Read Lamnso 2 Wòŋ 12 Bible Online

2 Wòŋ 12 - Lamnso bible

2 Wòŋ 12

¹Sáʼ Rehoboame‑eè tùúy, e tàv, wù nèn lò, e màʼày Nsər NYÙY TÀR, wír və́ adzə̀me[12] jùmrì wun.

²Fòn Rehoboam sáʼ, kí meé viyá vitàn, Fòn Shishak woó Ejiv nəə́ Jerusalem e rə́r sí. Kí‑iì kòóy ben, bìʼ fo wír veé Judàa yòʼ‑oò lo kfə̀n a tiy e NYÙY TǍR wùn.

³Fòn Shishak‑iì nə̀ə́ rə́r, a wù kér *viténtén vé rər kishóv ghii baà e nsə̀kì (1,200), wùn à vé rər veé kitu ke nyàme wír nsə̀kì mntuùfú (60,000), e bóo lì vé rər ámóʼó là táŋ, aá ló fó Ejiv, Libiya, Sukkim, à fó Etiopia[13].

⁴Wù nəə́ bey, e tòn ŋkà se laʼ see vikum seé Juda, e nèn wìy e Jerusalem.

⁵*Ŋgaà ntum Nyùy woo Shemayia nèn wìy, e yèn Fòn Rehoboam wùn à vilìmbìy veé Juda vi, aá báʼtí é Jerusalem, bìʼ fo vé‑eè fan Shishak. Wù suúy aáwune ji NYÙY TÀR suuy a jii, «Vèn màʼày ne mo, m shwéy ven e Shishak.»

⁶Fòn wùn à vilìmbìy vi nèn biìmé jay wov, a suúy jii, «Kinyo ke NYÙY TÀR yiìn kí dzə̀ tìítiy.»

⁷NYÙY TÀR yén ji á biìmé ne a jay wov, e nèn sùúy e Shemayia jii, «Mo áwune biimen ne jay wov, bo bó m yòʼ dzəə́ lo, e laàr áwune. M yíi yiì, é shwéri tó aáwuné wùn shishàr. M yòʼ yíi màʼ ŋgeʼ aáwuné kitu mo dòʼshwíiy wom kì lò, wù wàa dzə, e yiì, é Shishak laar áwune láarin.

⁸Yii bèy, wù yíi tòn áwune, lóo saʼ, aáwune nèn kìíy jeéyjeey lìm yé a lim fo fòn kitum, à yee lìm fo mò woo NYÙY TÀRí.»

⁹Shishak woo fon woó Ejiv‑iì wìy, e nə̀ə́ Jerusalem e rə́r sí, e kùúy káv woo NYÙY TǍR lav wùn à woó ntoʼo. Wù‑uù lì kifá kidzə̀m, e dù sho, e lì sa aŋkèe rər ve Fòn Solomon‑eè fèrìn e *kisha ke mbàm ke baar kí.

¹⁰Fòn Rehoboam nèn sìíy, e fèr lèn a dzə̀ aŋkeè vee kisha kee *brons ki, á lì kirə́ʼ ké viy. Wù lì vee shooy, e fò e vilìmbìy ve nsheèlav se sí‑iì shiy shúu kibùʼ woó ntoʼo.

¹¹Fòn‑eè lóo dù e NYÙY TǍR lav, anshìyi kù bèʼèy, a tsəəné wun sho, du bèy, á kfə̀n shó e bàm, e nèn siìr e kitàv ké anshìy.

¹²Á bèy, mo Fòn Rehoboam borin e NYÙY TǍR si, dòʼshwiiy NYÙY TÀR nèn rə̀sìn, la wù yòʼ dzəə màʼtì ji á laar á Juda, e sə̀ʼsí. Vinyo veé Juda vi nèn kù a ghan kijuŋ.

¹³Fòn Rehoboam‑eè sìysì sáʼ rə́ é Jerusalem, yí táv, e nèn kù a saʼ vifon fo Jerusalem fèn, woo ŋkàlaʼ ye NYÙY TÀR‑iì shoʼon ji rə́ə fó mvə̀m ràm seé Isray sidzə̀m. Vé‑eè kóʼor wun, a wù dzə̀ kiyá nshòv mòʼón e mkweè. Wù sáʼ kiyá nshòv saàmbà e ghvə̀m. Yír yè woví‑iì dzə̀ Naama, a dzə̀ wan wìr Ammon.

¹⁴Wù‑uù yii vinyo ve bi ví, bìʼ fo wù yòʼ‑oò ló a ker shií wó a beè NYÙY TÀR.

¹⁵Ké vinyò vímóʼ ví vee Fòn Rehoboam mvə̀m saʼ, vee kèʼ fó kèʼ, e dù, e màysì, á sàŋ é Ŋwàʼ Vinyò woo wó Shemayia woo ŋgaà ntum Nyùy, e sàŋ vímóʼ ví é Ŋwàʼ Iddo woo ŋgaà si. Fòn Rehoboam wùn Fòn Jeroboam kù‑uù dzə́, maʼ a dzə̀ rə́r, là meemè.

¹⁶Fòn Rehoboam wìy lày, á lìtì wun e Ŋkàlaʼ Davir. Abija woo wán və nèn yì vifon, a saʼ e tàr wóv ntaʼ.