Read Lamnso 2 Wòŋ 20 Bible Online

2 Wòŋ 20 - Lamnso bible

2 Wòŋ 20

¹Shintàm shi‑iì lóo dàr, wír veé Moav wùn à veé Ammon, à veé Meun[18] ámóʼó nèn a wìy ji á nəə́ á Fòn Jehoshafat e rə́r sí.

²Wír ámóʼó nèn dù, e bùn Fòn Jehoshafat jii, «Vé rərí wiy agháʼán fó Edom[19], ji á nəə́ á fon e rə́r sí, aá wiy fo ndzə̀n Ndzə́v Shiŋgwaŋe, aá sì é Hasason‑Tamar, wo dzəə̀n En‑Gedi.»

³Fòn Jehoshafat yú kinyo kìy, wúné beémé wun, wù wáy ji wun‑éè bee á NYÙY TÀR shó. Wù nèn fò sáʼ ji á lem á jíŋ woŋ Juda e dzə̀m.

⁴Wír veé Judàa nèn bàʼtí e Jerusalem, aá wíykír fó ntèʼ seé Juda sidzə̀m, ji á lón á NYÙY TÀR, é wù sə́ á áwune.

⁵Fòn Jehoshafat yiì lò, e ŋàʼáy, e tìím e wírí si e mbìy maàndzə ye fíy yeé lav cù, fo wír veé Juda wùn à veé Jerusaleme‑eè baʼtin.

⁶Wù tiím bey, a bùnrì jii, «Éè NYÙY TÀR, wò woo Nyùy atàr vér, à dzə̀ Nyùy, aà dzə́ e yuv, sáʼ vitúm vidzə̀m. À kér vitaáví ve ghaʼán ví ve bó yòʼ dzə̀ wìr ghàʼ wò.

⁷Éè Nyùy wor, wò‑oò jùm vitúm fo wír veé Israyí mbìy, ve ví‑iì dzə́ e nsay fèn, e nèn fò nsay rə̀n ji sì á ye rám Abraham woo ŋkar yè, e wìy dù, e mày.

⁸Atàr vérí nèn dzə̀ʼə̀m sho, e bàʼrì lav cù, a cù wò sho, e lò, e mbaà wò jii,

⁹a ŋgeʼ si lòo dzə, e gbù e věr kitu, kìn rə́r sí nə̀ə́ ver bìʼ ajay vér, kìn dzə̀ kifə̀ʼ, kìn dzə̀ jíŋ, bo vèr wiy e shùu lav cù fèn, e tiím e wò si, bìʼ fo à dzəə̀n fó. Vèr tiim bèy, lóo toŋ, lóo kàn wò e věr mvə̀m ŋgeʼ, áà ku nèn yù tóŋ yér, e fə̀ə́r ver fó ŋgeʼ.

¹⁰Kee lèn ki, wír veé Ammon wùn à veé Moav, à veé Gwan Seiri sí nəə ver e rə́r sí. A dzə̀ vitúm vìn ve wò‑oò shaʼnin ji lá atàr vérí yòʼ nə̀ə́ a áwune e rə́r sí e ghan se atàr vérí‑iì fəən fó Ejiv, a wìy fèn. Á bèy, atàr vérí ku yòʼ màʼtì, e làa yòʼ laàr áwune.

¹¹Leéy ri, e yèn, áwune sí beerì ver, a dzə̀ e jum ye á wiy ji á jum ver fo wò nsay ye wò‑oò foon e vèr ji vitsə́ʼ vér.

¹²Éè Nyùy wor, ku fùnèn áwune. Vèr yòʼ kér kitar ke dzə̀ vèr fùnèn vé rər ve á wiy nyanyày vìn. Vèr yòʼ kì kinyo kée yiì. Yii bèy, vèr kù sí leey a dzə̀ wò ji à sə́ á ver.»

¹³Wír veé Juda adzə̀m wùn à vikìy véví, à wón véví, à wón ve bóri kù‑uù tíy e NYÙY TǍR si, e shùu lav cù.

