Read Lamnso Nehemia 11 Bible Online

Nehemia 11 - Lamnso bible

Nehemia 11

¹Jerusalem‑eè dzə̀ é ghan sin, a wír ve vé‑eè dzə́ foo kù‑uù dzə̀ vilìmbìy ve wíri. Kibér ke wìr ki nèn a tàr kfəə́ se wíri, a shoʼ e mòʼón fo yee ghvə̀me, a tsənsí, á wáa dzə e Jerusalem woo ŋkàlaʼ NYÙY TÀR ye ranén, é kibér ke wìr ki wáa dzə e ntèʼ see fó ghaŋ.

²Wír ámóʼó nèn kfə̀n shòʼtí vitú vév ji á yíi a dzə a e Jerusalem, wíri wáa burí áwune adzə̀m.

³Vilìmbìy ve kishev ke wòŋ ke dzəə̀n ji Juda ve ví‑iì dzə́ e Jerusalem vi víne. Yii bèy, kùʼùn wìr veé Isray wùn aàtàá cùu, à wír veé ram Levìi, à vé lìm veé lav cùu, e lì rám aŋgàa lìm Solomone kú a dzə kév é mvəm sé laʼ seé Juda, a wìr kù‑uù dzə́ a dzə̀ fo vitsə́ʼ vé tàr wov ví dzəə̀n,

⁴é bo wír ámóʼó wáa dzə e Jerusalem, aá ló fó rám Juda, e kfə̀n lò fo yé Benjamine. Vilìmbìy ve yì‑iì dzəə̀n rám Juda vi‑iì dzə̀ jii, Ataya woo wan Ussiya wo yì‑iì dzəə̀n wan Sekariya, Sekariya woo wan Amaria, wo yì‑iì dzəə̀n wan Shefatia woo wan Mahalalel, wo wù‑uù ràmèn fo wàn Juda woo Peres.

⁵Wùmòʼ‑oò dzə̀ Ma‑Aseyia woo wan Baruk, wo yì‑iì dzəə̀n wan Kol‑Hose, Kol‑Hose woo wan Hasaya, wo yì‑iì dzəə̀n wan Adaya woo wan Joyiariv, a Joyiariv‑iì dzə̀ wan Sekariya wo tàr wov dzəə̀n wir kfəə Shilo.

⁶Vilum ve tavkín ve vé‑eè ràmèn fo Peres, ve vé‑eè dzə́ e Jerusalem adzə̀me‑eè dzə̀ wír nshòv waamé e mntuùfú e ghiì kweè (468).

⁷Wír veé ram Benjamine nèn a dzə jii, Sallu woo wan Meshullam wo yì‑iì dzəə̀n wan Joed, a Joed‑iì dzə̀ wan Pedayia woo wan Kolayia, wo yì‑iì dzəə̀n wan Ma‑Aseyia, a Ma‑Aseyia‑aà dzə̀ wan Itiyel woo wan Jeshayia.

⁸Ámóʼó jii, afə́r Sallu vee Gabbay wùn Sallay.[15] Wír vév adzə̀me‑eè dzə̀ wír nshòv waamé e mbaà é ghiì bvə̀ʼə̀ (928).

⁹Joel woo wan Sikri‑iì dzə̀ kitú ke saʼ kév, a Juda woo wan Hassenua dzə̀ kfə́ kisher ke taà saʼ woó ŋkàlaʼ Jerusalem.

¹⁰Fo rám atàá cùu wáa dzə Jedayia woo wan Joyiariv, à Jakin,

¹¹à Serayia woo wan Hilkia, a Hilkia‑aà dzə̀ wan Meshullam woo wan Tsadok, wo yì‑iì dzəə̀n wan Merayiot, Merayiot woo wan Ahituv, wo yì‑iì dzəə̀n taà cù wo kuʼùn.[16]

¹²Aá kù dzə̀ wùn aàfə́r vév ve vé‑eè yii vinyo e lav cùu, wìr dzə̀m wáa dzə wír nshòv sibaà e mbaà é ghiì waamé (822). Taà cù wùmòʼ wáa dzə Adaya woo wan Jeroham, wo yì‑iì dzəə̀n wan Pelalia, a Pelalia‑aà dzə̀ wan Amsi woo wan Sekariya, wo yì‑iì dzəə̀n wan Pashur woo wan Malkija.

¹³Wù‑uù dzə̀ wùn aàfə́r və́ vee atǎr kfəə, aá dzə̀ wír nshòv sibaà e mkweè e ghiì baà (242). Amashay woo wan Asarel wáa dzə sa, a Asarel‑iì dzə̀ wan Ahasay woo wan Meshillemot, wo yì‑iì dzəə̀n wan Immer.

¹⁴Wù‑uù dzə̀ wùn aàfə́r vəə́,[17] aá dzə̀ wír nshòv waamé e mbaà é wiì (128), a wìr dzə̀m kù‑uù dzə̀ wir rə̀r wo tavín, a kitú kév ké saʼ ki‑iì dzə̀ Sabdiel woo wan Haggedolim.[18]

¹⁵Fo wír veé ram Levìi, wáa dzə Shemayia woo wan Hashuv, a Hashuv‑iì dzə̀ wan Asrikam woo wan Hashabia, wo yì‑iì dzəə̀n wan Bunni.

