Read Lamnso 1 Wòŋ 15 Bible Online

1 Wòŋ 15 - Lamnso bible

1 Wòŋ 15

¹Fòn Davir‑iì màysì, e bàʼrì lav si é ŋkàlaʼ Davir ji sə́, e nèn nàŋsín kirə́ʼ ké ŋkùv mensàŋ Nyùy, e tàm kibàn ke wù wáa tiy e mvəm wó.

²Wù nèn sùúy jii, «A dzə̀ kù bèʼèy a wír veé ram Levi cáʼ ŋkùv mensàŋ Nyùy, bìʼ fo NYÙY TÀR shoʼon a dzə̀ áwune ji á wáa beʼ, e kfə̀n a yiì lim se cù, e wìy dù, e mày.»

³Wù nèn kùm toóy ji wír veé Isray adzə̀me wàá wiy é Jerusalem, aá du, e wìy a e ŋkùv mensàŋ, e tìír a e kirə̀ʼ ke wun naŋsin ji ké ŋkùv woo shooy.

⁴Á wìy, wù nèn tòóy kfə́ə Aaron wùn à wír veé ram Levìi.

⁵A vé‑eè dzə̀ jii, Fo kfəə Kohat, Uriel wáa dzə kilìmbìy ke wíri, wír kishóv mbaà é wiì (120).

⁶Fo kfəə Merari, Asaya wáa dzə kilìmbìy ke wíri, wír kishóv mbaà é ghiì baà (220).

⁷Fo kfəə Gershon, Joel wáa dzə kilìmbìy ke wíri, wír kishóv mtaár e wiì (130).

⁸Fo kfəə Elisafan, Shemayia wáa dzə kilìmbìy ke wíri, wír ghii baà (200).

⁹Fo kfəə Hebron, Eliel wáa dzə kilìmbìy ke wíri, wír mwaamé (80).

¹⁰Fo kfəə Ussiel, Amminadav wáa dzə kilìmbìy ke wíri, wír nshòv sibaà e ghvə̀m e wiì (112).

¹¹Fòn Davir nèn kfə̀n tòóy Tsadok wùn Abiyatar vee atàá cù wùn à Uriel, à Asaya, à Joel, à Shemayia, à Eliel, à Amminadav veé ram Levi,

¹²e sùúy aáwune jii, «Vèn dzə̀ atǎr kfəə seé ram Levi. Vèn aàfə́r véné yíi *kfəmrí vitú vén, e wìy e ŋkùv mensàŋ NYÙY TÀR, Nyùy wìr veé Isray, e tiír e kirə̀ʼ ke m naŋsin ji kfə́.

¹³Vèn wáa kuumé jii, NYÙY TÀR woo Nyùy wòsən‑eè lò, e shwìíy kilòŋ bìʼ vèsən é ŋàŋ, bìʼ fo ven vee wír veé ram Levìi yòʼ‑oò ló a dzə fo, yée bèʼèy ŋkùv, a bó vèr yòʼ‑oò lo dzə̀r sá dzə́ə yee réŋ e NYÙY TÀR ye dzə̀ á keèrí, e bóo wìy sho.»

¹⁴Á bèy, atàá cù wùn à wír veé ram Levìi nèn kfə̀mrí vitú vév, e fíʼ a dzə agheénín móo dù, e bèʼèy ŋkùv mensàŋ NYÙY TÀR woo Nyùy wìr veé Isray.

¹⁵Wír veé ram Levìi toór ŋkùv mensàŋ e kimbùŋ aáwuné mbèʼ, réŋréŋ mo NYÙY TÀR‑iì yòŋèn e Mooser ji á wáa beʼ.

¹⁶Fòn Davir kfən sùúy aàtǎr kfəə see rám Levi si ji á shóʼtí á afə́r vév ámóʼó ji vé yòvi, aá wáa yòv luŋ, a kùm lúŋ sí, a kwaʼ vifá ve kwaʼán ví, é kiléŋléŋ kí wáa koʼ, a bòŋ.

