Read Lamnso 2 Wòŋ 21 Bible Online

2 Wòŋ 21 - Lamnso bible

2 Wòŋ 21

¹Fòn Jehoshafat wìy lày, á lìtì aàtàr vəə́ ghaŋ e Ŋkàlaʼ Davir, wan və woo Jehoram yí vifon, e nèn a saʼ e wun ntaʼ.

²Jehoram woo wan Fòn Jehoshafat‑iì kér afə́r ntuùfú, aá dzə̀ jii, Asaria, Jehiel, Sekariya, Asariyahu, Mayker wùn à Shefatia. Áwune adzə̀me kù‑uù dzə̀ vitó ve Fòn Jehoshafat woó Juda[24].

³Tàr wov‑iì fò áwune afómo nyanyày. Wù‑uù fò *kisha ke mbàm ke fəvír kí wùn à ke baar kí, e fò vifá veé kilùm vímóʼ ví, e kfə̀n lì ŋkà se laʼ see vikum seé Juda símóʼ sí, e jàv e kitu kitu. Yii bèy, wù fó vifon e Jehoram, bìʼ fo Jehoram‑eè dzəə̀n wán woo ŋgàywìr.

⁴Jehoram‑eè yì vifon bèy, e nèn kù a saʼ e tàr wóv ntaʼ. Sáʼ rəə́ wìy tùúy, wù nèn yùyrí afə́r və́ adzə̀m wùn à vé saʼ veé Juda ámóʼó.

⁵Vé‑eè kòʼór Jehoram ji fon, a wù dzə̀ kiyá nshòv sibaà e mtaár. Wù‑uù sàʼ vifon kiyá waamé, a wù dzə́ e Jerusalem.

⁶Wù‑uù kér wiíy a dzə̀ wan Ahav, e nèn a jùmrì liì kfəə yee shooy, a bùʼtì vinyo mo afon veé Israyi‑iì buʼtì. Wù kù‑uù yii vinyo ve ví wáa bir NYÙY TÀR.

⁷Yii bèy, la NYÙY TÀR yòʼ laàr rám Davir. Wù kù‑uù bàvtí bìʼ *mensaŋ me wù‑uù gwàrìn wùn Davir, e kàʼ ji rám rəə́ kù wíy a saʼ a vifon, e wìy dù, e mày.

⁸Wáa dzə e ghan sin se Fòn Jehoram‑eè sáʼá, Edom tén sáʼ yeé Juda, e nèn kòʼór wóov woo fon.

⁹Fòn Jehoram nèn lì amfòómé və́ wùn à *viténtén və́ vé rər ví vidzə̀m, e nə̀ə́ rə́r é Edom, wír vee fóo gìm wun, e kaàrí, e tàr. Wáa dzə vitsə́ʼə́, wù kív dzə́ə, wùn à wír vəə́ léʼ.

¹⁰Bó Edom yòʼ‑oò lo dzəə ghàn biìmé sáʼ yeé Juda, e wìy shem lán. Yì‑iì dzə̀ é ghan fóo fèy, Libna ku tèn sá sáʼ yeé Juda. A kí‑iì kòóy bey, bìʼ fo Fòn Jehoram‑eè bìnèn ne ndzə̀m e NYÙY TÀR woo Nyùy atàr və́.

¹¹Fòn Jehoram kfə̀n‑eè bàʼrì virə́ʼ vé anyùy aàgwan veé Juda, e nèn yiì, wír veé Jerusalem, à veé Judàa máʼáy NYÙY TÀR, a cù a dzə̀ anyùy.

¹²*Ŋgaà ntum Nyùy woo Elija nèn lò, e tsə̀nsí ŋwàʼ e Fòn Jehoram, a wú suuy jii, «Ke NYÙY TÀR woo Nyùy Davir woo tàr à ràm yén suuy ki dzə̀ jii, ‹à tèn ne fó a jùmrì kiwuú ké tàr won Jehoshafat woo fon woó Juda, e tèn fó a jùmrì ké tàr wov woo Fòn Asa.

¹³À lò ne, a jùmrì a dzə̀ kiwuú ké afòn veé Isray, e nèn yiì, wír veé Juda wùn à veé Jerusaleme máʼáy NYÙY TÀR, a cù a dzə̀ anyùy, kù mo Ahav wùn à kfə́ə rəə́‑əə̀ yiìn, wír veé Israyi máʼáy NYÙY TÀR. Wò woo Jehoram, à kfən yùyrí afə́r vé vee kfə́ə tàr won, a liì wov bóŋ, e shaà wo.

¹⁴Bìʼ vinyo vìn, NYÙY TÀR lo, e màʼ kifə̀ʼ e wír vée kitu, e màʼ e wón vé wùn à vikìy vée kitu, e kfə̀n màʼ ntèmntém é kifa ke dzəə̀n ké kidzə̀m.

¹⁵Wówò kitú ké, à yíi a jòy yàsí woó vito wo wù yíi a tav, a dù duùn fó mbìy mo kishiíy kí dzəə̀n, é vitó vé vi nèn kù a fəə fəə́n fó kwaʼ.› »

¹⁶Á bèy, NYÙY TÀR nèn bàyír wír veé Filistia, e bàyír veé Arab ve á dzə́ e wír veé Etiopiàá[25] ghaŋ, á nəə́ Fòn Jehoram e rə́r sí.

¹⁷Áwune‑eè nə̀ə́ é Juda, e kùúy vifá fo ntoʼ, e kùúy vikǐy ntoʼ wùn à wón ntoʼo, ku bèr Jehoahas[26] woo wán və wo terí.

¹⁸Vinyo vìn vi shaà, NYÙY TÀR nèn màʼ yàsí woó vito wo bó yòʼ dzə̀ á fèr e Fòn Jehoram wùn.

¹⁹Ghán sí kú a dù, viyá vi lòo mày ji vibaà, yàsí távkír é wùn wó, vitó və́ ví fəə́ fó kwaʼ, wù nèn lày, a wù dzə̀ é mvə̀m nyar ye tavíné. Wír vəə́ yòʼ‑oò lo tòn və́y wóo ghvəm kpú rə́ shó mo vé‑eè ton, ghvə́m kpú atàr və́.

²⁰Vé‑eè kòʼór Jehoram ji fon, a wù dzə̀ kiyá nshòv sibaà e mtaár. Wù sáʼ vifon kiyá waamé, a wù dzə́ e Jerusalem. Wù‑uù lày, la wìr yòʼ tòŋ kpú rə́, fə̀m e mòʼón. Vé‑eè lìtì wun e Ŋkàlaʼ Davir, yii bèy, a yòʼ dzə̀ é fəm fo vé‑eè litì ámóʼ vee afon.