Read Lamnso Esra 6 Bible Online

Esra 6 - Lamnso bible

Esra 6

¹Fòn Darius nèn fò sáʼ ji á tar á aŋwàʼ veé ntoʼ ve vé‑eè lèmèn é kitàv keé Babilon.

²Á nèn a tàr, e yèn ŋwàʼ woo shó a dzə̀ é kitàv keé ŋkàlaʼ yee Ekbatana, a fóo dzə̀ é kishev ke wòŋ kee Media. Vé‑eè sàŋ shó jii:

³Yì‑iì dzə̀ é kiya ke mbìy ki mo Sayrus‑iì sáʼ ji fon, wù nèn fò sáʼ yee bìʼ lav Nyùy yeé Jerusalem ji á kfən bàʼrì a lav yee shooy, aá wáa cù a Nyùy fo. Á ku neèr a kinsə̀ŋ kfə́, a kù dzə̀ á fo kí‑iì dzəə̀n, é lav yee shoon wáa dzə fo vidà ve koʼón ví kóy nshòv sitàn e ghvə̀m, é vikuʼùy ví wáa dzə sa kóy nshòv sitàn e ghvə̀m.[11]

⁴Aá yíi a bom akur tiy ataár, e nèn a neèr kicí ké ŋkoytì ke toʼón kí é kitu wo. A mbàm se lìm sidzə̀m si yíi a fəə a dzə̀ fó kibàm ke lèm keé ntoʼ.

⁵Vifá ve ker vee *kisha ke mbàm ke baar kí wùn à vee ke fəvír kí, ve Nebukadnessar‑iì liìn fó lav cù yeé Jerusalem, e dù lèm e Babilon, vi kér fó wìy kfən e bàm é lav cù yeé Jerusalem, aá wáa tiír kee shó fo kí‑iì dzəə̀n.

⁶Fòn Darius nèn tsə̀nsí binèr jii: Tattenay, wò woo taà saʼ woó mbìv wòŋ ye á liysin ne Yufret, à wò woo Shetar‑Bosenay, e lì aŋgàa ŋgoo vén ve á dzəə̀n é mbìv wòŋ ye á liysin ne Yufret fo shùy yii nəə, vèn maʼti kinyo kee kùm lav cù rə̀y ki.

⁷Lá vèn yòʼ a səə́r kibaʼrì kee shooy. Vèn maʼti, é taà saʼ woó Juda wùn à kfə́m sé wìr sév sí baʼrì lav Nyùy rə̀n e kinsə̀ŋ fo yì‑iì dzəə̀n.

⁸Yii bèy, m nén a suúy e vèn vinyo ve vèn yíi yiì, e bóo tom vilìmbìy veé Juda, aá baʼri lav Nyùy rə̀n. Á yíi a fo mbàm se lìm réŋréŋ mo kí dzəə̀n, a sí yíi a fəə a dzə̀ fó kibàm ke lèm keé ntoʼ, a dzə̀ fó mbàm se maʼàn se á yii báʼti fo mbìv wòŋ ye á liysin ne Yufret fo shùy yii nəə. Vèn ku yiì bèy, é la lim yee shoone yòʼ tìím.

⁹Kifá kidzə̀m ke kí dzəə̀n é shií fo atàá cù ve á dzəə̀n é Jerusaleme, vèn yíi a fo aáwune. Kìn dzə̀ wón nàʼ vee vilum, kìn viyáʼ, kìn anjiì ve á yii cu ye tonèné shó e Nyùy wo wù dzəə̀n é yuv, kìn dzə̀ sáŋ yee *wit, kìn shiŋgwáŋ, kìn meluʼ, kìn meŋgvə́r, vèn kù fò aáwune mo kishiíy kí dzəə̀n.

¹⁰Kí lóo dzə bèy, aáwune fíʼ a yiì cu ye yí wáa bòŋ Nyùy wo wù dzəə̀n é yuv, e kfə̀n a bùnrì fo fòn wùn à wón vəə́.

¹¹A m kfə̀n suuy sa jii, a wìr lòo dzə e shòʼór sáʼ rə̀n, bo á bay kicí ké ŋkoytì fo wun lav, e shovtí mbìv yìmòʼ, e tuŋ wun sho e yuv, aá nèn lì lav rə ji kirə́ʼ ke á maʼày vifá sho.

