Read Lamnso 2 Wòŋ 32 Bible Online

2 Wòŋ 32 - Lamnso bible

2 Wòŋ 32

¹Fòn Hesekiya‑aà yiì vinyo vìn vidzə̀m e dzəə ye yì gheén NYÙY TÀR. Fòn Sennakeriv woó Assiriya nèn lò, e wìy, e nə̀ə́ rə́r é Juda. Wù nəə́ bey, e gìm ŋkà se laʼ see vikum ji wun lo, e bvəʼ kay, e tòn a fó, e yòv.

²Fòn Hesekiya yén ji Fòn Sennakeriv wìy bèy, a wù sí báʼti a ji wun nəə́ Jerusalem e rə́r sí,

³wù nèn kùm atǎr ntoʼ wùn aàmfòómé vəə́ ji wùn áwune wàá súŋnín. Wù nèn shù ji á biner á ntòŋ sé ndzəv se sí dzəə̀n é ghaa ŋkàlaʼ, é la ndzə́ví yòʼ dzə́ə a leŋ a fo. Á biímé nshù woo shooy.

⁴Wíri nèn bàʼtí nyanyày, e bìnèr ntòŋ sé ndzəv sin, la ndzə́ví yòʼ dzə́ə a fəə, a leŋ e nshwǎn ndzəv. Vé‑eè binèr bèy, suuy ji kí yoʼ ghèén a ji afon veé Assiriyàa yiì wìy, a ker mendzə́v menín mé a no.

⁵Fòn Hesekiya kfən yòŋ, á bàʼrì kay yeé ŋkàlaʼ ye yí‑iì kèrkìn ne, yí kfə́n fó, e bòm virə́ʼ vé ŋkiy e kitu wo.[38] Wù kfə̀n‑eè bòm yímóʼ yee kay, yí kaárí ye yí‑iì siìn, e bòm vitóm ve ví tóm kfə̀m woó Ŋkàlaʼ Davir wo vé‑eè bomen. Wù kfən fèr vifá ve rər vigháʼán, aàŋkèe sá sho.

⁶Fòn Hesekiya kfən shòʼtí amfòómé ji á wáa saʼ wíri, e nèn lò, e bàʼtí áwune é maàndzə yeé shùu kibùʼ keé ŋkàlaʼ, e sùŋnín, e tàvír áwune. Wù‑uù yòŋ jii,

⁷«Vèn kúr tímé, e wày ŋàŋ. Lá vèn yòʼ a fàn, lá vèn yòʼ weèy bìʼ fon woó Assiriya wo wù wiy e vé rərí anín. Vèsən kér ŋgaà wo wù kér vitaáví e vèsə́n mbìv, a bó fòn woó Assiriya yòʼ kérí.

⁸Wù maʼ kfə́ rə́r a dzə̀ e vitaáví vé wìr msòŋ ví. Yii bèy, fo késən kí, yíi a màʼ NYÙY TÀR woo Nyùy wòsən rə́r, a fo e vèsən.» Kisúŋnìn ke Fòn Hesekiya woó Juda kìn ki‑iì lùmèr melív me wíri, á wáa wàrkìr.

⁹Wáa dzə e ghan sin, a Fòn Sennakeriv woó Assiriya wùn à və́ vé rər adzə̀me sì é Lakish, aá gím ne ŋkàlaʼ, a ghiʼ fó e rə́r sí. Wù nèn lò, e tsə̀nsí atǎr ntoʼ və́ é Jerusalem ji a tiísí á ntum e Fòn Hesekiya, e tiìsí saa e wír veé Juda ve á dzəə̀n é Jerusaleme adzə̀m.

¹⁰Á dù, e tiìsí ji Fòn Sennakeriv woó Assiriya yoŋ a jii, «Vèn tìír vifií vén a dzə̀ é gha, bó a kwàʼtì ji m yíi wìy, e gìm ŋkàlaʼ e rə́r sí, é vèn luŋ?

¹¹Hesekiya kù bóʼti ven bóʼtín. Mo wù yoŋ ji NYÙY TÀR woo Nyùy won yíi fəə́r ven fo fòn woó Assiriya kiwo, wù sí taʼ a dzə̀ ji vèn kpú á jíŋ, e kpu kilòŋ ke yumén kí.

