Read Lamnso Nehemia 1 Bible Online

Nehemia 1 - Lamnso bible

Nehemia 1

¹Jí se Nehemia woo wan Hakalia. Yì‑iì dzə̀ é ŋwee woo Kislev[1], e kiya ke kí‑iì meen ji mbaà mo Fòn Artakerkes‑iì yiin vifon, a saʼ e Persia, a m dzə̀ é ŋkàlaʼ ye wiy yee Susa,

²Hanani woo fə́r wom wùmòʼ wùn à wír ámóʼó wìy fo Juda. M wáa dzətí vinyo ve wìr veé Juda ve vé‑eè bòyìn fó koo ye vé‑eè koorin áwune, e kfə̀n é bàm. M kfə́n a dzər sa vinyo vee kùm Jerusalem.

³Áwune suúy e mò ji wír ve vé‑eè bòyìn fó kiŋkoo, e kfə̀n é Judàa dzə̀ á e mvə̀m ŋgeʼ ye tavín wùn à nshoórsí, a kay yeé Jerusaleme kù dzə̀ə́ a bèy mo vé‑eè kèrìn, a shuu se kày si kù dzə̀ə́ saa mo vé‑eè tònèn.

⁴Mo m yuun vinyo vìn, e nèn dzə̀ʼə̀m, a toŋ. Vishiíy ví wáa liysín vinín, a m diyì, lem jíŋ, kfə̀n bunrì Nyùy woó yuv.

⁵Mò‑oò bunrì jii, «Éè NYÙY TÀR woo Nyùy woó yuv, à kùʼ, aà dzə̀ e gháʼtín. À yii tíy e wò *mensàŋ, din koŋ yé ye wiyí e wír ve á koŋ wò, yúnin nsər sée.

⁶Ku mvə̀ʼ vituʼùr vé vi. Ku lèéy mo, a yuurí tóŋ ye ŋgaà lìm wò tóŋ e shùy, tóŋ vitsə́ʼə́, bìʼ aŋgàa lìm vé vee wír veé Isray. M tuúne ajay ve vèr à wír veé Israyi jayin e wò. Vèr à rám atàr vérí jày ne.

⁷Vèr tàv ne kitú vèsən é ŋàŋ, e ŋwày nsər sé wùn à sáʼ yée, à ntò se vinyò se wò‑oò tumen ŋgaà lìm wò woo Mooser sho si.

⁸Kuúmé kinyo ke wò‑oò suuyin e Mooser woo ŋgaà lìm wò ki. Wò‑oò yòŋ jii, ‹A vèn lòo dzə, e ŋwày vinyo vém, bo m yíi taʼár ven e vitúm ví mvəm.

⁹Yii bèy, a vèn lòo dzə, e bìnèr melív men, a yunín nsər sém, a yiì mo sí dzəə̀n, bo m yíi baʼtí wír vén ve m taʼarin, aá fə̀m dzə̀ a dzə̀ é mbùʼ wòŋ vəné, e siìr e kirə̀ʼ ke m shavin ji á wáa ghvəm mo fó.›

¹⁰«NYÙY TÀR, wír vìne dzə̀ aŋgàa lìm vé. Kù dzə̀ wír ve wò‑oò tinen fó vikwàn ji wír vé, e tìn e vitaáví vé vi, aá yén kóy wó wo tavíné.

¹¹Éè NYÙY TÀR, ku yuùrí bunrì ŋgaà lìm wòo. Ku yuùrí bunrì aŋgàa lìm vée, áwune ve á tiir vifií vév ji á kú a ghvəm a dzə̀ yír yé. Fó ŋgaà lìm wò vishí ve juŋ vi lán, e fíʼ yiì, é fòn wáa ker shilív she juŋ shi vèr wun.» Yì‑iì dzə̀ é ghan fen, a wáy mo bóm fòn.