Read Lamnso 2 Wòŋ 30 Bible Online

2 Wòŋ 30 - Lamnso bible

2 Wòŋ 30

¹Fòn Hesekiya yiì lò, e tòóy wír veé Isray wùn à veé Judàa adzə̀m, e bònen sàŋ ŋwàʼ fo wír veé nsay Efrayim wùn à veé nsay Manassèe. Wù‑uù tòóy wir dzə̀m ji á wiy á e NYÙY TǍR lav e Jerusalem, e yiì a *Ŋkǎʼ Yáʼayshaà, e ghvə̀m NYÙY TÀR woo Nyùy wìr veé Isray sho.

²Fòn wáa toóy bèy, a wùn aàtǎr ntoʼ vəə́, à wìr dzə̀m wo wù‑uù dzəə̀n é Jerusalem kì sùŋnín ne, e yèn ji bòŋ aá kóʼór á Ŋkǎʼ Yáʼayshaà, e yì a dzə̀ é ŋwee woo baà fó kiya.

³Áwune yòʼ‑oò ló a ker kintóʼ kée yi ŋkàʼ vən e ghan se á yii yí, bìʼ fo atàá cùu yòʼ‑oò ló ne *kfə̀mrí vitú vév anín, a bó wíri yòʼ‑oò ló ne bàʼtí sa e Jerusalem.

⁴Vé‑eè sìysì kinyo kìn ben, kí gheén fon wùn à wíri.

⁵Á nèn shù ji á toóy á wir dzə̀m woó Isray, e kèʼ fo Beersheba, e dù, e mèé e Dan ji áwune wiy á lèn e Jerusalem nyanyày mo nsər suuyì, e yiì a Ŋkǎʼ Yáʼayshaà wóo ghvəm NYÙY TÀR woo Nyùy wìr veé Isray sho.

⁶Fòn‑eè yòŋ bey, vé ntume lì aŋwàʼ ve vé‑eè loòn fo wun woo fon wùn aàtǎr ntoʼ vəə́, e ghànén sho woŋ Isray e dzə̀m wùn à woo Judàa e dzə̀m. Vé‑eè sàŋ áàŋwàʼ fèn jii: «Wír veé Isray, vèn kfə́n é bàm e NYÙY TǍR wùn, Nyùy Abraham wùn à Aysi, à Isray. Vèn kfə́né, é wù nèn bìnkìr, e lèéy ven ve á berin, ven ve á sòsìn fo afon veé Assiriyàá wo.

⁷Lá vèn yòʼ bìʼnìn kinyo ke atàr vén, à ké afə́r vén ve vé‑eè loòn, e màʼày NYÙY TÀR woo Nyùy atàr vév, e nèn yiì, wù máʼ ŋgeʼ aáwuné kitu, wóŋe dú é vifə̀m, a vèn dzə̀ á yén sá e sí yéné.

⁸Lá vèn yòʼ a tav kitú moo atàr vén. Vèn wáa yu fo NYÙY TÀR. Vèn wáa wìy e lav cù yeé Jerusalem, lav ye NYÙY TÀR woo Nyùy won lèmèn jeéy ji rə́ə, e wìy dù, e jòʼsì. Vèn wáa ghvəm wun, é la dòʼshwíiy və wo tavín yòʼ dzəə ŋàʼáy, e kìʼ ven.

⁹A vèn lòo dzə, e bìnkìr, e kfə̀n e NYÙY TǍR wùn, bo wù yíi yiì, é wír ve á koorin afə́r vén, wùn à wón véné shám mendzən mev, e siìr áwune é nsay fèn. NYÙY TÀR woo Nyùy won dzə̀ ŋgaà mendzə̀n, a kfə̀n dzə̀ ŋgaà nshámmé. Bó yòʼ dzə̀ wù bìn ndzə̀m e vèn, a vèn fen kfə̀n é bàm é wùn wó.»

¹⁰Aŋgàa ntume‑eè ghànén ŋkà se laʼ seé nsay Efrayim wùn Manasse sidzə̀m, e dù bèn, e mèé e nsay Sebulun. Vé‑eè ghán bèy, a wíri kù shéʼ áwune shéʼén, keŋè.

¹¹Yii bèy, wír ámóʼó ku lò ashàr fo rám Asher, à fo yé Manassèe wùn à yé Sebulune, e ghvə̀m toóy, e dù e Jerusalem.

¹²Ké wìr veé Juda ki wáa dzə, a Nyùy‑iì lo màʼ sa kiwó aáwuné wùn, á wáa ker kwaʼtì e mòʼón, e nèn yù sáʼ ye fòn wùn aàtǎr ntoʼo‑oò foon ji á wáa yiì a mo kinyo ke NYÙY TÀR kí dzəə̀n.

¹³Wíri nèn bàʼtí e Jerusalem nyanyày e ŋwee wo wú‑uù meen ji baà ji á yí á *Ŋkǎʼ Kiban kee là Nyaà.

¹⁴Á kèʼ vinyo, e nèn sàʼ kíy se cù wùn à sé kilay se sí‑iì dzəə̀n é Jerusalem si, e kùúy, e dù, e màʼày e Kiwoóy ké Kidron.

