Read Lamnso 2 Wòŋ 2 Bible Online

2 Wòŋ 2 - Lamnso bible

2 Wòŋ 2

¹Fòn Solomon‑eè yèn ji wun‑éè baʼri á lav cù ye á wáa cù NYÙY TÀR shó, e kfə̀n bàʼrì a ntoʼ rə.

²Wù nèn shòʼtí wíri nsə̀kì msaàmbà (70,000) ji á wáa beʼ a vifá ve kibàʼrì, a wìy sho, e kfə̀n shòʼtí ámóʼó nsə̀kì mwaamé (80,000) ji á wáa san a tíy áàgwan, e nèn shòʼtí vilìmbìy ve ví wáa leéy lim, aá dzə̀ wír kishóv ghií ntuùfú aànsə̀kìi ataár (3,600).

³Fòn Solomon‑eè tsə̀nsí ntum e Hiram[2] woo fon woó Taya jii, «Wòsò suúsín mo vèn tàr wor Davir‑iì suusin, à tsə́nsí vicí vé *sidar e wun, wù báʼrí ntoʼ rə shó.

⁴M yoŋ bèn, a m lo, e bàʼrì lav cù, e fo e NYÙY TÀR woo Nyùy wom, aá wáa ghvəm wun fo. Dzə̀ fó, fo á yíi a tòn kiláy ke rəʼtìn kí, a cù NYÙY TÀR shó, e kfə̀n a neèr kibán fo, é kí wáa dzə e wun si ghán sidzə̀m. Á kfə̀n yíi a yiì cu se tonèn sí fó, kijàvndzə kidzə̀m wùn à e ŋkuùr, a yiì e vishiíy vé bam, e kfə̀n a yiì e vishiíy vé *Ŋkǎʼ Ŋwee wo Fíyi, a yiì e vishiíy vé ŋkàʼ vímóʼ ví ve á lèm ji vé NYÙY TÀR woo Nyùy wor. Á mo kí dzəə̀n ji wír veé Israyi wáa yiì, e wìy dù, e mày.

⁵«Lav cù ye m lo, e bàʼrì ló a dzə e kuʼùn, bìʼ fo Nyùy wor kùʼùn, e shaà anyùy adzə̀m.

⁶A dzə̀ bàʼrì la rú lav ji ye NYÙY TÀR, a bó yúv, fə̀m ntoò yùv yòʼ dzə̀ yì keèrí wun. Bo a m fə̀m kì yoŋ ji m baʼrì lav NYÙY TÀR, kí bo dzə̀ ji m bóm a dzə̀ kirə́ʼ ke á wáa tòn kiláy fó, a cù wun sho.

⁷«Á bèy, ku tsə̀nsí rì mo wir fèr wo wù kiìn fer yee *kisha ke mbàm ke baar kí wùn à yee kisha ke mbàm ke fəvír kí, à yee kisha kee *brons ki, e kfə̀n a lìm sa e kisha kee kisha ki. Ŋgaàŋ kú a dzə wír wo dzə̀ wù bà ndzə̀y see làv wo wù səə́ne moo yòm, à wo wù baŋ ji rèm, à wò wù səə́ne moo yúv, é kú a dzə wír wo wù kiìn móo tooŋé nsáŋtí é vifa. Wù yíi a lìm wùn à vé fèr veé Judàa, à veé Jerusaleme, ve tàr wor Davir‑iì shoʼtin, e lèm.

⁸M kì ji wír vée kì móo gwàr a vicí kijuŋ e Lebanon. Tsə́nsí mo vicí ve áwune gwàrìn fó Lebanon, vee jii, sidar, dzəʼə̀y wùn à algum. Vé lìm vémé yíi a lìm wùn à vé lìm vée,

⁹aá fiʼ gwàr vicí vém vikuʼùn, bìʼ fo lav cù ye m baʼrì yíi a dzə e kuʼùn, e kfə̀n a dzə e gháʼtín.

