Read Lamnso Esra 7 Bible Online

Esra 7 - Lamnso bible

Esra 7

¹Mo vinyo vìn vi shaàn, wáa dzə, a sí sáʼ Artakerkes vifon veé Persia, wìr wùmòʼ wáa dzə, aá yoŋ ji Esra, a dzə̀ wír woó kfəə Aaron woo taà cù wo kuʼùn. Esra və̀n‑eè dzə̀ wan Serayia wo yì‑iì dzəə̀n wan Asaria, woo wan Hilkia.

²Hilkia‑aà dzə̀ wan Shallum woo wan Tsadok, wo wù‑uù ràmèn fo Ahituv.

³Ahituv‑iì dzə̀ wan Amaria woo wan Asaria, wo wù‑uù ràmèn fo Merayiot.

⁴Merayiot‑iì dzə̀ wan Serahia woo wan Ussi, wo wù‑uù ràmèn fo Bukki.

⁵Bukki‑iì dzə̀ wan Abishua woo wan Finehas, wo wù‑uù ràmèn fo Eleasar, woo wan Aaron woo kitú ke atàá cù.

⁶Esra wáa dzə, a dzə̀ ŋgaà dùŋrì, a wù kì Ŋwàʼ Nsər Mooser kijuŋ, ŋwàʼ wo wú kér nsər se NYÙY TÀR woo Nyùy wìr veé Isray‑iì foon. Wìy lòo dzə e kiya ke kí‑iì meen ji saàmbà mo Fòn Artakerkes‑iì saʼan ne vifon və́, Esra nèn lò fo Babilon a dù e Jerusalem. Mo NYÙY TÀR woo Nyùy və‑əə̀ leey fo wun, fòn nèn biìmé kinyo kidzə̀m ke wù‑uù dzə́rí. Wír veé Isray ámóʼó ve vé‑eè duùn wùn áwune é Jerusaleme‑eè dzə̀ jii, wír vee viy wùn aàtàá cùu, à wír veé ram Levìi, à vé yòvi, à wír ve á yii leey lav cùu, e lì ve á yii lim e lav Nyùy.

⁸Wùn à Esra‑aà mèé é Jerusalem e ŋwee wo wú‑uù meen ji tàn, e kiya ke kí‑iì meen ji saàmbà mo fòn‑eè sí sáʼá.

⁹A Esra‑aà kèʼ mbaʼtì ghan yee lò fó Babilon rə̀n e kishiíy ké mbìy ki fó ŋwee woo wó mbìyi, e kù nèn mèé e Jerusalem e kishiíy ké mbìy ki fó ŋwee woo tàn, bìʼ fo Nyùy və‑əə̀ kér kiwó sho.

¹⁰Esra‑aà du bèn, a wù‑uù yiì ne tìír vifií və́ a dzə̀ ji wun yéʼéy á Ŋwàʼ Nsər NYÙY TÀR, a yiì mo wú suuyì, a dùŋrì sáʼ Nyùy wùn à nsər se Nyùy si e wír veé Israyi.

¹¹Fòn Artakerkes‑iì fò ŋwàʼ e Esra woo taà cù, a kfə̀n dzə̀ ŋgaà dùŋrì wo wù‑uù yeʼeyin ne vinyo vee kùm nsər se Nyùy wùn à sáʼ Nyùy ye wù‑uù foon e wír veé Israyi. Ŋwàʼ və̀ne[14] dzə̀ jii:

¹²Sàŋ mo Artakerkes, woo fon fo afone ŋwàʼ və̀n fo wò Esra, wò woo taà cù, aà kfə̀n dzə̀ ŋgaà dùŋrì Ŋwàʼ Nsər wo dzəə̀n wó Nyùy woó yuv.

¹³M fò ne sáʼ, yí ghánén e mǒ wòŋ, ji a wìr woó Isray lò a kòŋ ji wun du vèn áwune é Jerusalem, bo a dzə̀ á wù dù, kìn dzə̀ wír woo və̀y, kìn dzə̀ taà cù, kìn wír woó ram Levi.

¹⁴Tùm vèr à kibay kém kee saàmbà ki wò ji à du, e kàʼày Juda wùn à Jerusalem, e yèn ó ji áwune sà kù yii mo nsər se Nyùy wò, se à kér e kiwo si dzəə̀n á?

¹⁵À lóo dù, à lì *kisha ke mbàm ke fəvír kí wùn à ke baar kí, ke fòn wùn à vibay vi foon é kimbòŋwùn, e Nyùy woó Isray wo kirə́ʼ kfə́ ké dzə ki dzəə̀n é Jerusalem.

