Read Lamnso 2 Wòŋ 18 Bible Online

2 Wòŋ 18 - Lamnso bible

2 Wòŋ 18

¹Fòn Jehoshafat‑iì kér bùʼ e gháʼán, a wíri kfə̀n ghvə́m wun. Wù wìy lò, e koò viŋkar wùn Fòn Ahav e nsàn vijìn.

²Viyá vi wáa liysín, wù sə́y é Samaria ji wun du, e ghàn á Fòn Ahav. Fòn Ahav dù, e seèrí anjiì agháʼán wùn aànàʼa ji wun ghvə́m a Fòn Jehoshafat wùn à wír ve wùn áwune‑eè wìyìné. Wù lò fo bàm, e nèn a tàʼ ji Fòn Jehoshafat tátí á wun, é wùn wun nəə́ rə́r é Ramot‑Gilead.

³Ahav woo fon woó Isray lò, e dzə̀r e Jehoshafat woo fon woó Juda jii, «Wòsò lo, e dù, e nə̀ə́ Ramot‑Gilead e rə́r sí a?» Fòn Jehoshafat bìnèr jii, «Aà fèn dzə̀ kibáʼtín, bo m dzə̀ kibáʼtín, a wír vémé dzə̀ sá kibáʼtín. Vèr lo, e tom wò, é vèsən maʼ rə́r.»

⁴Fòn Jehoshafat nèn kfə̀n sùúy e fòn woó Isray jii, «Ku tòmbìy tàr o fo NYÙY TÀR.»

⁵Fòn woó Isray nèn tòóy aŋgàa si və́, aá dzə̀ ghii kweè, e dzə̀r aáwune ji wun sa nə̀ə́ Ramot‑Gilead e rə́r sí moo ŋgáŋ á? Á bìnèr ji fòn wàá nəə́. Fòn du, e tòn a áwune. Nyùy yíi dù, e way a Ramot‑Gilead e fòn kiwo.

⁶Fòn Jehoshafat dzə́r jii, «Ŋgaà ntum wo dzəə̀n wo NYÙY TÀR[17] yòʼ dzə̀ fen wo dzə̀ á tàr fó fo à?»

⁷Fòn woó Isray bìnèr jii, «Wùmòʼ dzə̀ wo dzə̀ á tàr fó fo, a dzə̀ Mikayia woo wan Imla. Yii bèy, m ban wun, bìʼ fo wù yòʼ yii yoŋ kinyo ke juŋ ki kùm mo. Kù yii dzə́ ke bi kí ghán sidzə̀m.» Fòn Jehoshafat suúy ji lá fòn yòʼ a yòŋ a bèy.

⁸Á bèy, Fòn woó Isray nèn tòóy nshìylav rə yìmòʼ, e tùm ji yì du, e wìy a e Mikayia cércér.

⁹A Fòn Ahav woó Isray wùn Fòn Jehoshafat woó Juda kì dzə̀ʼə̀m ne aáwuné akàvàʼ, aá dzə́ʼə́m a dzə̀ é riimé wo wú dzəə̀n é shùu kày wo wú nəə e Samaria, aá máʼ ndzə̀y sé vifòn. Vé‑eè dzə̀ʼə̀m fó bèy, é bo aŋgàa si fòne wiy, a fìʼ vinyo ve ví‑iì yíi a koóy e kwaʼ rər.

¹⁰Wùmòʼ‑oò dzə̀ Tsədekiya woo wan Kenaana, a wù fér ne loŋ see kisha ki. Wù wáa suúy e Fòn Ahav ji NYÙY TÀR suuy a jii, á mo wù yíi sə̀r a wír veé Siiria, e laàr áwune, aá may.

¹¹Aŋgàa si adzə̀me kù‑uù suuy kinyo a dzə̀ kee shó ji fòn du á rə́r é Ramot‑Gilead, a wù du, e tòn a fó, bìʼ fo NYÙY TÀR yíi way a fó e fòn kiwo.

¹²Nshìylav ye yì kì duùn, e tòóy Mikayia kì dù bey, e sùúy sho jii, «Leéy, e yèn mbà, aŋgàa sii yèn kinyo kimòʼón ji fòn du, e so a rə́r. Ku mùm ji jí sé si tárnín á wùn à sév sí, áà kfən tòmrí tomrín.»

¹³Mikayia nèn sùúy jii, «Rúrú, mo NYÙY TÀR dzəə̀n shó, a dzə̀ m kù sùúy kinyo e fòn cáʼcáʼ a dzə̀ ke Nyùy wom yòŋèn.»

¹⁴Mikayia yiì wìy, fòn dzə́r jii, «Mikayia, vèr nəə́ Ramot‑Gilead e rə́r sí moo ŋgáŋ á?» Mikayia bìnèr jii, «Nyàr, á nəə́ á nəə́n. Á waà du, e tòn a fó. Áwune yíi mày a e fòn kiwo.»

¹⁵Yii bèy, Fòn Ahav suúy shó jii, «M wíy suŋnín e wò, e dù, e meé e le ji à lóo suúy kinyo e mò, e NYÙY TǍR yir, à wàa suúy a dzə̀ ké ru kí.»

¹⁶Mikayia nèn sùúy lèn jii, «M yèn a wír veé Israyi táʼrí áàgwan moo njiì woo là nshìy, a NYÙY TÀR suuy jii, ‹Wír vìne yòʼ kér kilìmbìy, bòŋ ji wìr mòʼón mòʼón wáa kfən e wun laʼ ji nyaáŋ.› »

¹⁷Fòn woó Isray nèn sùúy e Fòn Jehoshafat jii, «Bó m yoʼ lò sùúy e wò ji bó yòʼ dzə̀ Mikayia tiìsí ntum Nyùy, e sùúy kinyo ke juŋ ki kùm mo a? Kù yii dzə́ ke bi kí.»

