Read Lamnso 2 Wòŋ 9 Bible Online

2 Wòŋ 9 - Lamnso bible

2 Wòŋ 9

¹Yaà woó Sheba‑aà yù léŋ Fòn Solomon, e nèn wìy e Jerusalem ji wun taásín á wun e dzə́tí se tavkín sí. Wù‑uù wìy wùn à ŋgoo wìr e gháʼán, aàkameri béʼ virə̀ʼtìn ve vifa wùn à *kisha ke mbàm ke baar kí kigháʼán, à *síbaŋ seé kilùm si. Wù wìy bèy, e dzə̀tí vinyo vidzə̀m ve wù‑uù kér e wun vifii e Fòn Solomon.

²Fòn Solomon bìnèr vinyo vidzə̀m ve wù‑uù dzə́ti, la kinyo ki yòʼ a dzə sho kée ghaʼ fo wù naari.

³Yaà woó Sheba yén vifií vé Fòn Solomon, e yèn ntoʼ ye wù bàʼrìn,

⁴e kfə̀n yèn viyíkìr ve ví‑iì tíy e wun si, e yèn sá mo atǎr ntoʼ vəə́ kér antaʼ jeéy jeéy, e kfə̀n yèn nsheèlav sə́ wùn à ndzə̀y sév sí, e yèn wír və́ ve á béʼ bóm, à ndzə̀y se á maʼ si, e kfə̀n siì yèn sá cu se tonèn sí se wù‑uù yii e NYÙY TǍR lav cù, shúu má wun.

⁵Wù nèn sùúy e Fòn Solomon jii, «Vinyo ve mò‑oò yú e mǒ wòŋ ji à yii, kfə̀n yú mo à kér vifií, m dzə̀ a m yén ji ví dzə̀ á rú.

⁶Bó m yòʼ‑oò ló a biimé, bánlà lèn wo m wìyìn, e yèn e sí yémé. Kí dìn ji m yòʼ‑oò lo yù á kintoʼnìn ke vifii vé ve ghaʼán ví. M yèn, aà shaá kinyo ke mò‑oò yú.

⁷Bòŋ ké wìr vé, bòŋ ké nsheèlav sé mo áwune rə́si tíy e wò si, yuúri vifií vé ghán sidzə̀m.

⁸Búríi wáa dzə fo NYÙY TÀR woo Nyùy wò, wun wo wù kòŋèn wò, e lèm e kàvàʼ ji fon wo wù wáa saʼ e wun yir, mo NYÙY TÀR woo Nyùy wò kòŋèn wír veé Isray, a tàʼ, e tuúy áwune, aá wáa tiy fo, e wìy dù, e mày. Wù nen kòʼór wò ji fon wo wù wáa saʼ áwune, a saʼ vifon tìítiy, là kiloʼ.»

⁹Yaà woó Sheba nèn fò Fòn Solomon kisha ke mbàm ke baar kí, a kí dzə̀ akilu ansə̀kì akweè (4,000), e kfə̀n fò wun virə̀ʼtìn ve vifa vigháʼán, e bóo lì síbaŋ. Bó á yòʼ‑oò ghàn ne yèn kfəə́ se virə̀ʼtìn ve vifa moo ve Yaà woó Sheba‑aà foon e Fòn Solomon vìn.

¹⁰Kù dzə̀ sá mo vé lìm Fòn Hiram[11] wùn à vé lìm Fòn Solomon ve vé‑eè wìyìn e kisha ke mbàm ke baar kí fó Ofiri‑iì lóo wìy, a wìy sa e vicí vee jeéy ví wùn à síbaŋé.

¹¹Fòn Solomon nèn lì vicí viy, e fèr dzə́ə ye seʼtìn yeé lav cù wùn à yeé ntoʼ sho. Wù kfən fèr lúŋ mbàytì wùn à yé nshìí shó ji vé yòvi wáa kùm. Bó á yòʼ‑oò ghàn ne yèn kfə́ə vifa vee ben e nsay Juda.

¹²Fòn Solomon‑eè fò Yaà woó Sheba kifá kidzə̀m ke Yaà‑aà koŋè. Wù‑uù fò vifá e Yaà, a ví kúʼ, e shaà ve Yaà‑aà wìyìn shó. Á bèy, Yaà nèn a kfən e bàm e wun wòŋ wùn à nsheèlav sə́ sí.

¹³Yì‑iì lóo dzə e kitu ke kiya, Fòn Solomon sə̀ kisha ke mbàm ke baar kí moo akilu nsə̀kì nshòv sitaár e mbaà (23,000) bey,

¹⁴e bóo lì mbàm se wónlě wayí‑iì laʼ e wun. Afon veé Arabia adzə̀m wùn aàtǎr saʼ veé vibàr ve wòŋe‑eè wiy sa e kisha ke mbàm ke baar kí wùn à ke fəvír kí, fó e Solomon.

¹⁵Fòn Solomon‑eè fèr aŋkeè ve kuʼkìné ghii baà, e dzə̀v kisha ke mbàm ke baar kí, e làʼtí e wùn wó, a ŋkeè wo mòʼón li kisha ke mbàm ke baar kí akilu saàmbà.

¹⁶Wù kfən fèr sa ámóʼó vee aŋkeè ve ŋeeríné ghii taár, ve vé‑eè dzə̀vìn sá kisha ke mbàm ke baar kí, e làʼtí e wùn wó, a ŋkeè wo mòʼón li kisha ke mbàm ke baar kí moo akilu ataár bèy. Wù‑uù lèm aŋkeè vìn adzə̀m e lav ye á yoŋ ji Kóv Lebanon.