¹⁶Aà kfə̀n yíi lì sa kisha ke mbàm ke fəvír kí wùn à ke baar kí ke à yíi koóy fo mbìv wòŋ yee Babilon, e lì sa vifá ve wír veé Isray wùn aàtàá cùu sùʼtìn, e fò kicaárín ji vé lav Nyùy wov ye yì dzəə̀n é Jerusalem.

¹⁷À li mbàm sìn, à kù yùn a dzə̀ vifá ve cù sho vee jii, anàʼ vee vilum wùn à viyáʼ vi, à wón viyaʼa, e lì cu vifa ve yi wùn à yé melùʼu. Áà nèn lì vifá vee shoon, e yiì cu sho e kiy cù wo wú dzəə̀n e Nyùy wò lav yeé Jerusalem.

¹⁸Vèn aàfə́r vée ku lì kibér ke kishà ke mbàm ke fəvír kí, wùn à ke baar kí, e yiì kinyo ke vèn yenen ji ke juŋ ki shó, mo Nyùy won taʼà.

¹⁹Ké vifa ve ker ve vé‑eè foon e wò ji à yii á lim se Nyùy wò sho e lav cu, à yíi dù, e fo vifá vee shooy vidzə̀m e wun woo Nyùy e Jerusalem.

²⁰Kifá keé shií kímóʼ kí kfə́n a tàʼ wún e Nyùy wò lav ji à yii, bo mbàm si kù fəə́ a dzə̀ fó kitàv keé ntoʼ.

²¹Mo woo Fòn Artakerkes, m fó sáʼ lèn a dzə̀ e vé kitàv ké mbàm ve á dzəə̀n é mbìv wòŋ ye á liysin ne Yufret. Vèn yuúrí, Esra və̀n dzə̀ taà cù, a kfə̀n dzə̀ ŋgaà dùŋrì Ŋwàʼ Nsər wo dzəə̀n wó Nyùy woó yuv. Wù dzə́r kifá ke wù dzərin e vèn, vèn kù fò shó.

²²A dzə̀ vèn fò kisha ke mbàm ke fəvír kí shó, e dù, e meé moo akilu kishóv ghii kweè aànsə̀kìi ataár (3,400) bèy, e fò sáŋ yee *wit e dù e meé moo vibam ghii baà (200) bey, e fò meluʼ e dù e meé moo joŋ si wií (100) bey, e kfə̀n fò meŋgvə́r me *oliv e dù, e meé moo tin si wií (100) bey, yii bèy, e fò shiŋgwáŋ mo á taʼà.[15]

²³Kinyo kidzə̀m ke Nyùy woó yuv yòŋèn kùm lav rə, á kù yiì kíwun réŋréŋ mo kí dzəə̀n, fo wù shwiíy kilòŋ, e màʼ ŋgeʼ e fòn wùn à wír vəə́.

²⁴Vèn kfə́n a kiíy ji bó á yoʼ fò ven vitaáví ji á wáa sə mbàm se maʼàn sí, kìn nsùʼ, kìn nshwì fo wír vee ji atàá cù wùn à wír veé ram Levi, à vé yòvi, à ve á leey lav cùu, à ve á yii lim se lav cùu, e bóo lì ámóʼó ve á lim menyorìn memoʼ mè e lav Nyùy fèn.

²⁵Esra, ké ki dzə̀ jii, lì vifií ve Nyùy foon e wò vi, e shòʼtí vé saʼa wùn à vilìmbìy vi, e lèm, aá wáa saʼ wír ve á dzəə̀n é mbìv wòŋ ye á liysin ne Yufret, wír adzə̀m ve á kiiyin ne nsər se Nyùy wò. Lóo dzə ve á yóʼ ne kìíy, aá yéʼéy áwune.

²⁶Wír wo wù yíi ten fó a yunín nsər se Nyùy wò, kìn sé fòn, bo á yíi saʼ ŋgaàŋ réŋréŋ mo nsər dzəə̀n, kìn dzə̀ ji á du shó e kisəə, kìn ji á fəə́r, kìn ji á koó vifá və́, kìn ji á wáy ŋgaàŋ e sháŋ.

²⁷Búríi wáa dzə fo NYÙY TÀR woo Nyùy atàr vér, wo wù wayin kwaʼtì yee moo rən e fòn shiliv, ji á fiʼ yiì lim yee NYÙY TǍR lav ye yì dzəə̀n é Jerusalem.

²⁸Nyùy shàm ne mo, e yiì, fòn wùn à vibay və́ ví, aàtǎr ntoʼ və́ ve tavkíné wáa kòŋ mo. Mo mò‑oò dzəə̀n e NYÙY TÀR woo Nyùy wóm kiwo, m nen keèrí vitaáví vée baʼtí wír ve dzəə̀n vilìmbìy veé Isray, aá kóʼ é Jerusalem vèr áwune.