Read Lamnso Esra 9 Bible Online

Esra 9 - Lamnso bible

Esra 9

¹Vinyo vìn vi‑iì shaà, vilìmbìy ve kfəə si ví nèn wìy wìy, e yèn mo, e sùúy jii, «Wír veé Isray, e lì atàá cù, à wír veé ram Levìi yoʼ jàvsìn a ŋgoo yee wùn à vitúm vímóʼ ví. Áwune kù biʼnìn a liì wo koʼoyín wo dzəə̀n wo wìr veé Kanan wùn à veé Hiti, à veé Perisi, à veé Jebusi, à veé Ammone, à veé Moavi, à veé Ejivi, e lì veé Amor.

²Áwune tàʼ ne vitúm vìn a ji vikìy vév, e lì sa vé won vév fó fo, e nèn bvə̀yrì ŋgoo yee jeéy rə̀n e vitúm vìn vi. A wír ve á tíy mbìy e liì joònè fene dzə̀ á vilìmbìy wùn à vé saʼa.»

³Mo m yuun kinyo kìn, vitaáví ví màʼtì mo, m saàsì vikúm vém vé mvəm ví wùn à vee fó ndzə vi, e kfə̀n dzə̀n nə́ŋ fo mǒ kitu, à kighev ki fo mǒ shuù, e nèn màvín fo nsay e nsòvkìtu.

⁴M ku nèn a dzə fo bèy, e dù e meé e ghan sé cù yee ŋkuùr. Wìr dzə̀m wo wù‑uù fan jí se Nyùy woó Isray wáa wìy, a kaarí e mǒ ghaŋ, bìʼ liì joònè wo wír ve vé‑eè kfənen é bàmé‑eè yiìn.

⁵Ghán sé cù yee ŋkuùr si gheén, m nèn lò e yuv fo m kì diyì, a vikúm vém vee fó mvəm wùn à vee fó ndzə vi kù dzə̀ə́ ve saasìn ví. M lò bèy, e tsə̀m ndzəə́ fo nsay, e nàn wó yém e NYÙY TÀR woo Nyùy wóm si,

⁶a lon jii, «Éè Nyùy wom, m woóme kfə̀n kér dzə̀rkìtu, a bó yòʼ dzə̀ m yù fó nàn sí, a leéy wò. Nyùy wom, vinyo vér ve bi ví kùʼ ne e shaà ver, a lǒn ajay wórí kòʼ ne e mèé e ntoò yùv.

⁷E kèʼ fo atǎr atàr vérí, e wìy shem lán, lòn wórí kùʼ ne e ŋàŋ. A yì‑iì yiì ajay vèr aàfon vérí wùn à vé atàá cùu, é bo á wáy ver áàfon vitumé wo, aá wáa gwàtì ver ámóʼó, e koòrí ámóʼó, e dù sho, e faàsì vifá vér, vèr wáa woomé moo lán və̀n bèn.

⁸Yii bèy, e ké lèn ki, NYÙY TÀR woo Nyùy wor, à shàm ne ver, e yiì, ver ámóʼó bóy. À lèm ne ver a dzə̀ e wò kirə̀ʼ fen, e rànér sí yér, vèr meémé fo věr kibèʼèy.

⁹Nyùy wor, mo vèr fə̀m dzəə̀n akwàn, bó à yoʼ làysìn ver é mvə̀m vikwàn. Á bèy, à dìn ne koŋ yé ye wiyí e vèr, aàfon veé Persiàa yéné. À kfən yiì, vèr meémé, e bòm lav yè, ye yì‑iì sàʼkìn ne, e kfə̀n kìŋsìn ver é Juda wùn ǎ Jerusalem.

¹⁰«E ké lèn ki, éè Nyùy wor, a dzə̀ vèr sùúy ji ka lèn e bǎm kee shoon? Vèr ŋwày ne nsər yè,

¹¹ye wò‑oò tumen aŋgàa lìm vé, á wìy, e fò e vèr. Vé‑eè sùúy e vèr ji nsay ye vèr‑iì du e yòv dzə̀, a vé nsayi‑iì bìvír á ne e joonè wóví. Liì wov joònè sùm a ne fó, e kèʼ fo buu fèn, e dù e meé a e və́səə.

¹²Kí nén a dzə a jii, lá vèr yòʼ a juùr a wón vér aáwune, é la vèr à wón vérí yòʼ a lì saa vév vee wón, a way e lav a ji vikìy. Vèr wáa yen saa fó a suusín vèr áwune, a tom a vinyo vév, a vèr fèn koŋ e wìy a dzə atávín, a yi vijuŋ vee fó, e kfə̀n wìy màʼtì nsay yee fó e rám yérí ji vitsə́ʼ vév ŋkuuŋkùŋ.

¹³«Éè Nyùy, vinyo ve ví kooyin ver vidzə̀m vi dzə̀ bìʼ yii yér ye bií wùn aàjay vér ve ghaʼtíné. Yii bèy, a wò woo Nyùy wor, à yoʼ fə̀m màʼ ŋgeʼ e vèr a dzə̀ mo yii yérí dzəə̀n. À kfə̀n lèm kibér ke wìr vér.

¹⁴A dzə̀ vèr kfə̀n a shoʼór rú nsər yè, a bvə̀yrì vijín vèr à vé joònè vine á? A vèr yiì bèy, bo bó à yòʼ yíi shwiíy kilòŋ vèsən, e laàr ver à rámé shó, é la wìr yòʼ bèr a?

¹⁵Éè NYÙY TÀR woo Nyùy woó Isray, à dzə̀ là kiloʼ. Vèr dzə̀ lán a dzə̀ kibér ke wìr. Leéy ri e yèn, vèr tíy e wò si vèr aàjay vérí, a bó vèr yoʼ ghèén a tiy bìʼ ajay vee shoon.»