Read Lamnso Esra 8 Bible Online

Esra 8 - Lamnso bible

Esra 8

¹Yír sé atǎr kfəə ve vèr áwune‑eè loòn fó woŋ Babilon e ghan sé saʼ Fòn Artakerkes si sìne, yír wìr wùn à ram rəə́.

²Gershom, a dzə̀ wír woó ram Finehas. Daniel, a dzə̀ wír woó ram Itamar. Hattush woo wan Shekania, a dzə̀ wír woó ram Davir. Sekariya woó ram Parosh, e lì vilum ve vé‑eè dzəə̀n wùn áwune, wír kishóv mtàn e wiì (150), réŋréŋ mo vé‑eè saŋen yír sév é ŋwàʼ.

⁴Elihonay woo wan Serahia, a dzə̀ wír woó ram Pahat‑Moav, a wù dzə̀ wùn à vilum ghii baà.

⁵Shekania woo wan Jahasiel, a dzə̀ wír woó ram Tsattu[16], a wù dzə̀ wùn à vilum ghii taár.

⁶Ebed woo wan Jonatan, a dzə̀ wír woó ram Adin, a wù dzə̀ wùn à vilum mtàn.

⁷Jeshayia woo wan Ataliya, a dzə̀ wír woó ram Elam, a wù dzə̀ wùn à vilum msaàmbà.

⁸Sebadiya woo wan Mayker, a dzə̀ wír woó ram Shefatia, a wù dzə̀ wùn à vilum mwaamé.

⁹Obadia woo wan Jehiel, a dzə̀ wír woó ram Joav, a wù dzə̀ wùn à vilum nshòv waamé e ghvə̀m e ghiì baà (218).

¹⁰Shelomit woo wan Josifia, a dzə̀ wír woó ram Bani[17], a wù dzə̀ wùn à vilum kishóv mntuùfú e wiì.

¹¹Sekariya woo wan Bebay, a wù dzə̀ wùn à vilum ámóʼó vee rám Bebay, wír nshòv waamé e mbaà.

¹²Johanan woo wan Hakkatan, a dzə̀ wír woó ram Asgad, a wù dzə̀ wùn à vilum kishóv e ghvə̀m e wiì (110).

¹³Elifelet wùn à Jeyel, à Shemayia, a dzə̀ wír veé ram Adonikam. Áwune‑eè wìy kév bám, a vé‑eè dzə̀ wùn à vilum mntuùfú.

¹⁴Utay wùn à Sakkur, a dzə̀ wír veé ram Bigvay, aáwune dzə̀ wùn à vilum msaàmbà.

¹⁵M nèn bàʼtí áwune é shùu ndzəv ye yí léŋ, du e Ahava, vèr áwune beè fo vishiíy vitaár. M lòo leéy wíri wùn aàtàá cùu, e làa yoʼ yen wír woó ram Levi fo.

¹⁶M nèn kùm wír ve yì‑iì dzəə̀n vilìmbìy, aá dzə̀ ji Elieser wùn à Ariel, à Shemayia, à Elnatan, à Jariv, à Elnatan wùmòʼ, à Natan, à Sekariya, e lì Meshullam, e kfə̀n kùm sa kfə́m sé wìr ve yì‑iì dzəə̀n Joyiariv wùn wùmòʼ woo Elnatan sa.

¹⁷Á wìy, m tsə́nsí áwune fo Iddo wùn, wo dzəə̀n kilìmbìy ke kintatì ke wìr vér veé Kasifia. M lòo tsənsí, e yòŋ kinyo ke á du, á sùúy e Iddo wùn aàŋgaà və́ ŋgoo ve dzəə̀n kfəə́ ye yí yii yii lim seé lav cùu ji áwune fó ver á wír ve á wáa yiì lim e Nyùy wór lav.

¹⁸Mo Nyùy wor‑iì kér kiwó e věr kinyò, áwune nèn wìy e kighvə́m ke wìr ki, a dzə̀ Sherebia woó kfəə Maali ye yí‑iì ràmèn fo Levi woo wan Isray. Á wìy sho wùn à wón vəə́, aàfə́r vəə́, á wáa dzə wír nshòv waamé e ghvə̀m.

¹⁹Á kfən wìy sa e Hashabia wùn Jeshayia fo kfəə Merari, aàfə́r véví, wùn à wón afə̀rí wáa dzə wír mbaà.

²⁰E kfə̀n lì sa vé lìm veé lav cù, wír kishóv mbaà é ghiì baà (220) fó kfəə ye Fòn Davir wùn à vé saʼ vəə́‑əə̀ shoʼon ji á wáa sə wír veé ram Levi. Vé‑eè sàŋ yír sév é kitu kitu.

²¹M nèn yòŋ, vèr lém jíŋ e ghaa ndzəv yee Ahava rə̀n, a neŋ e Nyùy si, a lon ji wù fó á vèr à wóné ghán ye juŋe, a kìŋsìn saa kifá kér kidzə̀m.

