Read Lamnso 2 Wòŋ 34 Bible Online

2 Wòŋ 34 - Lamnso bible

2 Wòŋ 34

¹Vé‑eè kòʼór Josia ji fon, a wù dzə̀ kiyá waamé. Wù sáʼ kiyá nshòv mòʼón e mtaár, a wù dzə́ e Jerusalem.

²Josia‑aà yii vinyo ve ví wáa gheén NYÙY TÀR. Wù‑uù jumrì a dzə̀ kinyo ke tàr wov Davir, ghán e wun mbòv, a wù yòʼ‑oò fəə́ fo ŋwàn.

³Yì‑iì dzə̀, a Fòn Josia sáʼ ne kiyá waamé, a wù kù dzə̀ə́ wánlè nsùm, wù nèn kèʼ, a ker shií wó a ghvəm Nyùy Davir woo tàr aàtàr və́. Wáa dzə, a wù sí sáʼ ji kiyá nshòv sibaà e ghvə̀m, wù nèn kèʼ, a manrí woŋ ji nsay Juda wùn à ye Jerusalem rán á fo *kifàn. Wù nèn yèr virə́ʼ vé anyùy fo wòŋ, e yèr wúr sé nyùy woo *Ashera wùn à kifá kee ji shibvə̀m ki kidzə̀m.

⁴Wù‑uù yòŋ, á kètì kíy se cù se vé‑eè cu nyùy woo *Baal sho, e bvə̀ʼtí kíy se kilay se sí‑iì dzəə̀n é ghaŋ wo, fo kùy. Wù‑uù bvə̀ʼə́y wúr sé nyùy woo *Ashera, e bvə̀ʼə́y mebvə̀m me vé‑eè semen sémén, à me vé‑eè bomen bómén mè, e yòŋ, á jò, mè dù e kibvə̀r. Wù nèn lì kibvər kìy, e tàʼár e wír ve vé‑eè táŋri mebvə̀m mee shooyí vitu ve sày.

⁵Wù kfən tòn vighvə́r vé atàá cù anyùy kisaŋe aáwuné kiy se cù fo wíri kfə́n a cù anyùy fo. Á bèy, wù nèn mànrí nsay Juda wùn à ye Jerusalem, yì rán fó kifàn.

⁶Wù kù‑uù yiì a dzə̀ kíwun kee kinyo e ŋkà se laʼ seé nsay Manasse, à seé nsay Efrayim si, à seé nsay Simeon si, e dù, e mèé e seé nsay Navtali si. Wù kù‑uù yiì sá bèy e vifə̀m veé ŋguùŋè virə̀ʼ fen.

⁷Wù‑uù kètì kíy se cù, e gwàtì wúr sé nyùy woo Ashera, e bvə̀ʼə́y mebvə̀m, mè dù e kibvə̀r, e bvə̀ʼtí sa kíy se kilay. Kù dzə̀ mo wù‑uù yiìn bey nsay Isray e dzə̀m. Wù màysì, e nèn kfə̀n é bàm é Jerusalem.

⁸Wáa dzə a Fòn Josia sí sáʼ ji kiyá nshòv waamé e ghvə̀m, a wù ránér ne nsay Isray wùn à lav cù, wù nèn tsə̀nsí Shafan woo wan Asalia, e tsə̀nsí Ma‑Aseyia woo taà saʼ woó ŋkàlaʼ wùn à Joa woo wan Joahas woo ŋgaà saŋ woó ntoʼ ji áwune du, e kfə̀n nàŋsín, e bàʼrì a lav NYÙY TÀR woo Nyùy və.

⁹Áwune dù, e yèn Hilkia woo taà cù wo kuʼùn, e fò mbàm se wír veé ram Levi ve á shiy vibuʼ ve ví nəə e lav cùu‑uù baʼtin. Vé‑eè bàʼtí fo wír veé nsay Manassèe, wùn à fo veé Efrayime, à fo kibér ke wìr veé Isray ki kidzə̀m, à fo wír veé Judàa adzə̀m, à wír veé Benjamin wùn à ve á dzə́ e Jerusaleme.

¹⁰Wír ve vé‑eè leey lim yee NYÙY TǍR lavi nèn sìíy, e sə̀ mbàm sìn fo taà cù, e làʼtì vé lìm ve vé‑eè náŋsin, baʼrì lav NYÙY TÀR ji yì kfə́n á foo.

