Read Lamnso 2 Wòŋ 13 Bible Online

2 Wòŋ 13 - Lamnso bible

2 Wòŋ 13

¹Vé‑eè kòʼór Abija ji fon woó Juda, a dzə̀ kiyá ke Fòn Jeroboam‑eè sí sáʼ Isray ji kiyá nshòv waamé e ghvə̀m.

²Wù‑uù sàʼ vifon viyá vitaár, a wù dzə́ e Jerusalem. Yír yè woví‑iì dzə̀ Mikayia woo wan Uriel woó Gibea. Rə́r sí‑iì gbù e Abija wùn Jeroboam nsàn,

³Abija fəə́ é shùu rər wùn à wír ve yì‑iì dzə̀ á màʼ rə́rí, aá dzə̀ ansə̀kì ghii kweè (400,000), a Jeroboam taáme wun e vé rərí ansə̀kì ghií waamé (800,000).

⁴Vé rərí wìy, e tàrnín e wòŋ agwan woo Efrayim, Fòn Abija kóʼ é gwan Tsəmarayim, e jàŋ fo fo kitávín jii, «Óò Jeroboam, yuúrí oò. Wír veé Isray, vèn yuúrí kinyo ke m suuy ki.

⁵Vèn kuúmé ji NYÙY TÀR woo Nyùy wìr veé Isray‑iì gwàr *mensaŋ me shiŋgwaŋ wùn Davir me bó yòʼ dzə̀ á shòʼór, a mè dzə̀ jii, Davir wùn à rám rəə́ wíy a saʼ a Isray, e wìy dù, e mày.

⁶Yii bèy, Jeroboam woo wan Nebat wo yì‑iì dzəə̀n wánlè Fòn Solomon nèn lò, e tàv kitú fo tàr wov Solomon woo wan Fòn Davir.

⁷Viŋgáʼ ve wìr ámóʼó ve ví kér bvə́m ŋgeʼ vi nèn bàʼtí, a tom Jeroboam, wùn áwune wáa meŋ sáʼ Rehoboam woo wan Solomon, a wù dzə̀ə́ wánlè, a bó wù yòʼ sí kér vitaáví vée shèm áwune.

⁸Vèn kwaʼtì rú ji dzə̀ vèn mèŋ sáʼ vifòn ye NYÙY TÀR wayin e wón Davirí kiwo a? Vèn kwaʼ ji dzə̀ vèn mèŋ, bìʼ fo vèn dzəə̀n nyanyày, a vèn kfə̀n kér mebvə̀m mee wón nàʼ me Jeroboam fèrìn e *kisha ke mbàm ke baar kí ji anyùy vén a?

⁹Vèn‑eè jùm atàá cù, áwune vee wón Aaron, e jùm wír veé ram Levi, e nèn shòʼtí vén vee atàá cù, kù mo vitúm vee věn ghaŋ vi yii. Wìr wiy ji á yóʼ wun, a fə̀m dzə̀ la, a wù kér nyam cù yee nàʼ woo lumèn, kìn viyáʼ saàmbà, vèn nèn kù lèm wun ji taà cù anyùy kisaŋ vìn.

¹⁰«Yii bèy, fo kér kí, NYÙY TÀR dzə̀ Nyùy wor, a bó vèr yoʼ màʼày wun. Vèr kér atàá cù ve dzəə̀n wón Aaron, aá lim fo NYÙY TÀR, kfə̀n kér wír veé ram Levi ve á tóm áwune.

¹¹Áwune cu NYÙY TÀR vijàvndzə vidzə̀m wùn aàŋkuùri, e cu se tonèn sí, à kiláy ke kí rəm, rəʼtìn ki. Aáwune kfə̀n siysì kibán ke cù, neer e kidàŋ ke á *kfəmrin, kí rán. Lóo dzə aŋkuùr adzə̀m, áwune sə̀ʼtì lam se sí tíy e vitiir vee kisha ke mbàm ke baar kí. Ké ru kí, vèr yii kinyo ke NYÙY TÀR woo Nyùy wor yòŋèn, yii bèy, vèn màʼày ne kén wun máʼayin.

¹²Vèn leéy, Nyùy dzə̀ vèr áwune, a shém wun mbìy. Atàá cù vəə́ dzə̀ kibáʼtín fó toŋ sóŋ, é vèr nəə́ ven e rə́r sí. Ven veé Isray, lá vèn yòʼ a fùnèn NYÙY TÀR wo dzəə̀n Nyùy atàr vén, bìʼ fo vèn yòʼ yíi so.»

¹³Abija wáa suŋnín bèy, a Jeroboam tsə́nsí ne vé rər ámóʼó ji á du, a nəə́ a wír veé Juda fo bàm, é wùn à ámóʼó nèn a nəə́ a dzə̀ fó mbìy.

¹⁴Wír veé Judàa nèn sàsìn, e yèn, a rə́r sí sí nəə áwune, à fó mbìy, à fó bàm, áwune nèn tòŋ e NYÙY TÀR ji wù sə́ á áwune. Atàá cùu nèn tòŋ sóŋ sí,

¹⁵wír veé Judàa yòv mànjòŋ, rə́r sí nèn tsə̀ŋén. Nyùy tón Jeroboam wùn à wír veé Israyi adzə̀m, á bvəə́rí e Abija wùn à wír veé Judàá mbìy.

¹⁶Wír veé Israyi kèʼ kileʼ, wír veé Judàa wáa jùm áwune. Á bèy, Nyùy nèn wày áwune e wír veé Judàá kiwo.

¹⁷Fòn Abija wùn à və́ vé rərí neèr wír veé Isray e mentey, e yùyrí wír ansə̀kì ghii tàn (500,000), a dzə̀ wír ve á kiìn móo màʼ rə́r kijuŋ.

¹⁸Á bèy, wír veé Judàa tòn veé Isray e ghan fóo fèy, bìʼ fo áwune kù‑uù tíy kév wùn à NYÙY TÀR woo Nyùy atàr vév, yéʼti e wùn wó.

¹⁹Fòn Abija‑aà jùm Fòn Jeroboam, e faàsì ŋkà se laʼ sə́ símóʼ sí, a sí dzə̀ jii, Betel, Jeshana, e lì Efron. Wù‑uù faàsì ŋkà se laʼ sìn wùn à ntèʼ sév sí.

²⁰Bó sáʼ Jeroboame yòʼ kfə̀n‑eè ló a ker vitaáví e ghan se Fòn Abija‑aà sáʼá. NYÙY TÀR nèn wìy lò, e tsə̀m Jeroboam, wù kpú.

²¹Vitaáví vé Fòn Abija vi‑iì lò, e nèn a kuy kuyín. Wù‑uù kér vikìy nshòv sikweè e ghvə̀m, kér wón vee vilum nshòv sibaà e mbaà, a vee vikìyí dzə̀ nshòv ntuùfú e ghvə̀m.

²²Ké vinyò vímóʼ ví vee Abija mvə̀m saʼ, wùn à liì və, à vinyo ve wù‑uù suuy vi, á sàŋ é ŋwàʼ wo dzəə̀n Ŋwàʼ Iddo woo *ŋgaà ntum Nyùy.