Read Lamnso 2 Wòŋ 14 Bible Online

2 Wòŋ 14 - Lamnso bible

2 Wòŋ 14

¹Fòn Abija‑aà lày, á lìtì wun e Ŋkàlaʼ Davir. Asa woo wán və nèn yì vifon, a saʼ e wun ntaʼ, nyaáŋ wáa dzə e wòŋ, e dù, e meé kiyá e ghvə̀m.

²Fòn Asa‑aà yii vinyo ve juŋ vi, a dzə̀ ve ví wáa gheén NYÙY TÀR woo Nyùy və.

³Wù‑uù sàʼày kíy se cù se anyùy vitum wùn à virə́ʼ vé anyùy vi, e bvə̀ʼtí sə́y se sí tíynin e virə̀ʼ vé cù, e gwàtì wúr sé nyùy woo *Ashera,

⁴e nèn yòŋ ji wír veé Judàa wáa cù a dzə̀ á NYÙY TÀR woo Nyùy atàr vév. Áwune wáa lèm a ntir sə́ wùn à nsər sə́ sí.

⁵Wù ku nèn laàr virə́ʼ vé cù, e laàr kíy se cù kilay fó ntèʼ seé Juda sidzə̀m. Á bèy, nyaáŋ nèn a dzə e wòŋ, e wun sar saʼ.

⁶Mo wóŋe‑eè siìn nyaáŋ, wù nèn kfə̀n lò, e bàʼrì ŋkà se laʼ seé Juda se yì‑iì siìn vikum, sí távkír. NYÙY TÀR‑iì fò wun nyaáŋ é mvə̀m viya foo fèy, la rə́r sí yòʼ jìvír wun.

⁷Wù‑uù sùúy e wír veé Judàa jii, «Nsay rə̀n dzə̀ ben, a kù dzəə́ kér vèsən, bìʼ fo vèsən jumrì NYÙY TÀR woo Nyùy wòsən. Wù fò ne vèsən rəsìn mbìv sidzə̀m. Á bèy, vèsən náŋsín, e bàʼrì ŋkà se laʼ sìn, e bòm kay si, à virùmèn vi, e kaàrí sho, e wàyrí shuu se kày wùn aànshìy vee visháa.» Á bèy, á nèn bàʼrì ŋkà se laʼ sìn, vinyo vév ví nèn a dù fo mbìy kijuŋ.

⁸Fòn Asa‑aà kér vé rər vee lò fó Juda, ansə̀kì ghii taár (300,000), aá dzə̀ kibáʼtín wùn aàŋkèe, à kòŋ sí. Wù kfə̀n‑eè kér ámóʼó vee lò fó Benjamin wír nsə̀kì kishóv mwaamé é ghiì baà (280,000), aá dzə̀ kibáʼtín wùn aàŋkèe, à vinte vi. Wír vìn adzə̀me‑eè dzə̀ antav, aá kì rə́r kijuŋ.

⁹Wìr woó Etiopia[14] wùmòʼ nèn wìy, e nə̀ə́ rə́r é Juda, e ghàn, e wìy, e mèé e Maresha. Yír rəə́‑əə̀ dzə̀ Sera. Wù‑uù kér vé rərí, dzə̀ e fur (1,000,000), kfə̀n kér *viténtén vé rər ghii taár.

¹⁰Fòn Asa fəə́ ji wun du, e fùnèn a wùn wun, áwune nèn tìím, a kìʼnìn e Kiwoóy ké Tsəfata e ghaa Maresha.

¹¹Fòn Asa lò, e tòŋ e NYÙY TÀR woo Nyùy və jii, «Éè NYÙY TÀR, dzə̀ wò cáʼ wo dzə̀ à sə̀ njoó, wù ghàʼ ntav. Éè NYÙY TÀR, ku sə̀ ver, bìʼ fo vèr kù yéʼti a dzə̀ e wò wùn, a vèr kfə̀n tàm vèr à nyanyày wìr və̀n e shùu rər, a dzə̀ bìʼ yír yé. Éè NYÙY TÀR, à dzə̀ Nyùy wor, lá à yòʼ biìmé é wìr gháʼ wò.»

¹²NYÙY TÀR ku nèn tòn wír veé Etiopia, á bvəə́rí e Fòn Asa wùn à wír veé Judàá mbìy, kileʼ ki nèn gbù.

¹³Fòn Asa wùn à wír vəə́ jùm wír veé Etiopia, e dù, e mèé e Gerar, e yùyrí áwune, la wìr mòʼón yòʼ bèr. Rúrú, NYÙY TÀR wùn à mànjòŋ və‑əə̀ laàr áwune. Wír veé Judàa nèn kùúy vifá ve wìr veé Etiopia vigháʼán.

¹⁴Áwune kfən tòn ŋkà se laʼ se sí‑iì kaarin Gerar, a NYÙY TÀR yií ne, kindzə́m kí gwár wír vee fó. Á tòn bèy, e nèn kùúy vifá fo ŋkà se laʼ foo fèy, a nsàʼmboʼ‑oò dzə̀ féyì e ghaágháʼán.

¹⁵Áwune kfə̀n‑eè nə̀ə́, e ghàr anshìy aáwuné vibàn, e faàsì ŋgoo se bvəy nyanyày wùn aàkameri, e nèn lò, e kfə̀n é bàm é Jerusalem.