Read Lamnso 2 Wòŋ 35 Bible Online

2 Wòŋ 35 - Lamnso bible

2 Wòŋ 35

¹Fòn Josia‑aà yòŋ ji á yí á Ŋkǎʼ Yáʼayshaà e Jerusalem, e fíʼ ghvəm a NYÙY TÀR shó. Wìy lòo dzə e kishiíy kee nshòv sikweè e ghvə̀m fo ŋwee mbìyi, á nèn seèrí wón njìi Ŋkǎʼ Yáʼayshaà,

²a Fòn Josia kì lèm ne atàá cù mo áwune yíi a lìm, e yòŋ ji áwune ghár á lim yév yeé lav cù kijuŋ.

³Wù‑uù sùŋnín sá e wír veé ram Levìi, a dzə̀ wír ve vé‑eè lèmèn jeéy ji á wáa yiì a lim se NYÙY TÀR, e kfə̀n a dùŋrì a kinyo kfə́ e wír veé Israyi. Wù‑uù sùúy aáwune jii, «Ké ŋkùv mensàŋ wo dzəə̀n kifá kee jeéy kí, vèn lem é lav cù ye Fòn Solomon woó Isray woo wan Davir‑iì bàʼrìn. Vèn yòʼ dzəə́ yiì a toór, a dù sho e kirə̀ʼ. Kee lèn və̀n ki, vèn wáa yu a dzə̀ fó lìm se NYÙY TÀR woo Nyùy won, a lìm fo wír veé Israyi.

⁴Vèn siysi wúné mo kfə́ə sén sí dzə̀kìn, é líme tsəə́m e věn akáŋ mo Fòn Davir woó Isray wùn Fòn Solomon woo wán və‑əə̀ dìnèn e vèn.

⁵Vèn du, e tìím e lav cù e věn akáŋ mo kfə́ə sén sí dzəə̀n, a sə afə́r vén vee wír veé Isray, ve á wiy e cu sév sí, é wíri fo věn mvəmé wáa dzə vé a sə kfəə́ yee shó,

⁶a vèn yíi a seerí wón njìi Ŋkǎʼ Yáʼayshaà. Vèn *kfə́mrí vitú vén ví, a dzə aránén, e fíʼ a sə afə́r vén, é vinyo vidzə̀m vi kú a shaà mo NYÙY TÀR‑iì yòŋèn, e shaà fo Mooser.»

⁷Fòn Josia nèn fò wón bvəy nsə̀kì mtaár (30,000), ji wír vee fó adzə̀me yii á cú Ŋkǎʼ Yáʼayshaà sho, e nèn kfə̀n fò sá nàʼ ansə̀kì ataár (3,000). Nyám sìn sidzə̀m si kù‑uù lò fo fòn mvə̀m keŋ.

⁸Atǎr ntoʼ vəə́‑əə̀ fò sá nyám si e wíri, e fò sá sé atàá cù wùn à sé wìr veé ram Levi. Áwune‑eè fó e shilív she juŋ shi. Hilkia wùn à Sekariya, à Jehiel vee atǎr saʼ veé lav cùu‑uù fò wón bvəy kishóv ghií ntuùfú aànsə̀kìi abaà (2,600) ji atàá cùu yii á yév yee cú Ŋkǎʼ Yáʼayshaà sho, e kfə̀n fò áwune nàʼ ghii taár (300).

⁹Konaniya wùn aàfə́r və́ vee Shemayia wùn Netanel, e lì Hashabia wùn à Jeyel, à Josabad vee vilìmbìy veé ram Levi, áwune‑eè fò wón bvəy ansə̀kì atàn (5,000) e wír veé ram Levìi ji nyám sév sé cu Ŋkǎʼ Yáʼayshaà, e kfə̀n fò áwune nàʼ ghii tàn (500).

¹⁰Ghán sé ŋkàʼ sí‑iì ghèén, atàá cùu tiím aáwuné virə̀ʼ, wír veé ram Levìi tiím aáwuné akáŋ mo fòn‑eè yòŋèn.

¹¹Wír veé ram Levìi nèn a seerí wón bvəy Ŋkǎʼ Yáʼayshaà, aàtàá cùu sə́ mensə́, wáŋri e kiy cù, a wír veé ram Levìi nèn li bvə́y sìy, yuvì.

¹²Áwune‑eè lèm nyám se cù ye tonèné jeéy ji á javti á e wír vee víyi mo akáŋ véví dzəə̀n é kfəə sí kfəə si, aáwune cu NYÙY TÀR shó mo vé‑eè saŋen é Ŋwàʼ Mooser. Á kù‑uù jàv sá anàʼ bèy.

¹³Ké wón bvəy ve vé‑eè seen ji vé Ŋkǎʼ Yáʼayshaà, vé‑eè bàv nyám se Ŋkǎʼ Yáʼayshaà mo nsər dinè. Ké nyàm se vé‑eè yiìn cu sho, a sì yee jeéy, vé‑eè nàá vibar ve nyàm see shooy e kìŋ sí, e nàá aàntòn, e kfə̀n nàá aàláŋ, e nèn lì, e jàv cércér e wír vee víyi adzə̀m.

