Read Lamnso 2 Wòŋ 19 Bible Online

2 Wòŋ 19 - Lamnso bible

2 Wòŋ 19

¹Fòn Jehoshafat woó Juda‑aà kfə̀n é bàm kijuŋ e wun ntoʼ e Jerusalem, là kinyo.

²Jehu woo ŋgaà si, a dzə̀ wan Hanani nèn lò, e dù yèn Fòn Jehoshafat, e yòŋ sho jii, «Kí sa bòŋ ji fòn wáa tom wir kisaŋ a? Kí bóŋ ji fòn wáa kòŋ wír ve á ban NYÙY TÀR á? NYÙY TÀR sí yú a nyár wùn fòn bìʼ kinyo ke fòn yiìn.

³Yii bèy, a fòn dzə̀ a yií á vinyo ve juŋ vímóʼ ví. Á laàr ne a cú nyùy woo *Ashera fo wun nsay, e wày ŋàŋ ji á wáa kiíy a dzə̀ á Nyùy.»

⁴Fòn Jehoshafat‑iì dzə́ e Jerusalem, lo, wù fəə̀, a ghan, a yen wíri, a banrí ji á wáa kfən a fo NYÙY TÀR woo Nyùy atàr vév wùn. Wù‑uù lo, wù kèʼ fó Beersheba, e ghàn, e dù mèé e wòŋ agwan woó Efrayim.

⁵Wù‑uù shòʼtí atǎr nsaʼ, e lèm e ŋkà se laʼ see vikum seé Juda sidzə̀m.

⁶Wù‑uù sùúy aáwune jii, «Vèn wáa kiíy mo vèn tínen vinyo, bìʼ fo vèn yòʼ lim a dzə̀ fo wìr, vèn lim a dzə̀ fo NYÙY TÀR. Wù kù dzə̀ vèn áwune é ghan se vèn tínen nsaʼ.

⁷Bo dzə̀ jii, vèn wáa fàn a NYÙY TÀR, lóo tinén nsaʼ, á tàr kijuŋ, bìʼ fo NYÙY TÀR woo Nyùy wòsən yòʼ yii koŋ nsaʼ kinshwìv, kìn yee bìn mbìv mòʼón, kìn ye mbvə́nkíwó.»

⁸Fo mvə̀mlaʼ yee Jerusalem, Fòn Jehoshafat shóʼ wír veé ram Levi ámóʼó, e shòʼ atàá cù wùn aàtǎr kfəə seé Isray si ji á wáa tinén a nsaʼ si e NYÙY TǍR yir, a kwàŋrì a nsaʼ se sí dzəə́ kér shuu. Áwune ve vé‑eè shoʼtiné kù‑uù dzə́ a dzə̀ é Jerusalem.

⁹Fòn Jehoshafat nèn a tir áwune jii, «Vèn fan a dzə̀ NYÙY TÀR, e lìm lim yéné vèn à shilív shí, là kiloʼ.

¹⁰Aàfə́r vén ve á dzə́ e ntèʼ símóʼ sií lò, e wìy e nsaʼ kinjuyrìwìr, kìn e nsaʼ rəné ye yì kum nsər Nyùy, kìn sáʼ Nyùy, kìn vinyo ve Nyùy tinen, kìn ntò se vinyò se Nyùy foon, vèn kù naàrì áwune fo áwune lóo saʼ nsaʼ, e lì njò, é NYÙY TÀR shóv áwune, e nèn màʼ ŋgeʼ e vèn aàfə́r véné kitu. Vèn yii lim yéné kijuŋ, e nèn bòy fo njò.

¹¹Vèn kiíy jii, Amaria woo kitú ke atàá cù yíi a tiy mbìy nsaʼ sidzə̀m se sí kum kinyo ke NYÙY TÀR, é Sebadiya woo wan Ishmael, a dzə̀ taà saʼ woó Juda wáa tiy mbìy nsaʼ sidzə̀m se sí kum fon. Wír veé ram Levìi yíi a tom ven. Lá vèn yòʼ a fàn kifá. NYÙY TÀR kú a dzə wùn wìr wo wù ghán tìítiy.»