Read Lamnso 2 Wòŋ 17 Bible Online

2 Wòŋ 17 - Lamnso bible

2 Wòŋ 17

¹Fòn Jehoshafat‑iì yì vifon, e nèn a saʼ e tàr wov Asa ntaʼ. Wù‑uù sìysì vifon və́ ví táv, wù kìʼ Isray Kùy.

²Wù‑uù lèm vé rərí é ŋkà se laʼ seé Jerusalem se vé‑eè bomen kay si, e kaàrí sho, e lèm ámóʼó é ntèʼ sí, e lèm sa ámóʼó é ŋkà se laʼ seé Efrayim se tàr wov‑iì faàsìn fo Isray Kùy.

³NYÙY TÀR‑iì leey fo Jehoshafat, bìʼ fo wù‑uù ghán a dzə̀ mo tàr wov Davir‑iì gháné e wun ghan sé mbìy si. Wù yòʼ‑oò ló a beè mebvə̀m mee *Baal.

⁴Wù kù‑uù bee a dzə̀ NYÙY TÀR woo Nyùy atàr və́, jumrì nsər sə́, e làa yòʼ a jùmrì liì afòn veé Isray Kùy.

⁵NYÙY TÀR nèn yiì, sáʼa tuúy e Jehoshafat kiwo, wír veé Judàa wáa fo nsùʼ e wun. Á bèy, wù nèn a ker káv e gháʼán, wíri kfə́n a ghvəm wun.

⁶Wù‑uù warkìr feyì e NYÙY TǍR vinyò. Wù‑uù laàr virə́ʼ vé anyùy wùn à wúr sé nyùy woo *Ashera si fó wòŋ woo Juda.

⁷Yì‑iì dzə̀, a wù sí sáʼ ji viyá vitaár, wù tsə́nsí atǎr ntoʼ və́ vee ji Ben‑Hail, Obadia, Sekariya, Netanel wùn à Mikayia ji á du, e yèʼéy a wíri é ntèʼ seé Juda.

⁸Áwune‑eè dù wùn à wír veé ram Levìi bvə̀ʼə̀, aàtàá cùu abaà. Wír veé ram Levìi‑iì dzə̀ ji Shemayia, Netania, Sebadiya, Asahel, Shemiramot, Jehonatan, Adonija, Tobija wùn à Tobadonija, e bóo lì atàá cù vee Elishama wùn Jehoram.

⁹Áwune‑eè lì Ŋwàʼ Nsər NYÙY TÀR, a ghan, a yeʼéy wíri shó ntèʼ seé Juda sidzə̀m.

¹⁰NYÙY TÀR‑iì yiì, kindzə́m kí gwàr vitúm ve ví‑iì kaarin Juda vidzə̀m, ví nèn fàn fó kfə̀n nəə́ Fòn Jehoshafat e rə́r sí.

¹¹Wír veé Filistia ámóʼó‑oò wìy, e fò nshwì e Fòn Jehoshafat, a dzə̀ *kisha ke mbàm ke baar kí, e bóo lì afómo ámóʼó. Wír veé Arabi‑iì wìy e viyáʼ vi kishóv ghií saàmbà e nsə̀kì saàmbà (7,700), e wìy sa e vibév vi kishóv ghií saàmbà e nsə̀kì saàmbà (7,700), e kù fò e Fòn Jehoshafat.

¹²Á bèy, vitaáví vé Fòn Jehoshafat vi ku nèn a kuy, a dù duùn fó mbìy. Wù‑uù bàʼrì ŋkà se laʼ see vikum e wòŋ woo Juda, e kfə̀n bàʼrì ŋkà se laʼ se vitàv,

¹³aá nèn lem vifá fo vigháʼán. Wù‑uù lèm vé rərí é Jerusalem, a dzə̀ antav adzə̀m.

¹⁴Vé‑eè dzə̀ áàkáŋ aàkáŋ mo rám sí dzə̀kìn. Fo rám Juda, vé‑eè kér amfòómé ve á sáʼ wíri nsə̀kì nsə̀kì. Mfòómé woo Adnaa‑aà kér vé rər ve wù‑uù sáʼá, aá dzə̀ wír ansə̀kì ghii taár (300,000).

¹⁵Mfòómé wo wù batin wun wáa dzə Jehohanan, a wù kér wíri nsə̀kì kishóv mwaamé é ghiì baà (280,000).

¹⁶Wìr wùmòʼ wo wù kfə̀n batin nén a dzə Amasiya woo wan Sikri, a yì‑iì shòʼ wun kitú kfə́, a lìm fo NYÙY TÀR. Wù‑uù sáʼ vé rərí wír ansə̀kì ghii baà (200,000).

¹⁷Fo rám Benjamin, vé‑eè kér mfòómé woo Eliada, a dzə̀ kintav ke wìr. Wù‑uù sáʼ vé rərí ansə̀kì ghii baà (200,000), aá kér vinte wùn aàŋkèe.

¹⁸Mfòómé wo wù batin wun nén a dzə Jehosabad, a wù sáʼ vé rərí wír nsə̀kì kishóv mwaamé é wiì (180,000), aá dzə̀ kibáʼtín.

¹⁹Á vé rər ve Fòn Jehoshafat‑iì kérí, e bóo lì ve wù‑uù lèmrìn é ŋkà se laʼ seé Juda see vikum.