

¹⁰wùn à Mishmanna, à Jeremia,

¹¹à Attay, à Eliel,

¹²à Johanan, à Elsabad,

¹³à Jeremia wùmòʼ, e lì Makbannay.

¹⁴Wír vee rám Gad vìne‑eè dzə̀ amfòómé, a ve terií‑iì sáʼ wíri wií wií, a ve kuʼkìné sáʼ wíri nsə̀kì nsə̀kì.

¹⁵Dzə̀ áwune vin ve vé‑eè tumen ndzə́v yee Jordan e ŋwee mbìyi fó kiya, wo ndzə́ví yii rún, fəə́ e kwaʼ. Áwune túm bey, e jùm wír ve vé‑eè dzə́ e viwoóy é ndzən və̀n wùn ǎ ndzən və̀sə.

¹⁶Wír ámóʼó kfən lò sa fo rám Benjamin, ámóʼó fó rám Juda, a wìy ji á tátí á Davir fo wù‑uù lirì.

¹⁷Davir fəə́, e yèn áwune, e sùúy jii, «A vèn wiy moo ŋkar sém, a fùnèn e mǒ mbìv, vèn tàtí ver, é vèsən wáa dzə. Yii bèy, a dzə̀ ji vèn wìy ji á fiine mo áàŋgàa vibàn vémé, fə̀m mo wó yémé dzəə̀n e ránén, Nyùy wo atǎr atàr vesəné‑eè ghvə́mé kù màʼ ŋgeʼ e věn kitu.»

¹⁸Á bèy, Kiyoy ke Nyùy ki nèn wìy fo Amasay wo wù‑uù loòn, a dzə kilìmbìy ke antav vee mtaár. Wù yòŋ jii: «Éè Davir, wò woo wan Jessi, vèr sì wír vé, vèr kpù e wò mbòv. Kú a tòn, a dù duùn. Vèn à wír vée yíi a tòn, a dù duùn, bìʼ fo maʼ Nyùy rə́r sé.» Davir nèn biìmé, wùn áwune wáa dzə. Wù lèm áwune, á wáa wam vé rər ve vé‑eè lo, á tò, e faàsì vifá fo ntèʼ se sí‑iì ban áwune.

¹⁹Wír ámóʼó ve dzəə̀n kév rám Manassèe lò, e kfə̀n sá e Davir mbìv, a dzə̀ é ghan se wù‑uù duùn wùn à wír veé Filistiàa ji á funen á Fòn Saul. Yii bèy, wù yòʼ‑oò lo fəə̀ é shùu rər, bìʼ fo afon veé Filistiàa‑aà kfəynìn jii, «A tàm á wù waà yiì bìnkìr, e kfə̀n e Fòn Saul mbìv mo yì‑iì dzəə̀n tàr wov.» Á nèn siìr wun e bàm é Tsiklag.

²⁰Wù wáa dù e Tsiklag bèy, wír vee rám Manasse vìyi nèn tàtí wun, aá dzə̀ ji Adnaa, Josabad, Jediyael, Mayker, Josabad wùmòʼ, Elihu, e bóo lì sa Tsilletay. Áwune adzə̀me‑eè dzə̀ amfòómé veé ram Manasse, a wìr mòʼón mòʼón wám wír nsə̀kì nsə̀kì.

²¹Áwune adzə̀me‑eè dzə̀ vé rər ve tavkíné, aá nèn sə́ Davir, a wùn áwune funèn vitúm ve ví lo, ví nə̀ə́ áwune ji á faasi vifá. Davir nèn lò, e lèm áwune ji amfòómé və́ rər.

²²Wáa dzə e ghan sin, wíri kú a wìy kishiíy kidzə̀m, a tatí Davir, e nèn lò, e kùʼ, a dzə mànjòŋ wo wiiwíy.

²³Yì‑iì dzə̀ é ghan se Davir‑iì dzəə̀n é Hebron, vé rərí wìy aàkáŋ aàkáŋ ji á sə́ á vifon fo Saul, e fò e wun woo Davir mo NYÙY TÀR‑iì yiìn ne yòŋ. Áwune adzə̀me‑eè wiy, kér vifá ve rər, a vé‑eè dzə̀ jii,

²⁴Fo rám Juda, wír kishóv ghií waamé e nsə̀kì ntuùfú (6,800), aá kér aŋkeè wùn à kòŋ sí.

²⁵Fo rám Simeon, wáa dzə wír kishóv wiì e nsə̀kì saàmbà (7,100), a kù dzə̀ vé rər vee antav.

