Read Lamnso 2 Wòŋ 33 Bible Online

2 Wòŋ 33 - Lamnso bible

2 Wòŋ 33

¹Manasse‑eè dzə̀ kiyá nshòv sibaà e ghvə̀m e ghan se vé‑eè koʼorin wun ji fon woó Juda. Wù sáʼ kiyá nshòv sitàn e mtàn, a wù dzə́ e Jerusalem.

²Wù‑uù yii vinyo ve ví wáa bir NYÙY TÀR, jumrì vinyo ve koʼoyín ví ve vitúm ve NYÙY TÀR‑iì jùmèn fo wír veé Israyí mbìy vi‑iì yii.

³Wù kfə̀n‑eè bòm virə́ʼ vé anyùy ve tàr wov Hesekiya‑aà kètìn ne, e nèn bòm kíy se cù, á wáa cù mebvə̀m me nyùy woo *Baal fo. Wù fér sá wúr sé nyùy woo wiíy woo *Ashera, e tùúy e virə̀ʼ, e kfə̀n a ghvəm vifá ve ví bán e yuv vidzə̀m, a cù vifá vee shooy.

⁴Fòn Manasse kfə̀n‑eè bòm kíy se cù e NYÙY TǍR lav e Jerusalem, a dzə̀ sé anyùy, a NYÙY TÀR‑iì yiì ne yòŋ ji á kù wíy a cù a dzə̀ á wun fo, e wìy dù, e mày.

⁵Wù bóm símóʼ sí é maàndzə see sibaà seé lav cù, a dzə̀ kíy se cù se vifa ve ví bán e yuv vidzə̀m.

⁶Wù‑uù lì wón və́, e tòn ji cu, e Kiwoóy ké Ben Hinnom. Wù‑uù shwéŋ fú, du ŋgám, bee vé səme wùn à vé ŋgàŋe, bee wír ve á mbaa aŋkfə. Wù‑uù yii vinyo ve bi ví é ŋàŋ, a NYÙY TÀR yú bír.

⁷Wù‑uù lì shibvə̀m shee nyùy she wù‑uù fèrìn, e tìír e Nyùy lav, a dzə̀ kirə́ʼ ke Nyùy‑iì yòŋèn ne e Davir wùn wan və Solomon jii, «M shòʼ ne Jerusalem fo mvə̀m ràm seé Isray sidzə̀m ji kirə́ʼ kém, aá kù wíy a cù mo a dzə̀ é lav fèn, e wìy dù, e mày.

⁸A wír veé Israyi gòʼ, a yiì vinyo vidzə̀m ve m yòŋèn aáwune, a ví dzə̀ jii, á yúnín á nsər sém sidzə̀m wùn à sáʼ yémé, à vinyo ve m tinen ví, vinyo vidzə̀m ve mò‑oò foon aáwune, e shaà fo Mooser, bo áwune yòʼ dzəə́ wìy lò a fo nsay ye mò‑oò foon áàtàr véví.»

⁹Nyùy‑iì yòŋ bey, Fòn Manasse nèn lò kfə́, e sə̀ŋrì wír ve vé‑eè dzə́ e Jerusalem, à veé wòŋ woo Judàa, a vé‑eè yii vinyo ve bi ví é ŋàŋ, e shaà vitúm ve NYÙY TÀR‑iì laàrìn fo áwuné mbìy.

¹⁰NYÙY TÀR‑iì súŋnin e Manasse wùn à wír vəə́, aá yòʼ kwe.

¹¹Á bèy, NYÙY TÀR nèn yiì, amfòómé veé Assiriyàa wìy, e nə̀ə́ Juda e rə́r sí. Á nəə́ bey, e koò Fòn Manasse, e wày kiŋgov e wun yuy, e kùr wun aàsháŋ vee kisha kee *brons ki, e nèn lì wun, e dù sho e Babilon.

¹²Fòn Manasse dù, e yèn ŋgeʼ, e nèn a lon NYÙY TÀR woo Nyùy və ji wù ku shàm á wun. Wù‑uù lì kitú kfə́ lèn kitérí féyì e Nyùy woo Nyùy atàr və́ si.

¹³Wù kú a bùnrì bèy, NYÙY TÀR nèn yù bunrì rə́, e kfə̀n yèn mendzən me wù kérí, e nèn siìr wun e Jerusalem, wù wáa saʼ vifon və́ fó. Á bèy, Fòn Manasse nèn kìíy ji NYÙY TÀR waà dzə̀ á Nyùy.

