Read Lamnso 2 Wòŋ 3 Bible Online

2 Wòŋ 3 - Lamnso bible

2 Wòŋ 3

¹Á bèy, Fòn Solomon nèn kèʼ, a bàʼrì lav cù NYÙY TÀR é Jerusalem, e gwan Moria, fo NYÙY TÀR‑iì fəəsin e Davir woo tàr wóv si. Wù‑uù baʼrì a dzə̀ é kirə̀ʼ ke Fòn Davir‑iì dìnèn, fo riímé Arauna[5] woo wir Jebusi‑iì dzəə̀n.

²Wù‑uù kèʼ kibaʼrì e kishiíy ke kí‑iì meen ji baà fó ŋwee woo baà, a wù sí sáʼ ji viyá vikweè.

³Lav cù ye Fòn Solomon‑eè baʼrì‑iì dzə̀ fó vikùʼùy, kóy nshòv sitàn e ghvə̀m, a mbvə̀ʼ dzə̀ kóy e tàn.[6]

⁴Shúu kibùʼ wo wú nəə e lav cùu‑uù dzə̀ kóy e tàn fo vikùʼùy réŋréŋ mo mbvə̀ʼ lav cù dzəə̀n, a vida vee kóʼ é yuv ví dzə̀ kóy mtaár. Mvə̀m kibùʼ wáa dzə, aá láʼtí *kisha ke mbàm ke baar kee wúntí kíwun e wùn wó.

⁵Ŋgày lav cù nén a dzə, aá báʼáy e kicí ké dzəʼə̀y kí, e làʼtí kisha ke mbàm ke baar ke juujùŋ ki é wùn wó, e fèr nsáŋti viyaŋ wùn à wo ashàŋ e wùn wó.

⁶Fòn Solomon‑eè nàvtì lav cù e kfə́ə sibaŋé, e kfə̀n nàvtì e kisha ke mbàm ke baar kí, a dzə̀ kee lò fó Parvayim.

⁷Vé‑eè nàŋsín lav sho fo mvəm, e làʼtí e vimàʼ ve kikfəv, e làʼtí e wùn sé lav, e làʼtí e mboòmè se shuù se lav, e làʼtí sa aànshìy shuù se lav. Vé‑eè yiì nsáŋti *vifa veé yuv ve ví kér vav si é wùn sé lav.

⁸Lav yee fó mvəə́mvəm ye dzəə̀n kirə́ʼ kee jeéy kí féyì, yì‑iì dzə̀ kóy e tàn fo vikùʼùy, kù réŋréŋ mo mbvə̀ʼ lav cù dzəə̀n. Mbvə̀ʼ wáa dzə sa kóy e tàn. Fo mvəm, vé‑eè làʼtí kisha ke mbàm ke baar ke juujùŋ ki é wùn wó, a kí dzə̀ fó vidzəə̀sì moo kilu nsə̀kì mbaà (20,000) bey.[7]

⁹Mban si kù‑uù dzə̀ sá kisha ke mbàm ke baar kí, a vé‑eè lì kisha moo kintoʼnìn ke kilu bèy,[8] e bóo fèr sho. Mewón me lav mee fó yuv mè wáa dzə, aá láʼtí sá kisha ke mbàm ke baar kí é wùn wó.

¹⁰Fòn Solomon kfə̀n‑eè yòŋ, á fèr nshwìnin vifa veé yuv ve ví kér vav si vímóʼ ví vibaà e kicí kí, e làʼtí kisha ke mbàm ke baar kí é wùn wó, e tìír e kirə̀ʼ kee jeéy kí féyì.

¹¹Ví wáa tiy fo, e nàsì vav sév, sí yí kirə́ʼ kóy e tàn, a vav ye mòʼóne dzə̀ kóy e ntàm se kiwo si sibaà. Váv kímóʼ kií‑iì kum wún lav fo mbìv fen, a yé kímóʼ kií kum fo mbìv fésə, a see fó kintìntìn si kumnìnè.

¹³Á mo vifá veé yuv vin vi‑iì nàsìn vav, sí yí kirə́ʼ kóy e tàn, a ví kù tíy e lav yee fó mvəm, kiʼ ye kuʼùn.

¹⁴Vé‑eè fèr raŋ e ndzə̀y ye á baan e làv wo wù səə́ne moo yúv, wùn à wo wù səə́ne moo yòm, à wo wù baŋ ji rèm, e bóo lì ndzə̀y see bá e làv wo fəvír woo fèm. Vé‑eè tsə̀m nshwìnin vifa veé yuv ve ví kér vav si é wǔn ndzə̀y fóo fèn.

¹⁵Fòn Solomon kfə̀n‑eè yòŋ, á fér vitóm vibaà, e tìír e shùu lav cù, a vida vi dzə̀ é mbuù ntàm se kiwo sibaà fó koy bvə̀ʼə̀ bvə̀ʼə̀. Ví‑iì kér tán sí fó vitu, a ye mòʼóne dzə̀ kóy e ntàm se kiwo si sibaà.

¹⁶Vé‑eè fèr ashàŋ ve á wovsin, e kaàrí e vitu ve vitom, e kfə̀n fèr vitúʼtúʼ wií, e keèrì sho.

¹⁷Vitóm vi‑iì tíy e shùu lav cù, a kee kimòʼón ki tíy fo mbìv yee tsə́n, aá yoŋ yír ji Jakin, a kímóʼ kí tíy fo mbìv yee kuy, aá yoŋ yír ji Boas.