Read Lamnso 1 Wòŋ 26 Bible Online

1 Wòŋ 26 - Lamnso bible

1 Wòŋ 26

¹Vé‑eè jàv anshìy veé lav cù aàkáŋ aàkáŋ, aá dzə̀ jii, fo kfəə Kora, vé‑eè kér Meshelemia woo wan Kore, Kore woo wír fo wón Asavi.

²Meshelemia‑aà kér wón, aá dzə̀ jii, Sekariya woo wan mbìy, wùn à bám sə́ sí see Jediyael, Sebadiya, Jatniel,

³Elam, Jehohanan, e lì Elihonay woo wan bàm.

⁴Wùmòʼ woo nshìy‑iì dzə̀ Obed‑Edom. Wù‑uù kér wón, aá dzə̀ jii, Shemayia woo wan mbìy wùn à bám sə́ see Jehosabad, Joa, Sakar, Netanel,

⁵Ammiel, Issakar, e lì Pewuletay. Adzə̀me‑eè dzə̀ wír waamé mo Nyùy‑iì səə̀vìn Obed‑Edom sho.

⁶Wan Obed‑Edom woo Shemayia‑aà kér wón a dzə̀ atǎr kfəə vee áwuné ram, bìʼ fo dzəə̀n wíri, a vé‑eè shwìr féyì.

⁷Áwune dzə̀ jii, Otni, Refael, Obed, Elsabad, e lì afə́r veé laʼ vee Elihu wùn Semakia, a dzə̀ wíri, a vé‑eè shwìr sá feyì.

⁸Vin adzə̀me dzə̀ wón Obed‑Edom. Áwune wùn à wón véví, aàfə́r véví‑iì ghèén féyì fó yiì lim rə̀n, aá kfə̀n wáy ŋàŋ. Áwune adzə̀me‑eè dzə̀ wír nshòv sibaà e mntuùfú.

⁹Kaŋ Meshelemia‑aà dzə̀ wír nshòv waamé e ghvə̀m, ámóʼó wón və́, ámóʼó veé laʼ, aàdzə̀me gheén féyì fó yiì lim rə̀n.

¹⁰Fo kfəə Merari, yì‑iì dzə̀ Hosa. Wan və wùmòʼ dzə̀ Shimri, a dzə̀ wo wù‑uù lèmèn ji kilìmbìy fə̀m mo bó yòʼ‑oò dzəə̀n wan mbìy.

¹¹Wón Hosa ámóʼó‑oò dzə̀ jii, Hilkia wùn à Tebalia, à Sekariya. Wón Hosa wùn aàfə́r vév veé laʼa‑aà dzə̀ wír nshòv sitaár e ghvə̀m.

¹²Vé‑eè jàv anshìy veé lav cù aàkáŋ aàkáŋ mo atǎr kfəə véví‑iì dzə̀kìn. Kfəə́ yee shóo kù‑uù kér sa rə́ yee lim e NYÙY TǍR lav, kù réŋréŋ mo wír veé ram Levi ámóʼó‑oò kérí.

¹³Vé‑eè shwèŋ shuu se kày shwéŋén, e bóo fo woo shó e kfəə́ yee shóo, kìn dzə̀ ye terií, kìn dzə̀ ye kuʼùné.

¹⁴Vé‑eè shwèŋ shúu kày woó mbìv yee fo shùy yii tó, wú koó kiwuú ké Shelemia. Á shwéŋ wó wan və woo Sekariya, fuú koó shúu kày woó mbìv yee kuy. Sekariya və̀n kfə̀n‑eè dzə̀ ŋgaà ntir woo fií.

¹⁵Á shwéŋ wó Obed‑Edom woo shúu kày, nèn fəə̀sín woó mbìv yee tsə́n. Á shwéŋ anshìy veé kitàv, kí koó kiwuú ké won və́.

¹⁶Á shwéŋ shúu kày woó mbìv yee fo shùy yii nəə wùn à wo á yoŋ ji Shalleketi, wo wú dzəə̀n é dzəə ye yì kóʼ koʼón, fuú koó kiwuú ké Shuppim wùn Hosa. Vé‑eè jàv ghán sé lìm se anshìy réŋréŋ, akày limè, á nèn fò kilíŋ aàkàyi.

¹⁷E mbìv yee fo shùy yii tó, anshìyi‑iì lo, á wàa dzə e kishiíy, wír ntuùfú, a dzə e mbìv yee kuy wír akweè e kishiíy, a dzə e mbìv yee tsə́n wír akweè sa e kishiíy. Anshìy veé kitàví‑iì lo, á wàa shìy fó abaà abaà.

