Read Lamnso 1 Wòŋ 13 Bible Online

1 Wòŋ 13 - Lamnso bible

1 Wòŋ 13

¹Fòn Davir nèn lò, e sùŋnín e vilìmbìy ve wíri ví vidzə̀m. Wù‑uù sùŋnín wùn aàmfòómé ve á sáʼ wír nsə̀kì nsə̀kì, e sùŋnín e ve á sáʼ wíri wií wií.

²Wù màysì, e yòŋ e màŋgòŋ woó Isray e dzə̀m jii, «A kí lòo dzə e ghèén ven, e kfə̀n a dzə kinyo ke NYÙY TÀR woo Nyùy wòsən wayin kiwó sho, vèsən tsə̀nsí ri vé ntume fo afə́r vesəné woŋ Isray e dzə̀m, aá ku yiì dù, e yèn sá atàá cù wùn à wír veé ram Levìi e ntèʼ see fo áwune dzə̀kìn. Aá yíi dù, e toóy wir dzə̀m, aá wiy,

³é vèsən áwune du, e lì ŋkùv mensàŋ Nyùy wòsən, e kfə̀n shó e bàm, bìʼ fo vèsən‑eè màʼàyìn é ghan se Saul‑iì dzəə̀n fon.»

⁴Kinyo kìn ki gheén wíri féyì, á bínsí.

⁵Á bèy, Fòn Davir nèn bàʼtí wír veé Isray adzə̀m, e kèʼ fo ndzəv yee Shihor e nsay Ejiv, e dù, e meé mo á nəə e Hamat, ji á du, e wìy e ŋkùv mensàŋ Nyùy fo Kiriat‑Jearim.

⁶Fòn Davir wùn à wír veé Isray adzə̀me nèn kòʼ é Baala ji á li á ŋkùv mensàŋ Nyùy fo fo, aá kfə̀n yoŋ fó ji Kiriat‑Jearim, a dzə̀ é nsay Juda. Ŋkùv mensàŋ və̀n‑eè dzə̀, a wù kér yír a dzə̀ yé NYÙY TÀR, a kàvàʼ NYÙY TÀR dzə̀ é kitu wo, e nsàn *vifa veé yuv ve ví kér vav si.

⁷Á dù, e lì ŋkùv mensàŋ Nyùy fo Abinadav lav, e bèʼèy e kar ye fíyi. Ussa wùn Ahiyo vee wón Abinadavi nèn a dànèr nyám se sí səŋ kár.

⁸Davir wùn à wír veé Isray adzə̀me wáa dzən, a yòv e vitaáví vév ví vidzə̀m, a sheʼrí NYÙY TÀR. Vé‑eè yov luŋ, kum lúŋ, kum nshùm, kwáʼ vifá ve kwaʼán ví, kfə̀n tóŋ sóŋ.

⁹Á wìy, e mèé e Kidon riimé, nyàm bàyrìn, Ussa nèn ràmsì kiwó, e ghàr ŋkùv mensàŋ.

¹⁰Dòʼshwiiy NYÙY TÀR ŋáʼáy, wù yúyrí Ussa bìʼ kinyo ke wù‑uù mùmèn, e làʼ kiwó e ŋkùv mensàŋ. Wù ku nèn kpù fó e NYÙY TǍR si.

¹¹Kí nyár Davir e ŋàŋ ji NYÙY TÀR kì shwìíy á kilòŋ, e laàr a Ussa. Á bèy, á nèn kù a yòŋ kirə́ʼ kee shooy ji Peres‑Ussa[27] e kèʼ fo ghan fóo fèy e shem lán.

¹²Kí koóy bey e kishiíy fóo fèy, Davir wáa fàn NYÙY TÀR, a ghay ji a sà dzə̀ wun ghàn é le, e bóo lì ŋkùv mensàŋ, a dù sho e laʼ a?

¹³Wù yòʼ‑oò ló a kòŋ e lì ŋkùv mensàŋ, e dù sho e mvə̀mlaʼ ye á yoŋ ji Ŋkàlaʼ Davir[28]. Wù nèn lì, e dù sho a dzə̀ e Obed‑Edom laʼ, a dzə̀ wír woo lò fó Gat.

¹⁴Ŋkùv mensàŋ Nyùy nèn shìíy fo ŋwee e taár, NYÙY TÀR wáa səə̀vì Obed‑Edom wùn à kfə́ə rəə́, à kifá kfə́ kí kidzə̀m ke wù‑uù kérí.