¹²Nyùy wo wù‑uù shoʼon Jerusalem ji á wáa cù wun fo, ku màʼ ká fon, kìn wír ve á taʼ a nə̀r kóy ji á kúvsín sáʼ rə̀n, kìn wír wo wù taʼ e kèr lav Nyùy ye yì dzəə̀n é Jerusalem rə̀n. Fə̀ə́r mo woo Darius sáʼ rə̀n. Á kú a lìm sho mo yí dzəə̀n.

¹³Mo Fòn Darius fəərin sáʼ rə̀n, Tattenay woo taà saʼ woó mbìv wòŋ ye á liysin ne Yufret fo shùy yii nəə, wùn à Shetar‑Bosenay, aàŋgàa ŋgoo véví ku nèn lì sáʼ rə̀n mo yí dzəə̀n.

¹⁴Kfə́m sé wìr veé Juda si ku nèn a yiì kibaʼrì, kí wáa dù fo mbìy, aŋgàa ntum Nyùy vee Hagay wùn Sekariya veé ram Iddòo wáa tavír áwune. Á ku nèn bàʼrì lav cù rə̀n, e màysì réŋréŋ mo Nyùy‑iì yòŋèn, e kfə̀n bòm mo afon veé Persiàa‑aà foon sáʼ, a vé‑eè dzə̀ ji Fòn Sayrus, Fòn Darius wùn à Fòn Artakerkes.

¹⁵Áwune‑eè màysì kibaʼrì ke lav cù kìn e kishiíy ke kí meen ji taár fó ŋwee wo á yoŋ ji Adar[12], e kiya ke kí meen ne ji ntuùfú mo Darius‑iì saʼan ne vifon.

¹⁶Wír veé Israyi nèn bàʼtí adzə̀m, a dzə̀ ji atàá cù, wùn à wír veé ram Levìi, à kibér ke wìr ke kí‑iì kfənen é bàm kí, wùn áwune nèn yiì ŋkàʼ, e fò lav cù yee shoon e Nyùy.

¹⁷Vé‑eè lòo yiì ŋkàʼ woo bìʼ lav Nyùy və̀n, e fò wón nàʼ vee vilum wií, viyáʼ ghii baà, wón viyaʼ ghii kweè. Cu ajay wìr veé Israyi wáa dzə vibév nshòv sibaà e ghvə̀m, mo rám seé Isray si dzəə̀n.

¹⁸Á nèn lèm atàá cù aáwuné viliŋ, e lèm wír veé ram Levi aáwuné akáŋ ji á wáa yiì lim Nyùy e Jerusalem réŋréŋ mo vé‑eè saŋen é ŋwàʼ Mooser.

¹⁹Wáa dzə e kishiíy ke kí‑iì meen ji nshòv sikweè e ghvə̀m fo ŋwee mbìyi,[13] wír ve vé‑eè kfənen é bàm víyi nèn yiì *Ŋkǎʼ Yáʼayshaà.

²⁰É bo á wáa yiì, aàtàá cù wùn à wír veé ram Levìi kì *kfə̀mrí ne vitú vév, e nèn a dzə aránén, là *kifàn. Wír veé ram Levìi nèn seèrí wón viyaʼ Ŋkǎʼ Yáʼayshaà bìʼ wír ve vé‑eè kfənen é bàm adzə̀m wùn à bìʼ afə́r vév vee atàá cù, à bìʼ vitú vév.

²¹Wír veé Isray ve vé‑eè kfənen é bàmé nèn yì ŋkàʼ vən wùn à wìr dzə̀m wo wù‑uù màʼtìn liì joònè, e tàtí áwune ji á fíʼ a cù a dzə̀ NYÙY TÀR woo Nyùy woó Isray.

²²Á nèn kfə̀n yì *Ŋkǎʼ Kiban kee là Nyaà kishiíy saàmbà, a vé‑eè yí e kishéʼrì ki, bìʼ fo NYÙY TÀR‑iì kùmèn shilív shé fòn woó Assiriya, wù sə́ áwune é kibàʼrì ke lav cù ye dzəə̀n lav Nyùy woó Isray.