¹⁸Fo dzəə̀ nəə e maàndzə, e mbìv yee fo shùy yii nəə, anshìyi‑iì lo, á wàa tiy fo akweè, veé maàndzəə wàa tiy abaà.

¹⁹Á mo akáŋ wìr ve vé‑eè shiy lav cùu‑uù dzəə̀n, aá fəə́ fó kfəə Kora, e fəə̀ fo yé Merarìi.

²⁰Wír veé ram Levi ámóʼó‑oò[38] leey fo vitàv veé lav cù, kfə̀n leey fo vitàv vé vifa ve vé‑eè shoʼtin, e lèm jeéy ji vé Nyùy.

²¹Wír vee kfə́ə Ladane dzə̀ rám Gershon. Wír vév ve dzəə̀n atǎr kfəə dzə̀ jii, Jehiyeli,[39]

²²e lì wón və́ vee Setam wùn Joel. Yì‑iì kiiy áwune kinyo kee kùm vitáv vee NYÙY TǍR lav.

²³Vé‑eè jàv sá lim si e wír ámóʼó vee lò fó kfəə yee yé Amram, à yé Ishari, à yé Hebrone, e lì yé Ussiel.

²⁴Shebuel woo ràm fo Gershom woo wan Mooser‑iì dzə̀ kitú fo wír ve vé‑eè leey fo vitàví.

²⁵Wír veé kfəə Elieser woo fər Gershome‑eè dzə̀ Rehabia, Jeshayia, Joram, Sikri, e bóo lì Shelomit.

²⁶Shelomit wùn aàfə́r vəə́‑əə̀ leey fo vitàv vidzə̀m fo vé‑eè lèmèn vifá vee jeéy vé Nyùy. A yì‑iì lèm Fòn Davir wùn aàtǎr kfəə, aàmfòómeé. Amfòómé vin ámóʼó‑oò dzə̀ ve vé‑eè sáʼ wíri nsə̀kì nsə̀kì, aámóʼó sáʼ wíri wií wií, é bo ámóʼó wáa dzə ve vé‑eè tatin mànjòŋ e dzə̀m, a saʼ.

²⁷Vé‑eè lì vifá ve vé‑eè kuuyin fó kwaʼ rər, e lèm ji vifá vee jeéy ví ve á wáa naŋsín lav NYÙY TÀR shó.

²⁸Shelomit wùn aàfə́r vəə́ kfə̀n‑eè leey sa fo kifa kidzə̀m keé lav cù ke vé‑eè lèmèn ne jeéy ji ké Nyùy. Vifá vìn vímóʼ ví‑iì dzə̀ ve yì‑iì foon Samuel woo wir si wùn à Saul woo wan Kish, à Abner woo wan Ner, à Joav woo wan Tsəruyia.

²⁹Vé‑eè shòʼ Kenaniya wùn à wón vəə́ fo Ishar kfəə ji áwune wáa leéy a fo vinyò ve wòŋ, e kfə̀n a tinén a nsaʼ se wìr veé Isray.

³⁰Vé‑eè shòʼ Hashabia wùn aàfə́r vəə́ fo Hebron kfəə kishóv ghií saàmbà e nsə̀kì (1,700), a dzə̀ wír ve dzə̀ á yiì lim. Áwune‑eè leey fo vinyò vee kùm Nyùy, kfə̀n leey fo vinyò veé wòŋ, e mbìv wòŋ yeé ndzə̀n Jordan, e mbìv yee fo shùy yii nəə.

³¹Kimfèr ke kfəə Hebron mo yí dzəə̀n, kìn mo áwune dzəə̀n é melav melav, kí din ji Jeria dzə̀ á kitú kév. Yì‑iì dzə̀, a Fòn Davir sí sáʼ ji kiyá mkweè, á nèn lò, e kèʼ a tàr mo kfə́ə Hebrone‑eè dzəə̀n, e yèn a vé rər ve tavkíné‑eè dzə̀ wír veé kfəə fèn, aá dzə́ e Jaser, e mbìv wòŋ yee Gilead.

³²Fòn Davir nèn shòʼ Jeria wùn aàfə́r vəə́, wír kishóv ghií saàmbà aànsə̀kìi abaà (2,700). Áwune adzə̀me dzə̀ wír ve yì‑iì dzə̀ á yiì lim, a kfə̀n dzə̀ atǎr kfəə. Wù nèn lèm áwune, á wáa saʼ rám Ruben wùn à yé Gadi, à kintoʼnìn ke rám Manasse ki ji á wáa kwàŋrì vinyo vee kùm Nyùy, à vee kùm woŋ vi.