¹²Bó yòʼ kù dzə̀ wun woo Hesekiya və̀n wo wù kètìn virə́ʼ vé cù ve NYÙY TÀR wùn à kíy sə́ sé cù si, e kètì bèy, e yòŋ e wír veé Jerusalem wùn à veé Judàa ji á kú a cù Nyùy e kiy cù e mòʼón, aá kù yíi a tòn cu si a dzə̀ fó à?

¹³Kí vèn kì kinyo ke vèr aàtàr vém ve vé‑eè saʼan ne e mǒ mbìyi‑iì yiìn e vitúm vímóʼ ví? Anyùy veé vitum fène yòʼ‑oò lo sə̀ woŋ sév fə̀m à shishàr sho fo mǒ kiwo.

¹⁴Fo mvə̀m vitum ve atàr vémé‑eè tònèn, nyùy kitum‑eè ló a dzə sho wóo bòyìr kitúm kfə́ fo mǒ kiwo a? Vèn ghàn é le, e bó a kwàʼtì ji Nyùy won yíi fəə́r ven fo mǒ kiwo?

¹⁵Kí nén a dzə jii, vèn wáa yen a fo Fòn Hesekiya bóʼtí ven, e yiì, é vèn jáy dzə́ə. Lá vèn yòʼ a tiír vifií e Hesekiya wùn. Bó nyùy kitum kímóʼ kí, kìn nyùy wìr ámóʼó yòʼ‑oò yiì ne bòyìr wír və́ fo mǒ kiwo, kìn fo atàr vémé kiwo. Vèn wáa kwàʼ ji wóon woo nyùy yíi ghan kfə́ é le, e bóo fəə́r ven fo mǒ kiwo?»

¹⁶Atǎr ntoʼ Fòn Sennakerivi kù‑uù shaà fó mbìy, a kuù, a suŋnín kibí kùm NYÙY TÀR, wun woo Taà Ndzə, à ŋgaà lìm və woo Fòn Hesekiya.

¹⁷Fòn Sennakeriv kfə̀n‑eè sàŋ ŋwàʼ, a kuùrì NYÙY TÀR woo Nyùy wìr veé Isray sho. Wù‑uù sàŋ shó jii, «Anyùy vitum ve ví kaarin verí yòʼ‑oò lo fə̀ə́r wír vév fo mǒ kiwo, a bó yòʼ dzə̀ nyùy Hesekiya fə̀ə́r sá wír və́ fo mǒ kiwo.»

¹⁸Atǎr ntoʼ Fòn Sennakerivi nèn a yòŋ kinyo ke kí‑iì dzəə̀n é ŋwàʼ kìn, a waamé waamén é Lǎm Hibru ji wír veé Jerusalem ve á dzəə̀n é kitu ke kàyi yú, lóo fàn, lóo yàʼ, aáwune fiʼ nə̀ə́ a fo tèr, e faàsì ŋkàlaʼ.

¹⁹Vé‑eè súŋnin kùm Nyùy wìr veé Jerusalem fo tèetèr mo á sùŋnín kùm anyùy ve vitúm vímóʼ ví ghvə́m e kitu ke nsay, aànyùy vìne kù dzə̀ vifá ve á fèrìn férin e wóo.

²⁰Fòn Hesekiya wùn *ŋgaà ntum Nyùy woo Aysaya woo wan Amot nèn beè Nyùy e kinyo kìn ki, a lon ji wù ku sə̀ á áwune.

²¹NYÙY TÀR nèn tsə̀nsí nshìylav rə, yì wìy, e yùyrí wir dzə̀m wo wù‑uù dzəə̀n e wír veé Assiriyàá kilaʼáy. Wù‑uù yùyrí vé rərí wùn aàmfòómeé, à vitú vév vé rər ví. Fòn Sennakeriv nèn kfə̀n é bàm e woomé sí si. Wù yiì lò, e nə̀ə́ e nyùy və́ lav ji wun wàa cu, wón və́ ámóʼó yúyrí wun e nyùy yev rə̀r.

²²Á bèy, NYÙY TÀR nèn bòyìr Fòn Hesekiya wùn à wír ve vé‑eè dzə́ e Jerusaleme fo Sennakeriv woo fon woó Assiriya kiwo, à fo aŋgàa vibàn vév ámóʼó kiwo, e nèn yiì, áwune wáa ker rəsìn mbìv sidzə̀m.