²²Woómé si‑iì koò mo fo m kfən dù, a bùn fon ji wù fó ver á vé rərí wùn à vé nyàm se ŋkoʼo, aá tsəə́né ver bìʼ aŋgàa vibàn. A vèr fíʼtí ne e fòn ji vèr dzə̀ á e Nyùy wór kiwo, a wù kiŋsìn wír ve á yú wun, maʼ ŋgeʼ ye bi e wír ve á méŋ wune.

²³Vèr nen lèm jíŋ, a bùnrì ji Nyùy wor yii, é vèr ghán á kijuŋ. Wù nèn yù tóŋ yér.

²⁴Á bèy, m nèn shòʼtí atàá cù wír nshòv sibaà e ghvə̀m, aàdzə̀me kù‑uù dzə̀ vilìmbìy, e bóo lì Sherebia wùn Hashabia, aàŋgàa ŋgoo vév vee ghvə̀me.

²⁵M nèn fìʼ vifá ve cù vee Nyùy wór lav, e fò aáwune. A dzə̀ *kisha ke mbàm ke fəvír kí wùn à ke baar kí, à vifá ve ker vi ve fòn wùn à vibay vi, aàtǎr ntoʼo, à wír veé Isray ve vé‑eè dzəə̀n fóo‑oò foon ji cu.

²⁶Mò‑oò fìʼ vifá vìn, e fò aáwune, a ví dzə̀ ji kisha ke mbàm ke fəvír kí akilu nsə̀kì nshòv sibaà e mbaà (22,000), vifá ve ker vee kisha ke mbàm ke fəvír kí akilu kishóv ghii kweè aànsə̀kìi ataár (3,400), à kisha ke mbàm ke baar kí akilu kishóv ghii kweè aànsə̀kìi ataár (3,400).

²⁷Vikóŋ vee kisha ke mbàm ke baar kí mbaà, a ví dzə̀ moo akilu waamé e shifarìn shi bey, à vifá ve ker vi vibaà vee kisha kee *brons ke kí kiʼ ji fèm, njaʼkìr sa moo kisha ke mbàm ke baar kí bey.

²⁸M nèn sùúy aáwune jii, «Vèn sì jeéy ji wír NYÙY TÀR, a vifá ve ker vìn vi sì sá jeéy, a kisha ke mbàm ke fəvír kí wùn à ke baar kí sì sá cu kimbòŋwùn ye á fó e NYÙY TÀR wo dzəə̀n Nyùy atàr vén.

²⁹Vèn ku nèn a shìy vifá vìn, a geʼsín sho, e dù, e meé mo á yíi meé e Jerusalem. Aá nèn dù sho aàtàá cùú kirə̀ʼ, e mvə̀m lav cù, e fìʼ vifá vìn vidzə̀m, a vitú ve atàá cù wùn à wír veé ram Levi, à vilìmbìy ve kfəə seé Isray vi dzə̀ fó si.»

³⁰Á bèy, atàá cù wùn à wír veé ram Levìi nèn sə̀ kisha ke mbàm ke fəvír kí wùn à ke baar kí, à vifá ve ker vi ji á du á sho e Nyùy wór lav e Jerusalem.

³¹Kishiíy kí meé nshòv sibaà e ghvə̀m fo ŋwee mbìyi[18], vèr nèn lò fo shùu ndzəv yee Ahava, a dù e Jerusalem. Vèr kù‑uù dzə̀ e Nyùy wór kiwo, a wù kiŋsìn ver fo aŋgàa vibàn wùn aàshóŋé.

³²Vèr meé é Jerusalem, e meèmè vishiíy vitaár.

³³Kí lòo meé ji vishiíy vikweè, vèr nèn fìʼ kisha ke mbàm ke fəvír kí wùn à ke baar kí, à vifá ve ker vi e Nyùy wór lav, e nèn fò e taà cù Meremot woo wan Uria wùn à taà cù Eleasar woo wan Finehas, e lì sa wír veé ram Levi vee Josabad woo wan Jeshua wùn Noadia woo wan Binnuy.

³⁴Vé‑eè tàŋ kifá kidzə̀m, e fìʼ vidzəəsì və́, e sàŋ é ŋwàʼ e ghan fó.

³⁵Wìr wo wù‑uù kfənen é bàm e dzə̀m fo vé‑eè koon áwune, e dù sho nèn yiì cu ye tonèné e Nyùy woó Isray. Yí‑iì dzə̀ jii, wón nàʼ vee vilum nshòv sibaà e ghvə̀m bìʼ wír veé Isray adzə̀m, viyáʼ nshòv ntuùfú e mbvə̀ʼə̀, wón viyaʼ nshòv saàmbà e msaàmbà. Vifá vìn vidzə̀m vi‑iì dzə̀ cu NYÙY TÀR ye tonèné. Áwune‑eè fò sá kibév nshòv sibaà e ghvə̀m ji cu ajay.

³⁶Vé‑eè lì sá ŋwàʼ fòn, e dù fò e taà saʼ woó mbìv wòŋ ye á liysin ne Yufret wùn à və́ vé lìme. Áwune nèn a tom wíri, a tom vinyo ve lav Nyùy.