Read Lamnso 2 Wòŋ 8 Bible Online

2 Wòŋ 8 - Lamnso bible

2 Wòŋ 8

¹Fòn Solomon‑eè lì kiyá mbaà, e bàʼrì lav cù NYÙY TÀR wùn à ntoʼ rə. Wù bàʼrì bèy,

²e nèn bàʼrì ŋkà se laʼ se Fòn Hiram‑eè[10] foon e wun, e siìr fo, e nèn lèm wír veé Isray fo.

³Wù‑uù lò, e dù e Hamat Tsoba, e tòn fó,

⁴e kfə̀n lò, e bàʼrì ŋkàlaʼ Tadmor ye yì‑iì dzəə̀n é woʼ, e siìr fo, e bàʼrì ŋkà se laʼ símóʼ sí é nsay Hamat ji sé vitàv.

⁵Wù kfə̀n‑eè bàʼrì sá Bet‑Horon Kùy wùn à wo Tsə̀n, e siìr fo. Ŋkà se laʼ sìn si‑iì dzə̀ vikum ve ŋkà se laʼ, a sí kér kay si, a shuu se kày si kér kóŋ sé mfìn, a dzə̀ see visha.

⁶Fòn Solomon‑eè yiì, á bàʼrì ŋkàlaʼ yee Baalat, e siìr fo, e kfə̀n bàʼrì ŋkà se laʼ sidzə̀m see fo vitáv və́ ví‑iì dzə̀kìn, à see fo wù‑uù lem *viténtén və́ vé rər, à see fo vé koʼo‑oò shiiyì. Á kù‑uù bòm kifá kidzə̀m ke Fòn Solomon‑eè kér shií ji á bóm é Jerusalem, e bòm é Lebanon, e kfə̀n bòm é kirə̀ʼ kidzə̀m ke wù‑uù sáʼá.

⁷Fòn Solomon‑eè tàyrí wir dzə̀m wo bó yòʼ‑oò dzəə̀n woó Isray, a kù dzə̀ wír ve vé‑eè berin fó vitum ve wír veé Israyi yòʼ‑oò lo laàr, á mày. Wíri‑iì bèr fo veé Hiti, e bèr fo veé Amori, à veé Perisi, à veé Hivi, e lì veé Jebus. Wù‑uù yiì, áwune wáa lìm lím vitaavií, a kù dzə̀ mo áwune limè, e wìy shem lán.

⁹Bó Fòn Solomon yòʼ‑oò lo lì wír veé Isray ji akwàn və́ lìm. Wù‑uù lì áwune ji vé rərí, e lì ámóʼó ji vé saʼa, e lì ámóʼó ji amfòómé wìr ve á səŋ viténtén və́ vé rər, aámóʼó dzə̀ wír ve á kóʼ nyám se ŋkoʼ.

¹⁰Vitú ve lìm ve Fòn Solomon‑eè lèmèn ji ví wáa leéy wíri ví dzə̀ wír kishóv mtàn e ghiì baà (250).

¹¹Fòn Solomon lò, e lì wíiy və woo wan Farao fo Ŋkàlaʼ Davir, e kòʼ shó, e wày é lav ye wù‑uù bomen ji rə́ə. Wù‑uù yiì bey, bìʼ fo wù‑uù yòŋèn jii, «Wiiy wom yòʼ yíi a dzə e Fòn Davir woó Isray ntoʼ, bìʼ fo virə́ʼ vee fo ŋkùv mensàŋ NYÙY TÀR tiirin ne kiwuú fó vi sì virə́ʼ vee jeéy ví.»

¹²Fòn Solomon lò, e cù NYÙY TÀR e cu se tonèn sí e kiy cù wo wù‑uù bomen é mbìy lav cù.

¹³Wù‑uù yii cu sìn vishiíy vishiíy, a kishiíy kee shó ki kér rə́ yee cu mo *Nsər Mooser‑iì taʼà. Wù‑uù yiì sá sé vishiíy vé bam, e yiì sé ŋwee wo fíyi, à sé ŋkàʼ see sitaár seé kiya see jii, *Ŋkǎʼ Kiban kee là Nyaà, wùn à *Ŋkàʼ woó bǎm Ŋgàm si, à *Ŋkǎʼ Tàv sé Ghane.

¹⁴Solomon‑eè jùmrì kinyo ke tàr wov Davir‑iì neèrìn, e nèn shòʼtí akáŋ vee vé atàá cù, á wáa yiì lim yév, e kfə̀n shòʼtí sa wír veé ram Levi, á wáa yòv luŋ si, a burí Nyùy sho, e kfə̀n a sə atàá cù, a yiì lim sév mo shií dzəə̀n é kishiíy kee shó. Wù kfə̀n‑eè shòʼtí sá akáŋ vee vé anshìy, á wáa shìy shuu se kày réŋréŋ mo Davir woo wir Nyùy‑iì yòŋèn.

¹⁵Fo vinyò ve Davir‑iì yòŋèn áàtàá cùu, e kfə̀n yòŋ e wír veé ram Levìi kùm vitáv veé lav cù, à vinyo vímóʼ ví, bó kfəʼ yòʼ‑oò lo tùm é nsay.

¹⁶Fòn Solomon nèn màysì lim ye yí‑iì tíy e wun wùn e dzə̀m. Yí‑iì kèʼ fó kinsə̀ŋ ke lav cù NYÙY TÀR, e dù, e meé mo yì‑iì koʼon, e dù, e mày. Á bèy, lav cù nèn a tiy, a lim e dzə̀me máy ne.

¹⁷Fòn Solomon yiì lò, e dù e Etsiyon‑Geber wùn ǎ Elat, a fóo dzə̀ é ghaa meshavtí me rìbà ndzə̀v é nsay Edom.

¹⁸Fòn Hiram tsə́nsí vikóŋ və́ wùn à wír ve vé‑eè kiìn ndzə́v kijúŋe, á tátí wír Fòn Solomon, wùn áwune dú é Ofir, e tàʼ *kisha ke mbàm ke baar kí, e wìy sho, a kí dzə̀ moo akilu nsə̀kì nshòv sitàn e ghvə̀m (15,000) bèy, e nèn fò e Fòn Solomon.