¹⁴Ghán sí lòo koʼtí, Manasse kfən bàʼrì kay yeé Ŋkàlaʼ Davir yee fó ndzə, e kèʼ fo ghaa ntòŋ ndzə̀v yee Gihon, fo mbìv ye yì kiʼ fo shùy yii nəə, a koʼ koʼón é kiwoóy, e dù, e mèé e Shùu Kày Sə, e kfə̀n dù, e kaàrí gwan Ofel. Wù‑uù dzə̀sì vida ve kày, yí dár é yuv é ŋàŋ féyì. Wù kfən lèm sa amfòómé é ŋkà se laʼ seé Juda see vikum sidzə̀m.

¹⁵Fòn Manasse‑eè fə̀tí mebvə̀m mee anyùy vitum fo lav cù, e tsə̀ʼ kibámmbó ke wù‑uù tiirin fó. Wù kfən kètì kíy se cù se wù‑uù bomen é gwan woo fo lav NYÙY TÀR‑iì tíyí, à se sí‑iì dzəə̀n é Jerusalem si, e tàtí kifá kidzə̀m, e kùúy, e fəə̀ ŋkàlaʼ sho, e bóo màʼày.

¹⁶Wù nèn kfə̀n bòm kíy cù NYÙY TÀR fó, e yiì cú kikoŋnìn wùn à yé vibeèrìí, e yòŋ ji wír veé Judàa wáa ghvəm a dzə̀ á NYÙY TÀR woo Nyùy wìr veé Isray.

¹⁷Wù yòŋ bèy, wíri kú a shaà fo mbìy, a yiì cu si é virə̀ʼ vé anyùy, lóo yiì, á nèn a cù lèn a dzə̀ NYÙY TÀR woo Nyùy wov é virə̀ʼ fen.

¹⁸Ké vinyò vímóʼ ví vee Fòn Manasse mvə̀m saʼ, à bunrì ye wù‑uù bùnrìn Nyùy vəə́, à vinyo ve aŋgàa sii‑iì yòŋèn e wun, e NYÙY TÀR woo Nyùy wìr veé Isray yir, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

¹⁹Á kfə̀n sàŋ vímóʼ ví a dzə̀ é ŋwàʼ wo dzəə̀n ji Ŋwàʼ Vinyò ve Aŋgàa Si, a vinyo vee shooy vi dzə̀ jii, bunrì Fòn Manasse, wùn à binèr ye Nyùy‑iì foon e wune, à vinyo ve bi ve wù‑uù yiìn, bóo wìy a bìnèr shilív sə́ ví. Kí dzə̀ jii, wù‑uù mèŋ Nyùy, e bàʼrì virə́ʼ vé anyùy, e tìír wúr sé Ashera wùn à mebvə̀m mè fo.

²⁰Fòn Manasse‑eè lày, á lìtì e ntoʼ, wan və woo Amon nèn yì vifon, a saʼ e wun ntaʼ.

²¹Vé‑eè kòʼór Amon ji fon woó Juda, a wù dzə̀ kiyá nshòv sibaà e mbaà. Wù sáʼ vifon viyá vibaà, a wù dzə́ e Jerusalem.

²²Wù‑uù yii vinyo ve ví wáa bir NYÙY TÀR kù réŋréŋ mo tàr wov Manasse‑eè yii. Fòn Amon‑eè ghvə́m mebvə̀m medzə̀m me tàr wov‑iì fèrìn, nèn cu mebvə̀m mee shooy.

²³Wù yòʼ‑oò lo bìnèr shilív sə́, e kfə̀n é bàm e NYÙY TǍR wùn mo tàr wov Manasse‑eè yiìn. Wù kù‑uù dzəsì, nəə nə̀ə́n é vinyò ve bi ví.

²⁴Atǎr ntoʼ vəə́ nèn wìy lò, e kàr menàŋ e wun bàm, e laàr wun e wun ntoʼ.

²⁵Wír veé Judàa nèn lò kév, e yùyrí wir dzə̀m wo wù‑uù kér kiwó e fòn kpu, e nèn kòʼór Josia woo wán və ji fon, wù lì kilíŋ ke tàr wov.