Read Lamnso 1 Wòŋ 22 Bible Online

1 Wòŋ 22 - Lamnso bible

1 Wòŋ 22

¹Fòn Davir nèn sùúy jii, «Féne dzə̀ fo lav Nyùy, wun woo NYÙY TÀR yíi a tiy, à kíy cùu wo wír veé Israyi wáa tòn cu si shó.»

²Fòn Davir nèn lò, e fò sáʼ ji viŋgwìy ve ví dzə́ e nsay Isray vi wàá báʼtí. Á báʼtí, wù shóʼ wír ve á wáa naŋsín tíy, a shèr, ye á yíi a bàʼrì lav cù sho.

³Wù‑uù fò kisha nyanyày, ji á wáa fèr a mban si wùn aàŋkoytì veé shuù se kày sho. Wù kfən fò kisha kee *brons, a kí kúʼ ke bó yòʼ‑oò dzə̀ á yù fóo fìʼ vidzəəsì və́.

⁴Wù‑uù fò sá vicí vee *sidar vinín ve bó yòʼ‑oò dzə̀ á tàŋ, bìʼ fo wír veé Sidon wùn à veé Tayàa‑aà foon ne wun vicí vee shoon vighaágháʼán.

⁵Fòn Davir‑iì báʼti bèy, rəm jii, «Wan wom Solomon dzə̀ə́ e térí, a wù yòʼ sí kér vifií, a lav cù ye wù wíy bàʼrì kér fó a dzə ye wiiwíy, aá wáa yuʼnín, é vitúm vidzə̀m vi wáa leéy, a kòŋ. Bo kí bòŋ ji m báʼtí á vifá ve kibàʼrì.» Á bèy, Fòn Davir nèn bàʼtí vifá ve lìm vighaágháʼán, e bóo wìy a lày.

⁶Fòn Davir yiì lò, e tòóy wán və Solomon, e wày kibaʼrì ke lav NYÙY TÀR woo Nyùy wìr veé Isray e wun kiwo.

⁷Wù‑uù yòŋ shó jii, «Wan wòm, mò‑oò sí kér e mǒ kwàʼtì ji m wíy bàʼrì a lav ye á wáa cù NYÙY TÀR woo Nyùy wom shó.

⁸Yii bèy, NYÙY TÀR suúy e mò jii, wun lèéy ne a kitú ke nsay, e yèn á rə́r se ghaʼtín sí se mò‑oò màʼàn, e yùyrí wíri anín, mensə́ mev mè leém e wun si. Wun nen yèn ji yòʼ dzə̀ kfə̀n bàʼrì a mo lav ye á wáa cù a wun sho.

⁹Nyùy kfən sùúy e mò ji m wàá yuúrí, e yù, m wíy dzəə́ a wán lumèn wo wíy a dzə a wir nyaáŋ. Wun wíy fo a wun nyaáŋ e wun mvə̀m saʼ, é la aŋgàa vibàn vəə́ yòʼ wìy a nəə́ a wun e rə́r sí. Yír rəə́ wíy a dzə a Solomon[36], bìʼ fo wun wíy fo a Isray nyaáŋ, aáwune wáa dzə là kinyo ké a fàn e ghan se wù sáʼá.

¹⁰Wíy bàʼrì a wun lav ye á wíy a cù wun woo Nyùy sho. Wù wíy a dzə a wán və, é wun wáa dzə a tàr wov. Wun wíy yiì, é sáʼ rəə́ tuúy é Isray, e wìy dù, e jòʼsì.»

¹¹Fòn Davir kú a shaà fo mbìy, a suúy jii, «Wan wòm, NYÙY TÀR kú a dzə vèn wun. Wù ku yiì, áà baʼri lav rə, wun woo Nyùy wò, kù mo wù‑uù suuyin ji à waà wíy bàʼrì.

¹²NYÙY TÀR ku fò wò vifií wùn à kiíyi, áà fiʼ wìy a lèm nsər se wun woo NYÙY TÀR woo Nyùy wò e ghan se wù wíy lèm wò ji à wáa saʼ Isray.

¹³Aà lò, a yu sáʼ NYÙY TÀR, a jùmrì vinyo ve wù tinen, e fò e Isray, e shaà fo Mooser, bo vinyo vé vi yíi a ghan kijuŋ. Kúr tímé, e wày ŋàŋ. Lá à yòʼ a fàn. Lá à yòʼ a weèy.

¹⁴«M dzə̀ a m wáy ŋàŋ ji m koóy á vifá ve kibàʼrì ke lav NYÙY TÀR. *Kisha ke mbàm ke baar kí sì aton kishóv ghii kweè aànsə̀kìi ataár (3,400), ke fəvír kí aton nsə̀kì nshòv sikweè e mtaár (34,000), kisha kee brons wùn à kisha kee kiy ki kighaágháʼán, ke yòʼ dzə̀ á fìʼ vidzəəsì və́. Vicí wùn à tíyí wáa dzə sa e gháʼán. À wíy dzə̀sì vímóʼ vee vifá sho.

¹⁵Vé lìme sì aneénín. À sí kér wír ve á wíy a shèr tíy, kér vé kimbome, kér vé kintaa, kér ve á kiìn lím kiwo ve yòʼ dzə̀ á tàŋ, e tòʼ. Áwune yíi a lìm lim

¹⁶e kisha ke mbàm ke baar kí, a lìm e ke fəvír kí, a lìm e kee brons ki, a lìm e kisha kee kisha ki. Kèʼ líme lèn, a lìm. NYÙY TÀR kú a dzə vèn wun.»

¹⁷Fòn Davir lò, e fò sáʼ ji vilìmbìy veé Isray vi wàá tóm á Solomon,

¹⁸e sùúy aáwune jii, «NYÙY TÀR woo Nyùy won dzə̀ vèn áwune. Wù fò ne ven nyaáŋ mbìv sidzə̀m. Wù wày ne wír veé wòŋ fèn ve dzəə̀n vé nsayi e mǒ kiwo, m tón áwune, nsay yev kfə́n ji ye NYÙY TÀR wùn à wír vəə́.

¹⁹Lèn və̀n, vèn tiír vifií vén wùn à shilív shén shí a dzə̀ e NYÙY TÀR woo Nyùy wón wùn. Vèn keʼ, a bàʼrì lav cù Nyùy, wun woo NYÙY TÀR, aá fiʼ lì ŋkùv mensàŋ NYÙY TÀR wùn à vifá ve cù vee jeéy ví, e wìy sho e lav cù ye á lo, e bàʼrì, a cù NYÙY TÀR shó.»