Read Lamnso 2 Wòŋ 28 Bible Online

2 Wòŋ 28 - Lamnso bible

2 Wòŋ 28

¹Vé‑eè kòʼór Ahas ji fon, a wù dzə̀ kiyá mbaà. Wù sáʼ vifon kiyá nshòv ntuùfú e ghvə̀m, a wù dzə́ e Jerusalem. Wù yòʼ‑oò ló a jùmrì liì tàr wov Davir. Á bèy, wù nèn a yiì vinyo vee la ví yòʼ a gheén NYÙY TÀR.

²Wù‑uù jumrì kfə́ a dzə̀ vinyo ve afon veé Israyi‑iì yii. Wù lò yímóʼó, e fèr mebvə̀m mee nyùy woo *Baal e kisha ki,

³e kfə̀n lò, a tòn kiláy é Kiwoóy ké Ben Hinnom. Wù kfə̀n‑eè bìʼnìn viŋkoʼòy ve vinyò ve vitúm ve NYÙY TÀR‑iì jùmèn fo wír veé Isray mbìy vi‑iì yii. Wù‑uù lì wón və́, e tòn, e cù anyùy sho.

⁴Wù kù‑uù yii cu si, ton kiláy é virə̀ʼ vé anyùy, e kù a yiì bèy e vitu ve agwan, a yiì e sar se vici ve ví rə̀ŋsìn vidzə̀m.

⁵Á bèy, NYÙY TÀR woo Nyùy və nèn wày wun e fòn woó Siiria kiwo, wù tòn wun, e kùúy wíri agháʼán, e dù sho e Damaskus. Nyùy kfə̀n‑eè wày Fòn Ahas e Peka woo fon woó Isray kiwo, wù tòn e dzəə ye bi, e yùyrí wíri nyanyày.

⁶Peka woo wan Remalia və̀n‑eè yùyrí wíri nsə̀kì kishóv mbaà é wiì (120,000) kishiíy kimòʼón, a kù dzə̀ vé rər vee antav adzə̀m. Kí‑iì kòóy ben, bìʼ fo wír veé Judàa‑aà màʼàyìn ne NYÙY TÀR woo Nyùy atàr vév.

⁷Vé‑eè lòo màʼ rə́r bey, Sikri woo wir rə̀r woó Isray wo tavín wùmòʼ yúyrí wan Fòn Ahas woo Ma‑Aseyia, e yùyrí Asrikam woo taà ntoʼ wo kuʼùn, e yùyrí sa Elkana wo wù‑uù tóm fon.

⁸Wír veé Israyi kfə̀n‑eè koòrí vikǐy afə́r vév vee wír veé Juda, e koòrí wóné, wìr dzə̀m wáa dzə ansə̀kì ghii baà (200,000). Áwune kfən kùúy nsàʼmboʼ nyanyày, e kfə̀n shó e Samaria.

⁹Ŋgaà ntum NYÙY TÀR[32] wùmòʼ‑oò dzə̀ é mvə̀mlaʼ yee Samaria, a yír rəə́ dzə̀ Oded. Wù‑uù fəə̀, e dù yèn vé rərí, aá sí nəə e mvə̀mlaʼ, e sùúy aáwune jii, «NYÙY TÀR woo Nyùy atàr vén‑eè shwìíy kilòŋ wùn à wír veé Judàa, e wày áwune e věn kiwo. Vèn nèn lò kén, e yùyrí áwune, e shaàsìn, NYÙY TÀR yú é yuv.

¹⁰Lèn və̀n, vèn kfə̀n sí taʼ ji vilum wùn à vikìy veé Judàa, à veé Jerusaleme wáa dzə ji akwàn vén. Bó vèn yòʼ buʼtì sa vinyo ve bi ví e NYÙY TÀR woo Nyùy won a?

¹¹Vèn yuúrí, é m suúy ven. Wír ve vèn koon, a wìy sho ji vé sháŋ víne dzə̀ afə́r vén. Vèn siir é bàm, fo NYÙY TÀR maysi, e shwìíy kilòŋ, e màʼ ŋgeʼ e věn kitu.»

¹²Atǎr wòŋ veé Isray ámóʼó fəə́ sá, e mèŋ kinyo ke vé rər víne yiìn. Atǎr wòŋ vìne‑eè dzə̀ jii, Asaria woo wan Jehohanan, Berekiya woo wan Meshillemot, Jehiskiya woo wan Shallum, e bóo lì Amasa woo wan Hadlay.

¹³Áwune‑eè sùúy e vé rərí jii, «Lá vèn yòʼ wìy e wír ve vèn koon víyi é mvə̀mlaʼ. A vèn mùm, bo vèn màysì ne, e jàŋ lǒn NYÙY TÀR e vèsə́n kitu, e tàtí lòn wo vèsən sí kér bìʼ vinyo vesən ve bi ví. Lòn wosəné kùʼ e ŋàŋ, a ŋgeʼ NYÙY TÀR ye biibí sí kiʼ Isray.»