¹⁴Kiyoy ke NYÙY TÀR kí nèn lò, e wìy fo Jahasiel wùn, à wù dzə̀ e wírí mvəm. Jahasiel və̀n‑eè dzə̀ wír fo rám Levi ve dzəə̀n kfə́ə Asav. Tàr wov‑iì dzə̀ Sekariya, a Sekariya dzə̀ wan Benaya woo wan Jeyel, a Jeyel dzə̀ wan Mattania.

¹⁵Wun woo Jahasiel nèn sùúy jii, «Ven vee wír veé Juda adzə̀m wùn à wír ve á dzə́ e Jerusaleme, e lì Fòn Jehoshafat, vèn yuúrí. NYÙY TÀR suuy jii, lá vèn yòʼ a fàn, lá vèn yòʼ a yàʼ bìʼ vé rər ve á dzəə̀n nyanyày vìn. Yòʼ lo, a màʼ ven rə́r, lo, a màʼ Nyùy.

¹⁶Áwune bvəə́shi, a koʼ kiŋgwàmrì kee Tsis kibvəə́shí. Vèn bvəə́shi, á sə̀y fó, a kìʼ áwune. Vèn bvəə́shi, e yen áwune fo kiwoóy kí duùn, e ndzə̀y e woʼ yee Jeruel, e mbìv yee fo shùy yii tó.

¹⁷Kí yòʼ dzə̀ é shií ji vèn yìi a màʼ rə́r sin. Ven vee wír veé Juda wùn à veé Jerusaleme, vèn du, á tìím e věn kirə̀ʼ ji nyaáŋ, a leéy mo Nyùy lo, e tòn áwune, e fo e vèn. Lá vèn yòʼ a fàn, lá vèn yòʼ a yàʼ. Vèn bvəə́shi, á dù, a kìʼ áwune é shùu rər. NYÙY TÀR bvəə́shi, a dzə vèn áwune.»

¹⁸Jehoshafat tsə́m ndzəə́, e làʼ kitú fo nsay, wír veé Juda adzə̀m wùn à wír ve vé‑eè dzə́ e Jerusaleme nèn gbù fo nsay e NYÙY TǍR si, a ghvəm wun.

¹⁹Á bèy, wír veé ram Levi ve dzəə̀n kfə́ə Kohat wùn à vee kfə́ə Koràa nèn lò e yuv, a sùyrì NYÙY TÀR woo Nyùy wìr veé Isray, a nàn jí kitávín.

²⁰Ndzə bvəə́shí, e jàv, wìr dzə̀m fəə́, e dù e woʼ yeé Tekoa. Vé‑eè lòo fəə, Fòn Jehoshafat tiím é yuv, e yòŋ jii, «Wír veé Juda wùn à veé Jerusaleme, vèn yuúrí, e yù. Vèn wáy shilív shí a dzə̀ e NYÙY TÀR woo Nyùy wón wùn, é la kifá ki yòʼ yiì sə̀ʼ ven. Vèn biímé kinyo ke aŋgàa ntum və́ kí, é vèn yiì sò.»

²¹Wù màysì, e sùŋnín e wíri, e nèn shòʼtí wír ve á wáa yòv, a sùyrì NYÙY TÀR wo wù dzəə̀n e wun mvə̀m ran.[20] Wír vìne‑eè yíi a dù e vé rərí mbìy, a yòv jii: «Vèn wáa fo vibeerì e NYÙY TÀR. Koŋ ye wù koŋ wír vəə́ yòʼ wíy mày.»

²²Áwune‑eè dù, e kèʼ lòo yòv, lòo sùyrì NYÙY TÀR, wù nèn fùnèn wír veé Ammon wùn à veé Moavi, à veé Gwan Seiri ve vé‑eè nəə Juda e rə́r sí. Wù fùnèn bèy, e tòn áwune.

²³A kí dzə̀ jii, wù‑uù yiì, wír veé Ammon wùn à veé Moavi fùnèn veé Gwan Seir, e laàr adzə̀m. E bǎm kee shooy, áwune nèn bìnkìr, a fùnèn áwune áwune, e fùnèn bèy, e kpùkír adzə̀m.

