Read Lamnso Esra 5 Bible Online

Esra 5 - Lamnso bible

Esra 5

¹Wáa dzə e ghan see shooy, aŋgàa ntum Nyùy vee Hagay wùn Sekariya woó ram Iddo nèn kèʼ, a tiisí ntum yev e wír veé Isray ve vé‑eè dzə́ e Juda wùn ǎ Jerusaleme, aá kù tiísi a dzə̀ é yír Nyùy wìr veé Isray wo wù kér áwune.

²Serubbabel woo wan Shealtiel wùn Jeshua woo wan Josadak yú sáʼka wov, e kù nèn kèʼ, e kfə̀n a bàʼrì lav Nyùy e Jerusalem, aŋgàa ntum Nyùy vìyi wáa sə áwune.

³Kù é ghan fóo fèy, ŋgaà saʼ woo Tattenay, a wù sáʼ e mbìv wòŋ ye á liysin ne Yufret fo shùy yii nəə, nèn lò, wùn à Shetar‑Bosenay, aàŋgàa ŋgoo véví e dù, a dzər e wír vée Judàa jii, «Fò la ven vitaáví ji vèn maysi lav cù rə̀n, e bàʼrì?»

⁴Áwune kfən dzə̀r sá jii, «Yír sé wìr ve á bómé si dzə̀ ji ala?»

⁵Yii bèy, mo Nyùy‑iì leey fo kfə́m sé wìr veé Juda si, la atǎr wòŋ veé Persiàa yòʼ jìvír lim rə̀n, e meé mo vé‑eè yíi saŋ ŋwàʼ e Fòn Darius, é wù fó binèr.

⁶Ŋgaà saʼ woo Tattenay wùn Shetar‑Bosenay, e lì aŋgàa ŋgoo vév veé mbìv wòŋ ye á liysin ne Yufret fo shùy yii nəə nèn lò, e sàŋ ŋwàʼ, e fò e Fòn Darius.

⁷Kinyo ke vé‑eè saŋen kí dzə̀ jii, Fòn Darius, nyaáŋ wáa dzə à.

⁸Vèr taʼ a ji fòn kiíy á ji vèr‑ii du é Juda, e dù mèé e Nyùy wo kuʼǔn lav, e yèn, aá kfə̀n sí baʼrì a fó e tíy se faŋkìn sí, wáy aŋkoytì a e vicí ve toʼón ví. Áwune yiì bèy, e kù a lìm a lim yee shooy, e viwìr vi a yí du a feyì, e dzəə yee tìítiy.

⁹Vèr dzə́tí á vinyo e kfə́m sé wìr sév sí jii, sà fò la áwune vitaáví ji á kfə́n a bàʼrì lav cù yee shoon a?

¹⁰E kfə̀n dzə̀r sáa yír sév, e fiʼ yiì, aá kiíy á fó ntoʼ.

¹¹Áwune bínér á ji á dzə̀ á aŋgàa lìm Nyùy wo wù kér a yúv wùn á nsay, aáwune kfə̀n sí bóm a lav cù rə̀n yee mo vé‑eè yiìn ne bàʼrì a fo yàŋgùʼ, e wàyrí, a yì‑iì bàʼrì á kintav ke fòn woó Isray.

¹²Yii bèy, mo atàr véví‑iì yiìn, kilòŋ kí shwiíy Nyùy, wun woo Nyùy woó yuv nèn wày aáwune á e Fòn Nebukadnessar woó Babilon kiwo, wun woo wír woó Kaldea. Wù bvə́ʼə́y á lav cù yee shooy, e nèn koòrí a wíri, e dù a sho e wòŋ woó Babilon.

¹³Yii bèy, wìy lòo dzə a fo bàm é kiya ke mbìy ki mo Sayrus‑iì sáʼ ji fon woó Babilon, wù nèn fò sáʼ a ji á kfən bàʼrì a lav Nyùy rə̀n.

¹⁴Wù kfən siìr saa vifá ve ker, vee *kisha ke mbàm ke baar kí wùn à ke fəvír kí, ve Fòn Nebukadnessar‑iì bèʼèyìn á fo lav cù yeé Jerusalem, e wìy, e lèm a e wun kirə̀ʼ ké anyùy e Babilon. Fòn Sayrus fəə́r á vifá vee shooy fo kirə̀ʼ ké anyùy e Babilon, e wày á e Shes‑Bassar kiwo, wo wù‑uù shoʼon á ji ŋgaà saʼ woó Juda.

¹⁵Wù‑uù yòŋ shó ji wù li á vifá vìn, e dù siìr a e lav cù e Jerusalem, e kfə̀n siì bòm á lav Nyùy fo yì‑iì dzəə̀n.

¹⁶Shes‑Bassar ku nèn wìy, e wày á kinsə̀ŋ ke lav Nyùy e Jerusalem. E kèʼ fo ghan fóo fèy, e wìy e shem lán, kibaʼrì ki kù dzəə́ dú a fo mbìy, a bó á yóʼ ne waà màysì.

¹⁷Nyàr, a kí ben bòŋ wun, á fò sáʼ, aá tar á aŋwàʼ vimvə́mvə vé vinyò ve wòŋ ve á dzəə̀n é Babilon, e yèn á ji Fòn Sayrus sà‑aà lo fò sáʼ yee ji á kfən bàʼrì lav Nyùy e Jerusalem a, e nèn fò ver á rə́ə yee nshù kùm kinyo kee shoon.