¹⁴Á bèy, vé rər víyi nèn màʼtì wír ve áwune‑eè koorin, e màʼtì sa nsàʼmboʼ, aàtǎr wòŋ wùn à wìr dzə̀m tíy fo si.

¹⁵Atǎr wòŋ vìn, ve á yòŋrìn yír séví nèn lì wír ve vé‑eè màʼtìn vin, e lèéy ndzə̀y fó nsàʼmboʼ, e fò e wír ve vé‑eè dzəə̀n kinshóʼo, á sə́tí kinshóʼ kév shó. Vé‑eè fò ndzə̀y wùn aàlábáʼá aáwune, e fò sá vifá ve yi wùn à ve noón ví, e wày kifú aáwuné vileemé. Vé‑eè lì wír ve vitaáví ví‑iì màyìn ne fo áwuné wùn, e dzə̀ʼə̀r e kitu ke vimbèʼbìy, e nèn tsəə̀né wir dzə̀m, e dù sho e Jeriko woo Ŋkàlaʼ Tèn, e wày e wír véví wo. Á bèy, wír veé Israyi nèn kfə̀n é bàm é Samaria.

¹⁶Wáa dzə e ghan fóo fèy, Fòn Ahas tsə́nsí ntum fo fòn woó Assiriya wùn ji wù sə́ á wun.

¹⁷Wù‑uù tsə́nsi bèy, a wír veé Edome wíy ne, e nə̀ə́ Juda e rə́r sí, e koòrí wíri, e dù sho.

¹⁸Kù‑uù dzə̀ é ghan fen, a wír veé Filistiàa nəə́ ne sa áwune, e faàsì vifá fo ntèʼ seé mbìv bvə̀m agwan, e faàsì sa fo ntèʼ seé mbìv yee tsə́n. Áwune kfə̀n‑eè faàsì ŋkàlaʼ yee Bet‑Shemesh, e faàsì yee Ayjalon, à yee Gederot, e kfə̀n faàsì ŋkàlaʼ yee Soko wùn à ntèʼ sə́ sí, à Timnaa wùn à ntèʼ sə́ sí, e lì Gimso wùn à sə́ see ntèʼ sí. Áwune‑eè faàsì bey, e nèn a dzə fo ji nsay yev.

¹⁹NYÙY TÀR‑iì sèn Juda bèy, bìʼ Ahas woo fon woó Juda[33] wo wù‑uù dòmsìn wír veé Juda, á wáa yiì vinyo ve bi ví, a wúnwun kitú kfə́ kù méŋ NYÙY TÀR méŋén kifur.

²⁰Fòn Tilgat‑Pilneser woó Assiriya nèn lò, e wìy kfə́, e làa yòʼ sə Fòn Ahas gheéy. Wù ku nə̀ə́ wun a dzə̀ e rə́r sí, vinyo vi nèn màysì, e fòy fòyìn.

²¹Fòn Ahas nèn lì vifá fo lav cù, e lì fo ntoʼ, à fo atǎr wòŋé lav si, e shwì fon woó Assiriya sho, la kí yòʼ fə̀m sə̀ wun gheéy.

²²Yì‑iì dzə̀, a vinyo ve Fòn Ahas vi fóy ne fóyin, Fòn Ahas və̀n ku shaà fo mbìy, a bùʼtì vinyo ve ví wáa tinsín NYÙY TÀR, e shaà mo wù‑uù buʼtì fo mbìy.

²³Wù‑uù lò, e nèn a cù anyùy wìr veé Siiria, wír veé Siiria ve vé‑eè tònèn wun. Wù‑uù cu bèy, kwaʼtì jii, mo anyùy veé Siiriàa səən áwune, bo a wun lò, a cù, bo dzə̀ á sə̀ á sa wun. Anyùy vìne nèn lò, e wìy a dzə̀ e lòné e wun kitu, à woŋ vəə́ shó e dzə̀m.

²⁴Fòn Ahas kfə̀n‑eè bùʼtì vinyo vímóʼ ví. Wù‑uù bàʼtí vifá ve ker vee NYÙY TǍR lav, e bvə̀ʼtí bvəʼtín, e fìnrì shuu se lav, e kfə̀n tùúy kíy se cù virə́ʼ vidzə̀m e Jerusalem.

²⁵Wù kù‑uù bòm virə́ʼ vé cù e ŋkà se laʼ seé Juda sidzə̀m ji á wáa tòn a kiláy fó, a cù anyùy sho. Kinyo kìn ki nèn ŋàʼár dòʼshwiiy NYÙY TÀR woo Nyùy atàr vév.

²⁶Ké vinyò vímóʼ ví vee Fòn Ahas mvə̀m saʼ, à liì və woo kèʼ fó kèʼ, e dù, e màysì, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda wùn à veé Isray.

²⁷Fòn Ahas‑iì lày, la á yòʼ lìtì wun e fəm wó afòn veé Juda[34]. Vé‑eè lìtì a dzə̀ é ŋkàlaʼ e Jerusalem. Á bèy, wan və woo Hesekiya nèn yì vifon, a saʼ e wun ntaʼ.