²⁴Wír veé Judàa yiì wìy, e mèé e kirùmèn ke ŋkiy keé woʼ, e màʼ sí fo vé rər vee nyanyày vìyi‑iì dzəə̀n, e lòo leéy, e nèn yèn a dzə̀ dzə́n sí, a sí néŋnin fo nsay, a bó wìr mòʼón yòʼ‑oò lo lèʼ.

²⁵Á bèy, Fòn Jehoshafat wùn à wír vəə́ nèn dù, a kuúy nsàʼmboʼ. Vé‑eè yèn nàʼ e gháʼán,[21] e yèn ndzə̀y[22], e yèn vifá veé kilùm, a ví dzə̀ vighaágháʼán ye bó yòʼ dzə̀ á yù fóo bèʼèy. Kí‑iì lì áwune vishiíy vitaár, é bo á kuúy nsàʼmboʼ, bìʼ fo wù‑uù kùʼùn é ŋàŋ.

²⁶Wáa dzə e kishiíy ke kí‑iì meen ne ji kweè, áwune báʼtí é Kiwoóy ké Beraka,[23] e beèrì NYÙY TÀR fó. Á kinyo ke kí‑iì yiìn, é bo á wáa yòŋ fó ji Kiwoóy ké Beraka, e wìy shem lán.

²⁷Wír veé Juda adzə̀m wùn à veé Jerusaleme nèn a kfən e Jerusalem, a sàvnìn, bìʼ fo NYÙY TÀR‑iì tònèn aŋgaà vév vibàn, e fò aáwune. Vé‑eè kfə́n bèy, a Fòn Jehoshafat du fo áwuné mbìy.

²⁸Áwune nəə́ é Jerusalem, e shaà, e dù e NYÙY TǍR lav, aá kum lúŋ mbàytì, kum yé nshì, kfə̀n tóŋ sóŋ.

²⁹Vitúm vidzə̀m vi yú mo NYÙY TÀR tònèn aŋgàa vibǎn wìr veé Isray, e nèn a fàn Nyùy.

³⁰Á bèy, woŋ Jehoshafati nèn a ker nyaáŋ, bìʼ fo Nyùy və‑əə̀ foon wun rəsìn mbìv sidzə̀m.

³¹Fòn Jehoshafat nèn kù a saʼ Juda. Wù‑uù yì vifon, a wù dzə̀ kiyá nshòv sitàn e mtaár, e sàʼ kiyá nshòv sitàn e mbaà, a wù dzə́ e Jerusalem. Yè wov‑iì dzə̀ Asuba woo wan Shilhi.

³²Fòn Jehoshafat kù‑uù lì sáʼ a dzə̀ yé tàr wov Asa, là bar. Wù kù‑uù yii a dzə̀ vinyo vee réŋ ví e NYÙY TǍR si.

³³Yii bèy, virə́ʼ vé anyùy vi‑iì gòʼ là ketì. Bó wíri yòʼ‑oò lo wày shilív shidzə̀m e Nyùy woo Nyùy atàr vév wùn.

³⁴Ké vinyò vímóʼ ví ve Fòn Jehoshafat‑iì yiìn, e kèʼ fo kèʼ, e dù, e jòʼsì, á ŋeèvì e mvə̀m vinyò ve wòŋ ve Jehu woo wan Hanani‑iì saŋen, a ví dzə̀ é mvə̀m Ŋwàʼ Vinyò ve Afòn veé Isray.

³⁵Yì‑iì dzə̀ é ghan símóʼ sí, Jehoshafat woo fon woó Juda koó viŋkar wùn Ahasiya woo fon woó Isray, a Fòn Ahasiya‑aà buʼtì vinyo ve bi ví é ŋàŋ.

³⁶Jehoshafat‑iì suùsín wùn wun, á bàʼrì vikóŋ ve ví wáa dù e Tarshish. Vé‑eè bàʼrì vikóŋ vìn a dzə̀ é Etsiyon‑Geber.

³⁷Elieser woo wan Dodavahu woó Maresha nèn shì njèm e Jehoshafat jii, «Mo à suusin vèn Ahasiya, NYÙY TÀR yíi sàʼtì vikóŋ ve vèn bàʼrìn.» Kinsəm ki nèn lò, e sàʼtì vikóŋ vìy, la ví yòʼ dzəə dù e Tarshish.