¹¹Vé‑eè fò mbàm e vé kintaa, e fò e vé kimbome, á yún tíy ye sanéné shó, e yùn vicí ve toʼón ví vee vé vintaà, à vé vimàʼ vi, ve á baʼri virə́ʼ vé lav cù sho, ve afon veé Judàa‑aà màʼtìn, ví bír.

¹²Vé lìme‑eè lim lim là kiloʼ. Vilìmbìy ve vé lìme, ve ví‑iì leey lim vi‑iì dzə̀ Jahat wùn Obadia veé ram Levi, a dzə̀ kfə́ə Merari, e kfə̀n lì Sekariya wùn Meshullam veé ram Levi, a dzə̀ kfə́ə Kohat. Ké wìr veé ram Levi ve vé‑eè kiìn móo kùm vifá ve yòv ki‑iì dzə̀ jii,

¹³vé‑eè lèm áwune, á wáa leéy vé lìm ve vé‑eè béʼ vifá, kfə̀n a leéy vé lìm ve vé‑eè lim lim see jeéy jeéyí sí. Wír veé ram Levi ámóʼó‑oò dzə̀ aŋgàa saŋ, ámóʼó vilìmbìy, ámóʼó anshìy veé shuù se kày.

¹⁴Vé‑eè lòo fəə́r mbàm se vé‑eè wìyìn ne sho e NYÙY TǍR lav fo kitàv, Hilkia woo taà cù nèn bòŋ Ŋwàʼ Nsər NYÙY TÀR wo Nyùy‑iì foon e wír veé Israyi, e shaà fo Mooser.

¹⁵Wù nèn sùúy e Shafan woo ŋgaà saŋ jii, «M bòŋ ne Ŋwàʼ Nsər Nyùy fo NYÙY TǍR lav.» Wù suúy bey, e nèn fò ŋwàʼ e Shafan.

¹⁶Shafan lì ŋwàʼ woo shooy, e dù sho e ntoʼ, e bùn fon, e sùúy jii, «Vinyo ve vé‑ee yòŋèn fó ntoʼ vidzə̀m ji vé lìm vəə́ yii, á waà sí yii.

¹⁷Aŋgàa lìm fòne sìyrí ne a mbàm se sí‑ii dzəə̀n e NYÙY TǍR lav, e fò á e wír ve á leey lim wùn à e vé lìme.»

¹⁸Wù kfən bùn fon, e sùúy ji wun kér a ŋwàʼ wúmóʼó wo Hilkia woo taà cù foon. Wù nèn yòŋ vinyo fo ŋwàʼ fèy, fòn yuúrí.

¹⁹Fòn Josia yú kinyo ke kí fəən fó Ŋwàʼ Nsər Nyùy, e nèn saàsì ndzə̀y sə́.

²⁰Wù toóy Hilkia wùn à Ahikam woo wan Shafan, à Abdon woo wan Mayka, à Shafan woo ŋgaà saŋ, à Asaya woo nshìylav fòn, e sùúy aáwune jii,

²¹«Vèn du, e mbaà NYÙY TÀR bìʼ kinyo ke á saŋen é ŋwàʼ fèn. Vèn du, e mbaà wun, e fò e mò, e kù a mbaà sa bìʼ wír ve á berin é Isray, e bèr é Juda. Rúrú, NYÙY TÀR sí shwiiy kilòŋ é dzəə ye bi, vèsən áwune, bìʼ fo atàr vesəné yòʼ‑oò lo ghvə̀m jí NYÙY TÀR, e yiì vinyo vidzə̀m ve á saŋen é ŋwàʼ fèn.»

²²Á bèy, Hilkia wùn à wír ve fòn tumené nèn dù, e yèn Hulda, a dzə̀ *ŋgaà ntum Nyùy woo wiíy. Wù‑uù dzə́ e Jerusalem, e mbìv ye vé‑eè bàʼrìn e fíy. Lum və‑əə̀ dzə̀ Shallum wo wù‑uù leey fo ndzə̀y sé atàá cù si. Shallum və̀n‑eè dzə̀ wan Tokhat, a Tokhat dzə̀ wan Hasra.

