Read Lamnso 1 Wòŋ 18 Bible Online

1 Wòŋ 18 - Lamnso bible

1 Wòŋ 18

¹Shintàm shi lòo dàr, Davir kfən nə̀ə́ wír veé Filistia e rə́r sí, e tòn áwune, e màyìr sáʼ yév. Wù‑uù faàsì ŋkàlaʼ yee Gat wùn à ntèʼ see fó ghaŋ si fo áwune.

²Wù kfən tòn wír veé Moav, á wáa dzə e wun sar saʼ, a fo nshwì e wun.

³Wù kfən tòn sa Hadadeser woo fon wóo Tsoba, e mbìv wòŋ yee Hamat, a Hadadeser fəə́ ne, a dù ji wun du, e tìír a kibámmbó kfə́ é ghaa ndzəv yee Yufret.

⁴Davir faásí *viténtén vé rər fo wun, nsə̀kì, e koò vé rər veé nyàm se ŋkoʼ nsə̀kì saàmbà, e koò vee kiwuú kí nsə̀kì mbaà. Wù lèm nyám se ŋkoʼ se sí wáa sə̀ŋ viténtén wií, e nèn kìvtí kibér.

⁵Wír veé Siiria ámóʼó‑oò lòo wìy fo ŋkàlaʼ Damaskus ji á sə́ á Hadadeser woo fon woó Tsoba, Davir yúyrí áwune wír nsə̀kì nshòv sibaà e mbaà.

⁶Wù nèn lèm vé rərí aáwuné wòŋ, e viliŋ viliŋ, á nèn a dzə e wun sar saʼ, a fo nshwì e wun. Mo Davir‑iì ghán, maʼ rə́r bey, NYÙY TÀR kú a yiì, wù wáa tòn vitúm vidzə̀m tónen.

⁷Wù faásí aŋkeè vee *kisha ke mbàm ke baar kí, ve atǎr ntoʼ Hadadeseri‑iì béʼé, e nèn dù sho e Jerusalem.

⁸Wù kfən faàsì sa kisha kee *brons kigháʼán fó Tibhat wùn à fó Kun, a dzə̀ ŋkà se laʼ se Hadadeser‑iì sáʼá. Dzə̀ kíwun ke Solomon‑eè liìn, e fèr màkìghìn wùn à vitóm vi, à vifá ve ker vi shó.

⁹Towu[32] woo fon woó Hamat yú ji Davir tòn ne a mànjòŋ Hadadeser woo fon woó Tsoba e dzə̀m,

¹⁰e nèn tsə̀nsí wán və woo Hadoram ji wù du, e bùn a Fòn Davir, e beèrì a wun fo rər se wù màʼàn, e tòn a Hadadeser wo wùn wun woo Towu‑uù sí maʼ rə́r. Hadoram wáa dù bèy, a ker vifá ve tàr wov‑iì tsənsin vímóʼ ví, aá fér e kisha ke mbàm ke baar kí, vímóʼ ví, vee kisha ke mbàm ke fəvír kí, vímóʼ ví, vee kisha kee brons ki.

¹¹Fòn Davir lì vifá vìn, e fò e NYÙY TÀR ji cu réŋréŋ mo wù‑uù foon kisha ke mbàm ke fəvír kí wùn à ke baar kí, ke wù‑uù faàsìn fo vitúm ve wù‑uù tònèn ví, a ví dzə̀ ji Edom, Moav, Ammon, Filistia, e lì Amalek.

¹²Abishay woo wan Tsəruyia‑aà lóo fùnèn wír veé Edom e Kiwoóy ké Shiŋgwaŋ, e yùyrí wíri nsə̀kì nshòv waamé e ghvə̀m.

¹³Wù‑uù lèm vé rərí woŋ Edom e dzə̀m. Wír veé Edom adzə̀me nèn a neŋ e Fòn Davir sar saʼ. NYÙY TÀR kù‑uù yii, a Fòn Davir ton vitúm vidzə̀m tónen fo wù‑uù maʼ rə́r.

¹⁴Á bèy, Davir wáa saʼ woŋ Isray e dzə̀m, a yiì vinyo e wìr dzə̀m réŋréŋ là kiloʼ.

¹⁵Joav woo wan Tsəruyia wáa dzə mfòómé, Jehoshafat woo wan Ahilud wáa dzə taà ntoʼ wo wù fiʼtì sáʼ fòn.

¹⁶Tsadok woo wan Ahituv wùn Ahimelek woo wan Abiyatar‑iì dzə̀ atàá cù, a Shavsha dzə̀ ji ŋgaà saŋ woó ntoʼ.

¹⁷Benaya woo wan Jehoyiada wáa dzə kitú ke vé rər ve vé‑eè shiy Fòn Davir, a wón Daviri dzə̀ kév atǎr ntoʼ.