¹⁷Fòn Solomon‑eè fèr sá kàvàʼ wo kuʼùn, e tòʼtí sóŋ kitàm, e nàvtì sho, e kfə̀n làʼtí kisha ke mbàm ke baar kí kee wúntí kíwun e wùn wó.

¹⁸Kàvàʼ woo shooy‑iì kér ŋkèʼ si ntuùfú, kfə̀n kér kikoʼtìn ke á tiir wuú shó, aá fér e kisha ke mbàm ke baar kí, e làŋsìn e wǔn kàvàʼ. Mbìv sé kàvàʼ see sibaà sí‑iì kér virə́ʼ ve á neer kóy si shó, aá fér abvərə̀ʼ abaà, á wáa tiy fo.

¹⁹Abvərə̀ʼ ámóʼó wáa dzə nshòv sibaà e ghvə̀m, aá tíy e ŋkèʼ see ntuùfú. Vé‑eè tíy e ŋkèʼ ye mòʼón abaà, wùmòʼ fó kor fèn, wùmòʼ fó kor fèsə. Bó kfə́ə kàvàʼ woo ben yòʼ‑oò yiì ne a dzə e kitum kímóʼ kí.

²⁰Vé‑eè fèr abàr vee Fòn Solomon ntoʼ, a dzə̀ e kisha ke mbàm ke baar kí, e kfə̀n fèr sa vifá veé lav ye á yoŋ ji Kóv Lebanon e kisha ke mbàm ke baar kee wúntí kíwun ki. E Fòn Solomon ghan, vé‑eè li kisha ke mbàm ke fəvír kí ji kifá kee fó tèr.

²¹A kí‑iì dzə̀ bey, bìʼ fo Fòn Solomon‑eè kér amàvìkoŋ ve vé‑eè du e Tarshish, a yì‑iì səŋ vé lìm Fòn Hiram. Yì‑iì lóo dzə e bǎm viya vitaár, amàvìkoŋ vìne kfə̀n, aá béʼéy kisha ke mbàm ke baar kí wùn à ke fəvír kí, à sóŋ sé kitàm si, aàŋkaàvàŋe, e bóo lì ambùy.

²²Fòn Solomon‑eè shaà afon veé kitu ke nsay adzə̀m e bùʼ, e kfə̀n shaà e vifii.

²³Afon adzə̀m veé kitu ke nsayi‑iì yár jíŋ ji áwune ku wìy, e yèn á vifií ve NYÙY TÀR‑iì foon e Fòn Solomon.

²⁴Fòn woo shó lóo wìy, wù wàa wìy e fómo və. Vé‑eè wiy e vifá vee fèr e kisha ke mbàm ke fəvír kí, à vee fèr e ke baar kí. Wùmòʼ‑oò lo, wù wàa wìy kfə́ e ndzə̀y sí, wùmòʼ wàa wìy e vifá ve rər ví, wùmòʼ wàa wìy e virə̀ʼtìn ve vifa vi. Aámóʼó wiy kév e nyám se ŋkoʼ si, kìn e vimbèʼbìy vé nyàm ŋkoʼ vi, kù bey, kù bey, viyá vidzə̀m.

²⁵Fòn Solomon‑eè kér vibàn ve wù‑uù lem *viténtén vé rər wùn à nyám se ŋkoʼ si shó, a ví dzə̀ ansə̀kì akweè (4,000), kfə̀n kér nyám se ŋkoʼ nsə̀kì nshòv sibaà e ghvə̀m (12,000), a wù‑uù lèm é ŋkà se laʼ se dzəə̀n sé vitentén, e lèm símóʼ sí é Jerusalem.

²⁶Wù‑uù sáʼ vitúm vidzə̀m vee kèʼ fó ndzəv yee Yufret, e dù, e mèé e nsay Filistia, e kfə̀n dù, e mèé e bìíy Ejiv.

²⁷Fòn Solomon‑eè yiì, kisha ke mbàm ke fəvír kí wáa dzə e Jerusalem ji kifá kee fó tèr moo tíy bey, a kicí ké *sidar ki fúm fo fúmén moo kicí ké *sikamor keé sar agwan veé Juda.

²⁸Vé‑eè wiy e nyám se ŋkoʼ se Fòn Solomon si fó Ejiv, à fó virə̀ʼ vidzə̀m.

²⁹Ké vinyò vímóʼ ví vee Fòn Solomon mvə̀m saʼ, vee kèʼ fó kèʼ, e dù, e màysì, á sàŋ é ŋwàʼ wo dzəə̀n Ŋwàʼ Vimfèr ve Natan woo *ŋgaà ntum Nyùy, e sàŋ vímóʼ ví é Ŋwàʼ Ahija woó Shilo, e bóo lì Ŋwàʼ Vinyò ve Iddo woo ŋgaà si‑iì yenen kùm Jeroboam woo wan Nebat.

³⁰Fòn Solomon‑eè sàʼ vifon və́ é Jerusalem kiyá mkweè, a wù sáʼ wír veé Isray adzə̀m.

³¹Wù wìy lày, á lìtì wun e Ŋkàlaʼ Davir woo tàr wov, Rehoboam woo wán və nèn yì vifon.