¹⁴Wír veé ram Levìi màysì kijav, e nèn bàʼtí yéev yee nyám wùn à ye atàá cù, bìʼ fo atàá cù, áwune vee rám Aarone‑eè rə̀sí kév, a yiì cu ye tonèné, e kfə̀n a tòn fóm si, e dù, e mèé e ŋkuùr. Á kinyo ke kí‑iì yiìn, é bo wír veé ram Levìi báʼtí yéev yee mbìv, e bàʼtí sa ye atàá cù, áwune vee wón Aaron.

¹⁵Á wáa yiì vinyo bèy, a vé yòv vee rám Asavi tíy aáwuné virə̀ʼ, kù réŋréŋ mo Davir wùn à Asav, à Heman, à Jedutun woo ŋgaà si fòn‑eè yòŋèn. Anshìy veé shuù se kàyi kú a tiy sa aáwuné shuù se lìm, a bó shií wóo lò fo fo yòʼ dzə̀, bìʼ fo afə́r vév veé ram Levìi‑iì sí yii mbaʼtì wov wo Ŋkǎʼ Yáʼayshaà.

¹⁶Vé‑eè lo bàʼtí vinyo vidzə̀m vee bìʼ NYÙY TÀR é kishiíy fóo fèy kijuŋ, e nèn a yi Ŋkǎʼ Yáʼayshaà, a tòn cu se tonèn sí e NYÙY TǍR kiy cù, kù mo Fòn Josia‑aà yòŋèn.

¹⁷Wír veé Isray ve vé‑eè dzəə̀n fó sii kù‑uù yì Ŋkǎʼ Yáʼayshaà e ghan see shooy, e kfə̀n yì *Ŋkǎʼ Kiban kee là Nyaà kishiíy saàmbà.

¹⁸Bó Ŋkǎʼ Yáʼayshàa yòʼ‑oò yiì ne a dzə sho wo á yí é dzəə yee ben e wòŋ Isray, e kèʼ fo ghan sé Samuel woo *ŋgaà ntum Nyùy. Bó fòn woó Isray yòʼ dzə̀ shó wo wù‑uù yiìn ne, e yiì Ŋkǎʼ Yáʼayshaà moo wó Fòn Josia. Fòn Josia‑aà yì ŋkàʼ vən wùn aàtàá cùu, à wír veé ram Levìi, à wìr dzə̀m woó Juda wùn à woó Isray wo wù‑uù dzəə̀n fó si, à wír ve á dzə́ e ŋkàlaʼ Jerusaleme.

¹⁹Vé‑eè keèrí Ŋkǎʼ Yáʼayshaà və̀n, a Fòn Josia sí sáʼ ji kiyá nshòv waamé e ghvə̀m.

²⁰Vinyo vìn vi shaà, a Fòn Josia báʼtí ne lav cù, Fòn Neko woó Ejiv fəə́, a dù rə́r é Karkemish, e ghaa ndzəv yee Yufret. Fòn Josia nèn fə̀ə́r vé rər və́ ji wun tíner a wun.

²¹Yii bèy, Fòn Neko tsə́nsí vé ntume fo Fòn Josia wùn, á dù, e sùúy ji Fòn Neko yoŋ a jii, «Fòn woó Juda, wòsò kér a dzə̀ ka? M yoʼ fəə̀ rə́r sé lán si ji m kiʼ a dzə̀ á wò. M kiʼ a dzə̀ wír ve vèr áwune kér melaà. A NYÙY TÀR yòŋ ne e mò ji m shúr á wún, wun dzə̀ á vèr wun. Lá à yòʼ a jivír ntum rə ye m lo, fo wù yúyrí wò.»

²²Yii bèy, Fòn Josia ku wày wáyín ji wun funen á Fòn Neko, e nèn tèn fó yu kinyo ke Nyùy‑iì yòŋèn, e shaà fo Fòn Neko. Á bèy, Fòn Josia nèn kùv wún və́, e dù e shùu rər é mboʼ yeé Megiddo.

²³Rə́r sí lòo màʼ, vé mvə̀n veé Ejivi nèn tè Fòn Josia e mvəne, wù suúy e və́ vé lìme jii, «Vèn fəə́r mo fó shùu rər, m lèm ne e dzəə ye bi.»

²⁴Á nèn fə̀ə́r wun fo wun kitentén ké rər, e wày e kímóʼ kí, e lì, e dù sho e Jerusalem. Á dù sho bèy, wù nèn lày, á lìtì e fəm fo vé‑eè lìtìn atàr və́. Wír veé Juda wùn à veé Jerusalem adzə̀me nèn dìy kpú rə́.

²⁵Jeremia‑aà sàŋ yòvdìy wóo ghvəm Fòn Josia sho. Kèʼ fo ghan fóo fèy, e wìy shem lán, vé yòv vee vilum wùn à vee vikìy adzə̀me lóo yòv yòvdìy, á kù a taŋ Fòn Josia. Yòvdìy və̀n lò ne, e kfə̀n ji liì woó Isray, aá sàŋ ne e ŋwàʼ wo dzəə̀n Ŋwàʼ Yòvdìy.

²⁶Ké vinyò vímóʼ ví vee Fòn Josia mvə̀m saʼ, à tíy ye wù‑uù tíy e Nyùy kinyò, yii kinyo ke kí dzəə̀n é Ŋwàʼ Nsər NYÙY TÀR,

²⁷à vinyo ve wù‑uù yiìn vidzə̀m, e kèʼ fo kèʼ, e dù, e màysì, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray wùn à veé Judàa.