Read Lamnso 1 Wòŋ 21 Bible Online

1 Wòŋ 21 - Lamnso bible

1 Wòŋ 21

¹Satan‑eè lòo tàʼ ji wun maʼ á ŋgeʼ e wír veé Israyí kitu, e nèn bàyír Davir ji wù táŋ á wír veé Isray.

²Davir nèn sùúy e Joav woo mfòómé wùn à ámóʼó vee amfòómeé jii, «Vèn du, e tàŋ wír veé Israyi, e kèʼ fo Beersheba, e dù, e meé e Dan, e wìy, e sùúy e mò, é m kiíy mo á dzəə̀n.»

³Joav bùn fon, e sùúy jii, «Mo wíri fə̀m dzəə̀n anín bèn, NYÙY TÀR ku kfə̀n dzə̀sì a ámóʼó bey kirə́ʼ wií. Taàtá wom woo fon, kí áwune sà kù dzə̀ aŋgaà və́ lìm a? Sà yiì ka, é bo taàtá wom wáa tàʼ ji wun yii kin kee kinyo a? Á sà taʼ ji á wiy e lòné e Isray kitu bèn ji ka á?»

⁴Fòn ku nèn ŋwày kinyo ke Joav ŋwáyín. Joav nèn fəə̀ fó ntoʼ, e dù, e ghàn woŋ Isray e dzə̀m, e kfə̀n é bàm é Jerusalem,

⁵e nèn naàrì e Fòn Davir mo á taŋen wíri, á wáa dzə. Veé Isray ve yì‑iì dzə̀ á màʼ rə́rí‑iì dzə̀ nsə̀kì kishóv e wiì e dzə̀ (1,100,000), a veé Judàa dzə̀ nsə̀kì kishóv msaàmbà e ghiì kweè (470,000).

⁶Mo Joav yòʼ‑oò tíy e kinyò ke fòn kì yòŋèn, la wù yòʼ dzəə tàŋ rám Levi wùn à yé Benjamine.

⁷Kinyo ke fòn‑eè yòŋèn kin ki‑iì bìr Nyùy e ŋàŋ, wù nèn màʼ ŋgeʼ e Isray kitu.

⁸Davir wáa toŋ e Nyùy jii, «Kinyo ke m yiìn kin ki dzə̀ jay wo tavín. Ké lèn ki, m lón wò ji à ku làysìn a jay ŋgaà lìm wò. M kì yiì kinyo kìn e kiyúŋ kí.»

⁹NYÙY TÀR nèn sùúy e Gad woo ŋgaà si Davir[35] ji

¹⁰wù du, e sùúy e Davir a jii, «Wun woo NYÙY TÀR fò wun a vinyo vitaár ji wù shóʼ á kee kimòʼón ki, ke wun yii á e wun.»

¹¹Á bèy, Gad nèn dù, e yèn Davir, e sùúy sho ji NYÙY TÀR yoŋ a jii, «Shóʼ ké ki.

¹²À shòʼ a dzə̀ jíŋ ye yì koó viyá vitaár, moo jum ye aŋgàa vibàn vée wáa jùm wò, a bivír vifá vé e bǎm ŋwee e taár, mo bòŋ ke NYÙY TÀR nəə́ wò e nyùy rə rə̀r vishiíy vitaár, e màʼ kifə̀ʼ e wò wòŋ, é nshìylav rə wiy e kpúu woŋ Isray e dzə̀m a? M du, m bìnèr e NYÙY TÀR ji ka?»

¹³Fòn Davir suúy e Gad jii, «M sì é ŋgeʼ ye tavín. NYÙY TÀR yii shám mendzən feyì. Bòŋ é wù yii ke wú‑úù yii e mò, e shaà ke yii wír.»

¹⁴NYÙY TÀR nèn tsə̀nsí kifə̀ʼ e Isray, áwune kpúkír wír nsə̀kì msaàmbà (70,000).

¹⁵Wù kfən tsə̀nsí nshìylav rə ji yì laar á Jerusalem. Mo yì duùn ji wun waà sí laarì, Nyùy nèn kfə̀n rə̀m ntéŋ bìʼ kilày, e sùúy e nshìylav rə ye yì‑iì laar wíri jii, «Yuúrí, gheén lèn.» Wù wáa suúy bèy, a yì sí tíy e ghaa riimé wo dzəə̀n wó Ornan woo wir Jebus.