¹⁸Mikayia nen kfə̀n a suúy jii, «Fòn ku yuùrí a kinyo ke NYÙY TÀR. M kì yèn á NYÙY TÀR, a wù dzə́ a e wun kàvàʼ, a nsheèlav sə́ sí tíy e wun ghaŋ, à fó koy ŋkoòvìi, à fo wó yìyí,

¹⁹wù wáa ghay a ji sà fèn‑éè du la, e lèvtí Ahav woo fon woó Isray, é wù nəə́ rə́r é Ramot‑Gilead, aá yúyrí á? Nshìylav yìmòʼ suuy kinyo, yìmòʼ sùúy ke sən kí.

²⁰Kiyoy ki nèn fəə̀, e tìím e NYÙY TǍR si, e sùúy jii, ‹M yíi dù, e levtí wun.› NYÙY TÀR dzə́r shó jii, ‹À yíi ghan e le, e bóo levtí wun.›

²¹Kiyoy kìy ki bìnèr jii, ‹M yíi dù, e way kimboʼtì aàŋgàa si vəə́ shuù adzə̀m.› NYÙY TÀR biímé, e sùúy jii, ‹À yíi dù rú, e levtí. Dù ri, e yiì mo à suuyin.› »

²²Mikayia nèn a màysì, a suuy jii, «NYÙY TÀR fèn kì wày á ne a dzə̀ kimboʼtì aàŋgàa si fòné shuù. NYÙY TÀR kì kàʼ wun woo fon, a dzə̀ á e ŋgeʼ.»

²³Tsədekiya woo wan Kenaana və̀y nèn kòʼtí, e wìy, e sàn kindzəv e Mikayia bubúʼ, e dzə̀r shó jii, «Kiyoy ke NYÙY TÀR kí màʼtì mo a dzə̀ é ghàn ka, e bó a suŋnín e wò?»

²⁴Mikayia bìnèr jii, «À wíy kiíy e kishiíy ke à wíy nəə́, a laáy e wàn lav woo fó mvəə́mvəm.»

²⁵Fòn Ahav woó Isray nèn sùúy jii, «Vèn bám Mikayia, e dù sho, e fò e wàn ntoʼ woo Joash wùn Amon wo wù sáʼ mvəmlaʼ.

²⁶Vèn du, vèn sùúy ji m yoŋ a ji áwune wáy á jwè woo shoon e sháŋ, a fo a kibán, é wù wáa lumrí lumrín, a no a dzə̀ mendzə́v é kitu wo, e dù, e meé mo mo‑óò kfə́n é bàm, là kinyo.»

²⁷Mikayia suúy jii, «A fòn lòo dzə, e dù, e kfə̀n é bàm kijuŋ, là kinyo, bo bó NYÙY TÀR yòʼ‑oò lò sùŋnín rú e mò.» Mikayia wáa dzə̀sì, a suúy jii, «Wìr dzə̀m səəm kinyo ke m suuy ki.»

²⁸Fòn Ahav woó Isray wùn Fòn Jehoshafat woó Juda nèn kòʼ é Ramot‑Gilead,

²⁹Fòn Ahav suúy e Fòn Jehoshafat jii, «M lo, e kuv wún, e màʼ ndzə̀y se sən sí, e bó a dù rə́r. Yii bèy, à lo, e màʼ ké a dzə̀ ndzə̀y sé vifòn.» Á bèy, fòn woó Isray nèn kùv wún, e màʼ ndzə̀y se sən sí, áwune wáa dù rə́r.

³⁰Á wáa dù bèy, a fòn woó Siiria kì fò ne sáʼ aàmfòómé və́ ve vé‑eè səŋ viténténé jii, «Vèn lóo màʼ rə́r, lá vèn yòʼ a ker shií e wìr wo terí, kìn e wo kuʼùn. Vèn wáa ker shií a dzə̀ e fòn woó Isray.»

³¹Amfòómé veé vitenténé yiì dù, e yèn Fòn Jehoshafat, e nèn a kwàʼtì ji fèn dzə̀ á fon woó Isray. Áwune bìnkìr ji á funèn a wun, wù tóŋ kitávín, NYÙY TÀR sə́ wun, e jùm áwune fo wun ghaŋ.

³²A kí dzə̀ jii, vé‑eè yèn ji yòʼ dzə̀ á fon woó Isray, e nèn yàr fó a nyoòrì wun.

³³Rə́r sí kú a màʼ, wìr wùmòʼ lò, e tsə̀nsí mvən tsə́nsín e wírí mvəm, yí nèn koò fon woó Isray, e kù koò a dzə̀ fó bvə̀m, fo kikúm kfə́ ké rər kí‑iì səyin, e tàtí sə̀là. Wù nèn sùúy e nsə̀ŋ və kitèntén jii, «Bìnèr kiténtén kí, e fə̀ə́r mo fó mvə̀m rə̀r, bìʼ fo m lemen ne.»

³⁴Rə́r sí‑iì tàvkír é kishiíy fóo fèy, fòn woó Isray kú a tiy e mvə̀m kitèntén fey, a kìʼ wír veé Siiria, aá tóm wun tómén. Shùy lòo nəə́, wù nèn lày.