²³Hulda‑aà sùúy aáwune ji á du, e sùúy a e wìr wo wù tumen áwune fo wun wùn ji NYÙY TÀR woo Nyùy wìr veé Isray yoŋ a jii,

²⁴«M yíi màʼ ŋgeʼ e Jerusalem kitu, é wír vee fóo yú mo á koó. Lòn e dzə̀m wo á saŋen é ŋwàʼ wo vé‑eè yòŋèn, fòn woó Juda yúu lo, e koo áwune.

²⁵Wír veé wòŋàne màʼày ne mo, a tòn kiláy, a cù anyùy sho, a ŋaʼár dòʼshwíiy wom e mebvə̀m me áwune fèrìn e wó yéví. Á bèy, m yíi lovtí e woŋàne mo dòʼshwíiy wom dzəə̀n, a wù baári moo və́y, a wìr wóo ndzəmér yòʼ dzə̀.»

²⁶Hulda wáa shaà fo mbìy, a suúy jii, «Ké fòn woó Juda wo wù tumen ven ji vèn wiy, e tàr fo NYÙY TÀR kí dzə̀ jii, wun woo NYÙY TÀR woo Nyùy wìr veé Isray suuy e wun a jii, wù yù á ne jí sə́,

²⁷e yù á kinyo ke wun suŋnin kibí kibí kùm Jerusalem wùn à wír vee fóo. Mo wù səəsin jí sìn e shilív she juŋ shi, e lì kitú kfə́ kitérí, a neŋ e wun sar, e kfə̀n saàsì ndzə̀y sə́, a toŋ e wun si, wun woo NYÙY TÀR nén a suúy e wun a jii, wun yù á ne tóŋ rə́.

²⁸Kí nén a dzə lèn a jii, wun wíy yiì, wù jumrì atàr və́, aá liti á wun kijuŋ, é la sí rəə́ yòʼ dzəə shòv á ŋgeʼ se wun woo Nyùy wíy màʼ e wòŋ fèn, e màʼ e wír ve á dzə́ foó kitu.» Á bèy, vé ntume nèn lì kinyo ke wiíy və̀y suuyin, e kfə̀n, e dù, e yèn fon sho.

²⁹Fòn Josia nèn kùm toóy, kfə́m sé wìr veé Juda, à sé wìr veé Jerusalem sidzə̀m si báʼtí e wun si,

³⁰à wír veé Juda wùn à veé Jerusaleme, aàtàá cùu, à wír veé ram Levìi, e bóo lì wir dzə̀m, à wo terí, à wo kuʼùn. Wùn à fòn nèn kòʼ e NYÙY TǍR lav. Wù dù, e yòŋ jí se sí‑iì dzəə̀n é Ŋwàʼ Mensàŋ wo vé‑eè boŋen fo NYÙY TǍR lav, a wù yoŋ bèy, aáwune yuúri.

³¹Wù nèn tìím e wun kirə̀ʼ fo wù yii tíyí, e yiì kilìʼ e NYÙY TǍR si jii, wun yíi a ghan a e NYÙY TǍR mbòv, a yunín a nsər sə́ wùn à ntir sə́ sí, à sáʼ rəə́, a wun yíi a yunín a shilív sə́ shidzə̀m, e fo a kitú kfə́ shó kidzə̀m, e nèn a jùmrì a jí se mensàŋ se vé‑eè saŋen é ŋwàʼ fèy, e kù a yiì a mo sí dzəə̀n.

³²Wù nèn yòŋ, wír vee fó adzə̀me tátí wun, e lìʼ sa, a dzə̀ ji wír veé Jerusalem, à veé nsay Benjamin foo fèyi. Wìr dzə̀m wo wù‑uù dzəə̀n é Jerusalem‑eè lo biìmé ji á ghár á ntò se mensaŋ me Nyùy‑iì gwàrìn wùn áwune, wun woo Nyùy atàr vév.

³³Fòn Josia nèn lo, e laàr kinyo kee ji anyùy fo wír veé Israyí nsay, e nèn a banrí áwune, á wáa cù a dzə̀ NYÙY TÀR woo Nyùy wov. Yì‑iì dzə̀ e wun ghan sé saʼ, bó wíri yòʼ‑oò lo ghàn yàr fó a cù NYÙY TÀR woo Nyùy atàr vév.