²³Wír aneéníne nèn a wìy aàfómoó é Jerusalem, a fo e NYÙY TÀR, e kfə̀n a wìy e vifá veé kilùm vi, a fo e Hesekiya woo fon woó Juda. Kèʼ fo ghan see shooy, vitúm vidzə̀m vi‑iì ghvə́m Hesekiya ji wír wo ghaʼán.

²⁴Wáa dzə e ghan see shooy, Fòn Hesekiya gbù yàsí, e bèr gheéy fó kpu. Wù bùnrì NYÙY TÀR, wù yú bunrì rə́, e fò wun kisəəm kee ji wù waà yíi bonén.

²⁵Fòn Hesekiya lò, e nèn a koʼór a dzə̀ wún, e làa yòʼ a beèrì Nyùy béerin fó vinyò vidzə̀m ve wù yiìn e wun. Nyùy nèn yù nyár, e bàʼtí ŋgeʼ, a kìʼ Fòn Hesekiya wùn à wír veé Jerusalem, à veé Judàa shó.

²⁶Á bèy, Fòn Hesekiya wùn à wír ve vé‑eè dzə́ e Jerusaleme nèn biìmé jay wov, e neèr kiŋkoʼòrwùn kév. NYÙY TÀR nèn tèér ŋgeʼ yee shooy, e làa yòʼ dzə́ə màʼ aáwuné kitu, a Fòn Hesekiya dzə̀ə́ sho.

²⁷Fòn Hesekiya‑aà kér bùʼ wo wù‑uù meen é bùʼ, a wíri kóʼor yír rə́ é ŋàŋ. Wù‑uù bàʼrì vitáv ve á wáa lèm bùʼ və woo kisha ke mbàm ke fəvír kí wùn à ke baar kí, à *síbaŋé, à virə̀ʼtìn ve bìʼ vi, e bóo lì aŋkeè wùn à vifá veé kilùm vímóʼ ví vidzə̀m.

²⁸Wù bàʼrì vímóʼ vee vitáv ve á wáa lèm vifá ve yi sho, a lèm meluʼ wùn à meŋgvə́r me *oliv mè, e kfə̀n bàʼrì vibìn vé kifa keé njà nàʼ kidzə̀m, e bàʼrì sa vé bvəy si.

²⁹Nyùy‑iì fò wun káv e gháʼán, wù nèn bàʼrì ŋkà se laʼ see ji bàʼrì a wun, e kfə̀n a ker ŋgoo se bvəy nyanyày, à sé nàʼ si.

³⁰Fòn Hesekiya‑aà sə̀r ntoò ndzə̀v yee Gihon, e lì, yí sə́y é Ŋkàlaʼ Davir, a leŋ, a dù e mbìv yee fo shùy yii nəə. Vinyo ve Fòn Hesekiya‑aà yii vidzə̀m vi‑iì ghán kijuŋ.

³¹Fə̀m é ghan se vé saʼ veé Babilone‑eè tsənsin wír vév fo wun woo Fòn Hesekiya wùn ji á wiy, e dzə̀r á kisəəm ke Nyùy foon e wun, Nyùy kù‑uù màʼtì ji wù fó á binèr yee kwaʼtì rə́, e fíʼ taasín wun, e yen kinyo ke kí dzəə̀n e wun shiliv.

³²Ké vinyò vímóʼ ví vee Fòn Hesekiya mvə̀m saʼ, à vinyo ve juŋ ve wù‑uù yiìn ví, ví dzə̀, aá sàŋ é ŋwàʼ vinyò ve Nyùy‑iì ghemen ndzə, e dìn e *ŋgaà ntum və woo Aysaya woo wan Amot, a ŋwàʼ və̀ne dzə̀ é mvə̀m ŋwàʼ wo dzəə̀n Ŋwàʼ Vinyò ve Afòn veé Juda wùn à veé Israyi.

³³Fòn Hesekiya‑aà lày, á lìtì e mbìv kùy kirə̀ʼ ke vé‑eè litì afon vee rám Davir sho. Wír veé Juda adzə̀m wùn à wír ve vé‑eè dzə́ e Jerusaleme‑eè dìy kpú rə́ e ghvə́me shó. Manasse woo wán və nèn yì vifon, a saʼ e wun ntaʼ.