²⁶Fo rám Levi, wáa dzə wír kishóv ghií ntuùfú aànsə̀kìi akweè (4,600),

²⁷e lì sa Jehoyiada woo kilìmbìy ke kfəə Aaron wùn à wír vəə́ kishóv ghií saàmbà aànsə̀kìi ataár (3,700),

²⁸e bóo lì Tsadok wo yì‑iì dzəə̀n ntav, e lì sa amfòómé vee tàr wóv lav, aá dzə̀ wír nshòv sibaà e mbaà (22).

²⁹Ké rám Benjamin fo kfə́ə Sauli fəən, á wáa dzə wír ansə̀kì ataár (3,000), a kùʼùn wìr vìne‑eè tóm a dzə̀ kinyo ke Saul fo mbìy.

³⁰Fo rám Efrayim, wíri wáa dzə kishóv ghií waamé aànsə̀kìi mbaà (20,800), a dzə̀ vé rər vee antav aáwuné kfəə si.

³¹Fo kintoʼnìn ke rám Manasse, wíri wáa dzə nsə̀kì nshòv waamé e ghvə̀m (18,000), a dzə̀ ve vé‑eè shoʼtin ji á wiy, aá kóʼór Davir ji fon.

³²Fo rám Issakar, vilìmbìy vi wáa dzə ghii baà (200), e lì wír ve vé‑eè dzəə̀n aáwuné sar saʼ adzə̀m. A vilìmbìy vìn vi kù‑uù dzə̀ wír ve á kiìn ghán see réŋ se a dzə̀ wír veé Israyi wàa yiì kinyo.

³³Fo rám Sebulun, wíri wáa dzə nsə̀kì mtàn (50,000), aá kér vifá ve rər vidzə̀m, aá dzə̀ kibáʼtín ji á tóm Davir shilív shimòʼón.

³⁴Fo rám Navtali, amfòómeé wáa dzə nsə̀kì (1,000) wùn à vé rər ve vé‑eè kér aŋkeè wùn à kòŋ sí, wír nsə̀kì nshòv saàmbà e mtaár (37,000).

³⁵Fo rám Dan, wíri wáa dzə kishóv ghií ntuùfú e nsə̀kì nshòv waamé e mbaà (28,600), aá dzə̀ kibáʼtín mo dzə̀ á màʼ rə́r.

³⁶Fo rám Asher, wíri wáa dzə nsə̀kì mkweè (40,000), aá dzə̀ kibáʼtín ji dzə̀ á màʼ rə́r.

³⁷Ké wìr veé ndzə̀n Jordan, e mbìv yee fo shùy yii tó, aá dzə̀ ji rám Ruben, yé Gad wùn à kintoʼnìn ke rám Manasse ki, wír nsə̀kì kishóv mbaà é wiì (120,000), aá dzə̀ kibáʼtín wùn à vifá vév vé rər ví vidzə̀m.

³⁸Wír vìn adzə̀me‑eè wìy é Hebron mo akáŋ vév rərí dzəə̀n, aá wáy ne wáyín ji á kóʼór á Davir ji fon wo wù wáa saʼ Isray e dzə̀m réŋréŋ mo kibér ke wìr veé Isray ki‑iì kér sa kwaʼtì e mòʼón ji á kóʼór á Davir ji fon.

³⁹Áwune‑eè dzə̀ʼə̀m fó wùn à Davir vishiíy vitaár, dzə́ bèy, yíkirì, nó vifá, a kù dzə̀ ve kfə́ə sév sí‑iì fèrìn ji vé ŋkàʼ vən.

⁴⁰Rám seé Isray símóʼ sí se sí‑iì dzəə̀n kwaʼda moo yé Issakar, yé Sebulun wùn à yé Navtalìi‑iì wìy kév a dzə̀ e vifá ve yi vi, a béʼéy vimbèʼbìy wùn aàkameri, à vimbèʼbìy vé nyàmŋkoʼ vi, à vinsòŋ ve nàʼ vi. Vifá ve yi vìn vi‑iì dzə̀ vigháʼán, a ví dzə̀ jii, meŋkfəŋ, mentuʼ me *fig wo kaŋén wùn à me baŋ se *vayin se saŋèn sí, kfə̀n kér meluʼ wùn à meŋgvə́r me *oliv mè, kér sa anàʼ wùn aànjiì ve vé‑eè yíi a seerí, a kfər bìʼ kishéʼrì ke kí‑iì dzəə̀n woŋ Isray e dzə̀m.