¹⁵Wáa dzə e kishiíy ke kí‑iì meen ji nshòv sikweè e ghvə̀m fo ŋwee woo baà, wíri nèn seèrí wón njìi Ŋkǎʼ Yáʼayshaà. Kú a dzə e ghan sin, aàtàá cù wùn à wír veé ram Levìi *kfə́mrí ne vitú vév, bìʼ fo vé‑eè lò, e woòmé kighvəə́ ke vé‑eè ghvəən fó mbìy. Á nèn a lì lèn nyám se cù ye tonèné, a wìy sho e NYÙY TǍR lav.

¹⁶Á wìy bèy, e tìím aáwuné virə̀ʼ vé lìm e lav cù réŋréŋ mo kí dzəə̀n é Ŋwàʼ Nsər Mooser, wun woo *ŋgaà ntum Nyùy. Wír veé ram Levìi nèn a lì mensə́ me nyàm se cù, a fo aàtàá cùu, á wáa waŋrí e kiy cù.

¹⁷Ké màŋgòŋ wo wù‑uù seéri wón njìi Ŋkǎʼ Yáʼayshaà, wír ámóʼó wáa dzə fo anín, aá yòʼ‑oò lo kfə̀mrí vitú vév. Bìʼ bey, wír veé ram Levìi nèn sə̀ wír adzə̀m ve bó á yòʼ‑oò siìn aránén, e seèrí wón njiì vév, é NYÙY TÀR fiʼ bìnsí ŋkàʼ wóv.

¹⁸Kùʼùn wìr wo wù yòʼ‑oò lo kfə̀mrí kitú‑uù lò fó nsay Efrayim, e lò fo ye Manasse, à fo ye Issakar wùn à ye Sebulun. Áwune‑eè wìy, e yì Ŋkǎʼ Yáʼayshaà və̀n, a bó á yòʼ‑oò yíi yi. Vé‑eè yì, bìʼ fo Fòn Hesekiya kì bùnrìn ne fo áwune, e lòn NYÙY TÀR ji wun wo wù dzəə̀n e juŋ, wù ku làysìn a ajay wìr vìn.

¹⁹Wù ku làysìn a ajay wìr dzə̀m wo wù tiir shilív sə́ e wun wùn, wun woo Nyùy atàr vév, fə̀m mo áwune yoʼ kfə̀mrí vitú vév mo nsər yeé lav cù dinè.

²⁰NYÙY TÀR nèn yù bunrì Fòn Hesekiya, e làysìn jay wov, e làa yòʼ dzə́ə yiì kinyo aáwune.

²¹Á bèy, wír veé Isray ve vé‑eè baʼtin é Jerusaleme nèn a yi Ŋkǎʼ Kiban kee là Nyaà e kishéʼrì ke tavín kí, kishiíy saàmbà. Wír veé ram Levi wùn aàtàá cùu wáa sùyrì NYÙY TÀR kishiíy kidzə̀m, aá kwáʼ vifá, vitaáví vév vidzə̀m.

²²Fòn Hesekiya‑aà bùrí wir dzə̀m woó ram Levi bìʼ dzə́ə ye juujùŋ ye áwune‑eè sùyrìn NYÙY TÀR shó. Á bèy, á yí ŋkàʼ kishiíy saàmbà, yí bèy, yii cú kikòŋnìn, kfə̀n suyrì NYÙY TÀR woo Nyùy atàr vév.

²³Wìr dzə̀m nèn sìysì ji á kfən siì yì á ŋkàʼ vən vishiíy vímóʼ ví saàmbà. Á ku nèn yì kishéʼrì kishéʼrì, kishiíy saàmbà.

²⁴Fòn Hesekiya‑aà fò nàʼ nsə̀kì wùn à bvə́y si nsə̀kì saàmbà e màŋgòŋ. Atǎr ntoʼo fó sá nàʼ nsə̀kì wùn à bvə́y si nsə̀kì ghvə̀m. Atàá cùu wáa dzə, a vé‑eè lo kfə̀mrí vitú vév agháʼán.

²⁵Wìr dzə̀m‑eè shéʼri, yú vijuŋ. Vé‑eè dzə̀ jii, wír veé Juda, wír veé Isray, atàá cù wùn à wír veé ram Levi, e bóo lì viŋgwìy ve ví‑iì wìyìn fó Isray, à ve ví‑iì dzə́ e Juda vi.

²⁶Kishéʼrì ke tavín kí‑iì dzə̀ é Jerusalem. Bó kfə́ə ŋkàʼ woo bene yòʼ‑oò ghàn ne a dzə e Jerusalem, e kèʼ fo Fòn Solomon woó Isray ghan, wun woo wan Davir.

²⁷Ŋkàʼá lòo mày, atàá cù wùn à wír veé ram Levìi tiím, a bùnrì, a səə̀vì wíri. Nyùy nèn yù bunrì yév é yuv, e səə̀sí fo wù dzə́ e wun kirə̀ʼ ke ranén kí.