¹⁷Á bèy, wír veé ram Levìi nèn shòʼ Heman woo wan Joel, e shòʼ Asav woo fər Heman wo tàr wov dzəə̀n Berekiya, e kfə̀n shòʼ Etan woo wan Kushayia fo kfəə Merari ji á wáa dànèr a vé yòvi.

¹⁸Afə́r vév ve vé‑eè tóm áwuneé‑eè dzə̀ ji Sekariya, Jaasiel, Shemiramot, Jehiel, Unni, Eliav, Benaya, Ma‑Aseyia, Mattitia, Elifelehu, e bóo lì Mikneyia, à Obed‑Edom wùn Jeyel ve yì‑iì dzəə̀n anshìy veé kirə̀ʼ ké ŋkùv mensàŋ.

¹⁹Vé yòvi, vee Heman wùn à Asav, à Etane yíi a kwaʼ viŋkwaʼ ve á fèrìn e kisha kee *brons ki,

²⁰é Sekariya wùn à Asiel, à Shemiramot, à Jehiel, à Unni, à Eliav, à Ma‑aseyia, e bóo lì Benaya, aáwune wáa kùm lúŋ nshìí, e kileŋléŋ ké Alomot[30],

²¹é Mattitia wùn à Elifelehu, à Mikneyia, à Obed‑Edom, à Jeyel, e lì sa Asasia, aáwune wáa kùm lúŋ sí réŋréŋ é kileŋléŋ ké Sheminit[31].

²²Vé‑eè shòʼ Kenaniya ji kitú ke yòv, bìʼ fo wù‑uù kiìn kinyo ke yòv feyì, a kù dzə̀ wír woó ram Levi.

²³Berekiya wùn à Elkana, e lì Obed‑Edom wùn Jehia, áwune dzə̀ wír ve vé‑eè shoʼtin ji á wáa shìy kirə́ʼ ké ŋkùv mensàŋ. Davir nèn màysì, e shòʼtí atàá cù ve vé‑eè yíi a toŋ sóŋ é mbìy ŋkùv mensàŋ. Atàá cù vìne‑eè dzə̀ Shebania, Joshafat, Netanel, Amasay, Sekariya, Benaya wùn à Elieser.

²⁵Á bèy, Fòn Davir wùn à kfə́m sé wìr seé Isray si, aàmfòómé ve á sáʼ vé rər wír nsə̀kì nsə̀kìi nèn dù, e lì ŋkùv mensàŋ NYÙY TÀR fo Obed‑Edom lav, a wìy sho, a sheʼrí,

²⁶a cù Nyùy aànàʼa saàmbà wùn à viyáʼ vi saàmbà, bìʼ fo wù‑uù géʼsin e wír veé ram Levi ve vé‑eè béʼ ŋkùv mensàŋ wun woo NYÙY TÀR.

²⁷Fòn Davir‑iì màʼ ndzə̀y, aá bá e làv woo ji fèm, a kù dzə̀ sá mo rám Levi ye yí‑iì béʼ ŋkùv mensàŋe‑eè màʼàn, vé yòvi wùn à Kenaniya woo kilìmbìy ke vé yòvi máʼ sá. Fòn Davir kfən màʼ sa shiŋkèéy shé kikum, aá bá e làv wo fəvír.

²⁸Á bèy, wìr dzə̀m woó Isray nèn a wìy e ŋkùv mensàŋ e Jerusalem, a yòv, a rəəmé, a toŋ loŋ, a toŋ sóŋ, a kwaʼ viŋkwaʼ, a kùm lúŋ mbàytì wùn à yé nshìí.

²⁹Ŋkùv mensàŋ NYÙY TÀR lòo nəə́ e Ŋkàlaʼ Davir, Mikal woo wan Saul leéy fó wundu, e yèn, a Fòn Davir ceŋ, savnìnè. Kí bír wun, wù wáa tàʼ Fòn Davir ntéŋ.