¹⁶Ámóʼó jii, Shabbetay wùn Josabad ve yì‑iì dzəə̀n vilìmbìy veé ram Levi, ve ví‑iì leey lim yeé ghaŋ se lav cù,

¹⁷e lì sa Mattania woo wan Mika wo yì‑iì dzəə̀n wan Sabdi woo wan Asav. Mattania‑aà dzə̀ wír wo wù‑uù yíi kèʼ, a dànèr yòv nsùyrì Nyùy. Ámóʼó wáa dzə Bakbukiya wo yì‑iì dzəə̀n kisher ke Mattania, à Abda woo wan Shammua, Shammua wo yì‑iì dzəə̀n wan Galal woo wan Jedutun.

¹⁸Wír veé ram Levi ve vé‑eè dzə́ é Jerusalem woo ŋkàlaʼ ye ranén rə̀n, vé‑eè dzə̀ wír nshòv sikweè e mwaamé e ghiì baà (284).

¹⁹Fo wír ve vé‑eè leey lav cùu, wáa dzə Akkuv wùn Talmon, e lì aŋgàa ŋgoo vév ve wùn áwune‑eè leey fó, wìr dzə̀m wáa dzə wír nshòv sibaà e msaàmbà e wiì (172).

²⁰Wír veé Isray wùn aàtàá cùu, à wír veé ram Levi ve vé‑eè beriné nèn a dzə kév a dzə̀ é ŋkà se laʼ seé Juda sidzə̀m, a wìr dzə́ a dzə̀ fo vitsə́ʼ vé tàr wov ví dzəə̀n.

²¹Vé lìm veé lav cùu‑uù dzə́ kév a dzə̀ é gwan Ofel, a Tsiha wùn Gishpa dzə̀ atǎr saʼ vév.

²²Kitú ke saʼ ke wìr veé ram Levi ve vé‑eè dzə́ e Jerusalem ki‑iì dzə̀ Ussi woo wan Bani wo yì‑iì dzəə̀n wan Hashabia, a Hashabia‑aà dzə̀ wan Mattania woo wan Mika. Ussi‑iì dzə̀ wír woó ram Asav ye yì‑iì dzəə̀n vé yòvi, a yii siysì áwune mo vinyo vi wáa ghanén e lav cù.

²³Vé yòvi kù‑uù jumrì a dzə̀ sáʼ yeé ntoʼ, ye yí‑iì duŋrì kinyo ke yì‑iì dzə̀ áwune wàa yiì kishiíy kidzə̀m.

²⁴Petahia woo wír woó ram Juda nèn a dzə wír wo wù‑uù tír fon woó Persia e vinyò ve ví‑iì kùmèn wír veé Isray vidzə̀m, a wù‑uù dzə̀ wan Meshesabel woo wan Sera.

²⁵Wír aníne kù‑uù dzə́ a dzə̀ é virə̀ʼ vee fo súm sév sí‑iì dzəə̀n. Wír vee rám Judàa kù‑uù dzə́ kév é Kiriat‑Arba wùn ǎ Dibon, ǎ Jekabseel, ǎ ntèʼ see fó.

²⁶Vé‑eè dzə́ sa e Jeshua wùn ǎ Molada, ǎ Bet‑Pelet,

²⁷ǎ Hasar‑Shual, ǎ Beersheba, ǎ ntèʼ see fó si.

²⁸Ámóʼó kfə́n a dzə sa e Tsiklag wùn ǎ Mekona, ǎ ntèʼ see fó si.

²⁹Ámóʼó é En‑Rimmon wùn ǎ Tsora, ǎ Jarmut,

³⁰ǎ Sanoa, ǎ Adullam, ǎ ntèʼ see fó si. Vé‑eè dzə́ e Lakish, ǎ ŋgvən see fó si, e kfə̀n a dzə e Aseka, ǎ ntèʼ see fó si. Nén a dzə jii, áwune‑eè dzə̀ʼə̀m, e kèʼ fo Beersheba fo mbìv yee tsə́n, e dù, e mèé e Kiwoóy ké Hinnom fo mbìv yee kuy.

³¹Wír vee rám Benjamine nèn a dzə e Geba wùn ǎ Mikmash, ǎ Ayja, ǎ Betel, ǎ ntèʼ see fó si.

³²Vé‑eè dzə́ sa e Anatot wùn ǎ Nov, ǎ Ananiya,

³³ǎ Hasor, ǎ Rama, ǎ Gittayim,

³⁴ǎ Hadid, ǎ Tsəboyim, ǎ Neballat,

³⁵ǎ Lod, ǎ Ono, ǎ Mboʼ vé Fèri.

³⁶Wír veé ram Levi ámóʼó ve vé‑eè dzə́ e nsay rám Judàa nèn dù, e tàtí rám Benjamin, wùn áwune wáa dzə aáwuné nsay.