¹⁶Fòn Davir lòo nàn sí, e yèn a nshìylav NYÙY TÀR tíy e shwer, a yì shóʼ ne nyùy rə̀r, a kìʼ Jerusalem sho. Á bèy, wùn à vilìmbìy ve wíri ví tsə́m ndzəə́, e làʼ kitú fo nsay, aá máʼ vinsàʼ ve ndzə̀y.

¹⁷Fòn Davir nèn a bùnrì jii, «Éè Nyùy, kí yì‑iì yòŋ mo ji á táŋ wíri? Jày mo jay və̀n, yiì mo kinyo ke bi kin. Vin vee wíri jày kév ka? Á dzə̀ kév moo njiì. Kii wò, NYÙY TÀR, ku màʼ ŋgeʼ rə̀n, a dzə̀ e vèr à kfə́ə yémé kitu.»

¹⁸Á bèy, nshìylav NYÙY TÀR yòŋ e Gad ji wù suúy á e Davir ji wù kóʼ á e Ornan woo wir Jebus riimé, e bòm á kíy cù NYÙY TÀR fó.

¹⁹Fòn Davir ku nèn yùnín ji Gad, e kòʼ fó mo NYÙY TÀR kì tumen Gad, wù wíy, e tiìsí.

²⁰A Ornan wùn à wón və́ vee akwèe kì búʼ sáŋ é riimé, wù lòo nàn sí, e yèn nshìylav Nyùy, wóné léʼ, e lìr.

²¹Mo Davir loòn, a dù fo Ornan wùn, Ornan lòo leéy, e yèn Davir, e nèn lò fo riimé, e tsə̀m ndzəə́, e làʼ kitú fo nsay e Davir si.

²²Davir yòŋ e Ornan jii, «Fiìnè riímé wó və̀ne, e mò, é m bóm kíy cù wóo cù NYÙY TÀR shó, ji kifə̀ʼ ke kí gbuùn e wír vémé kitu kìn ki sà‑áà may á. M lo, e yun e kav woo réŋ.»

²³Ornan suúy e Fòn Davir jii, «Fòn ku lì a vifá ve ví gheenen wun, e cù a Nyùy sho. Ambòŋe waà víne ve dzə̀ á yiì á cu ye tonèné shó, a vimbuʼ vi waà víne sa ve dzə̀ á lì á ji meŋkaʼ. Sáŋé waà rə́ne ye á yii á cu vifa ve yi sho. M fò á ne vifá vìn vidzə̀m e fòn.»

²⁴Fòn sháʼnín e Ornan jii, «Àáy, m lo, e yun yunén. Yòʼ dzə̀ m lì kifá ke yòʼ dzəə̀n kém, a fo e NYÙY TÀR. Yòʼ dzə̀ m cù NYÙY TÀR woo Nyùy wom e cu ye tonèné, a dzə̀ e kifá ke yòʼ dzəə̀n ndzəʼnìn sém kí.»

²⁵Wù yòŋ bèy, e nèn làʼ riímé Ornan və̀y e *kisha ke mbàm ke baar kí *ashekel ghií ntuùfú.

²⁶Fòn Davir nèn bòm kíy cù NYÙY TÀR fó, e yiì cu ye tonèné wùn à yé kikòŋnìne shó. Wù bùnrì, NYÙY TÀR yú bunrì rə́, e tsə̀nsí və́y fó yuv, wú tòn cu ye yí‑iì dzəə̀n é kiy cù.

²⁷NYÙY TÀR nèn yòŋ e nshìylav rə ji yì siir á nyùy rə é kiburúʼ, yì nèn siìr.

²⁸Mo Davir dzə́ e Ornan woo wir Jebus riimé fey, e lò yèn ji Nyùy yù ne a bunrì rə́, wù nèn a yiì cu si fó.

²⁹Yì‑iì dzə̀ é ghan sin, a kibàn ké NYÙY TÀR ke Mooser‑iì bàʼrìn é woʼ kí dzə̀ é Gibeon, a *kíy cù woo wó cù ye tonèné kù dzə̀ sá fo.

³⁰Yii bèy, la Fòn Davir yòʼ dù fo e ghan fen ji wun cu Nyùy, bìʼ fo wù‑uù fan nshìylav NYÙY TÀR ye yì‑iì tíy, kér nyùy rə̀r.