¹⁰M yíi làʼ vé lìm vé ve á gwar vicí, e fo a dzə̀ sáŋ yee *wit, ye á kaʼtin ne, vibam[3] nsə̀kì mkweè (40,000), e kfə̀n làʼ sa e sáŋ yee *barlìi, vibam nsə̀kì mkweè (40,000), e làʼ e meluʼ mè, joŋ si nsə̀kì mbaà (20,000), e bóo lì meŋgvə́r me *oliv, a mè dzə̀ tin si nsə̀kì mbaà (20,000), sá.»[4]

¹¹Fòn Hiram woó Taya nèn sàŋ ŋwàʼ, e bìnèr ntum Fòn Solomon rə̀y jii, «NYÙY TÀR kòʼór wò ji fon wìr və́, bìʼ fo wù koŋ áwune.»

¹²Fòn Hiram kfə̀n‑eè sàŋ jii, «Búríi wáa dzə fo NYÙY TÀR woo Nyùy wìr veé Isray wo wù bomen yúv wùn à nsay. Wù fò ne Fòn Davir wán woo fií, wán, a wù kiiy vinyo, kfə̀n rətì vinyo. Wù yíi bàʼrì lav cù NYÙY TÀR, fo kfə́ kí, é wù baʼri ntoʼ rə.

¹³«Á bèy, m nén a tsənsí wò wir fèr, a wù kì lim feyì. Yír rəə́ dzə̀ Huram‑Abi.

¹⁴Yè wov lò fo Dan, a tàr wov dzə̀ wír woó Taya. Wù kì móo fèr fer e kisha ke mbàm ke baar kí, à móo fèr e ke fəvír kí, e kfə̀n fèr e kee brons ki, e kfə̀n fèr e kisha kee kisha ki. Wù kì fer yee tíyí, à yee kicí kí, e bóo lì ndzə̀y see bá e làv wo wù səə́ne moo yòm, à wo wù səə́ne moo yúv, à wo wù baŋ ji rèm, à ndzə̀y see bá e làv wo fəvír woo fèm si. A dzə̀ kfə́ə nsáŋtí e dzə̀m, kìn dzə̀ wo tooŋén, kìn wo buʼùn, bo dzə̀ wù yiì. Aá fə̀m yòŋ ji wù fer woó le, bo dzə̀ wù fèr. Wù yíi a lìm wùn à vé fèr vée, à vé fèr tàr won Davir woo taàtá womé.

¹⁵«A dzə̀ lèn taàtá wom tsə̀nsí sáŋ yee wit wùn à yee *barlìi, à meŋgvə́r me oliv mè, à meluʼ mè mo wù‑uu kàʼàn. Ku tsə̀nsí vifá vìn vi áàŋgàa lìm vée,

¹⁶é vèr nèn gwàr vicí ve à taʼà fo Lebanon, aá sə́y shó e shùu rìbà ndzə̀v, e tàŋsìn, e dòm e ndzəv, e dù sho e Joppa, áà nèn lì, e kòʼ shó e Jerusalem.»

¹⁷Fòn Solomon dù, e yòŋ ŋwàʼ, e nèn tàŋ viŋgwìy vidzə̀m vee vilum ve ví‑iì dzəə̀n é nsay Isray. Kintaŋ kìn ki‑iì bàtír kímóʼ kí ke Davir woo tàr à Solomon‑eè yiìn ne. Fòn Solomon‑eè yiì kintaŋ kìn, a ker wíri kishóv ghií ntuùfú, aànsə̀kìi nshòv sitaár e mtàn e wiì (153,600).

¹⁸Wù nèn tsə̀ə́r wír vee nsə̀kì msaàmbà (70,000), á wáa beʼ vifá ve kibàʼrì, e tsə̀ə́r vee nsə̀kì mwaamé (80,000), á wáa tuŋ tíy áàgwan, vee kishóv ghií ntuùfú aànsə̀kì ataári (3,600) nén a leéy lim.