Read Lamnso Nehemia 4 Bible Online

Nehemia 4 - Lamnso bible

Nehemia 4

¹Sanballat yú ji vèr sí bóm a kay, kí nyár wun, wù shwiíy kilòŋ, e nèn a sheʼ ver shéʼén.

²Wù‑uù yòŋ e ŋgoo rə wùn à vé rər veé Samariàá si jii, «Alàykìsáŋ veé Juda vìne kwaʼ ji á yii a dzə̀ ka? A dzə̀ áwune nàŋsín rú vinyo a? A dzə̀ áwune yiì cu, e màysì lim kishiíy kimòʼón a? A dzə̀ áwune siìr tíy ye yí keèsìn mo və́yí tònèn ne, yí kfə̀n e juŋ a?»

³Tobia woo wír woó Ammon wo wùn wun‑eè tíyí, nèn a yòŋ sa jii, «Ooboò, kay ye áwune bómée dzə̀, a fə̀m kòʼ sìm shó, wú kù kèr.»

⁴M nèn a bùnrì jii, «Éè Nyùy wor, yuúrí, e yù, á sí ŋwáy ver ŋwáyín. Siìr jí sév sí aáwuné kitu, e tsə̀nsí áwune é kwaʼ nsàm, aá du, a rèŋ vikwàn.

⁵Lá à yòʼ sù njò yev. Kú a way síi aáwuné ajay, bìʼ fo áwune shoorin ne vé kimbome e liy si.»

⁶Mo melív me wíri mè‑eè tíy e lìm, vèr ku nèn bòm kay, e tàtí virə́v, e kòʼ, e mèé e ntìntìn mo vida vi‑iì yíi a dzə.

⁷Sanballat wùn à Tobia, à wír veé Arabi, à veé Ammone, à veé Ashdodi yú ji lim kimbom ke kày yeé Jerusaleme dú a kijuŋ, aá sí maysì sə́tí a nsàn si, kí nyár áwune é ŋàŋ.

⁸Áwune nèn bà ntaŋ ji á lo wìy, e fùnèn wír veé Jerusalem, e tòvsìn a fó.

⁹Vèr nèn bùnrì Nyùy wor, e lèm anshìy, á wáa teʼ áwune e shùy, a teʼ vitsə́ʼə́.

¹⁰Yii bèy, wír veé Judàa nèn lò, e kèʼ a yòv jii: «Vitaáví ví sí may fo vé lìmé wùn, a vimbvə́ʼ ve vifa vi dzəə́ fúmé, vèr yòʼ dzəə́ yú fó a bom kay.»

¹¹Aàŋgaà vér vibàné kù dzə́, yén kév ji vèr yíi a jì ji á wáa kiíy, e kfə̀n a jì ji á wáa yen, aáwune yúyrí á ne ver, líme tiím.

¹²Wír veé Juda ve vé‑eè dzə́ aáwuné mvəmé kfə́n a wìykìr virə́ʼ vidzə̀m, a yòŋ e vèr akàŋ akàŋ ji vèr lo á fo Jerusalem, e wìy, e yèn á áwune é ntèʼ sí.

¹³M nèn bàʼtí vé rərí, e fò nyùy sé rər aáwune wùn à kòŋ sí, à vinte vi, e lèmrì áwune mo kfəə́ si dzə̀kìn, á wáa tiy e mbìv kày yee fó ròŋ, a shìy virə́ʼ ve ví‑iì dzəə́ tíy kimbéʼ.

¹⁴M lò, e yèn mo vinyo vi dzəə̀n, e nèn nànèn e yuv, e yòŋ vilìmbìy wùn à vé saʼa, à kibér ke wìr ki, e sùúy aáwune jii, «Lá vèn yòʼ a fàn aŋgàa vibàn vén. Vèn kuúmé mo NYÙY TÀR dzəə̀n e gháʼtín, e kfə̀n a dzə e beémén, e nèn fùnèn, bìʼ afə́r vén wùn à wón véné, à vikìy véné, à kfə́ə sén sí.»

¹⁵Aŋgaà vér vibàné yú ji vèr kìíy a ne kwaʼtì yév, e nèn yèn ji Nyùy bvə̀ə́r a ne nsìysì wov. Vèr nèn lò kér wír adzə̀m, e kfə̀n a bom kay, wír e kfə́ kee kirə́ʼ kí.

¹⁶Mo kí kooyin bey, e kèʼ fo ghan fen, kintoʼnìn ke vé lìm vém kí nèn a bom bomén, kintoʼnìn ki wáa shìy shiy, a ker kòŋ sí wùn aàŋkèe rərí, à vinte vi, à ndzə̀y sé kishà si. Vilìmbìy vi nèn tìím kitávín e wír veé Juda

¹⁷ve vé‑eè bóm kayí bàm. Wír ve vé‑eè béʼ vifá ve lìme‑eè lo, wìr wàa yiì lim e kiwó kímóʼ kí, a ker kifá ke rər e kímóʼ kí.

¹⁸Vé kimbome‑eè lo, wìr wàa bom, a ker nyùy rə rə̀r e wun kiyeŋ. Ŋgaà wo wù tóŋ sóŋ‑eè tíy kfə́ a dzə̀ e mǒ ghaŋ.

¹⁹M nèn yòŋ vilìmbìy wùn à vé saʼa, à kibér ke wìr ki, e sùúy aáwune jii, «Lime dzə̀ e kuʼùn, e kfə̀n cèŋèr wún, e dù ntàmda. Vèsən nen tàm é wǔn kày, a dzə jeéy jeéy, wìr wáa dzə kwaʼda fo wùmòʼ.

²⁰Fo vèn yuun, aá tóŋ sóŋ, vèn bàʼtí, e yèn ver fó. Nyùy wòsən yíi fùnèn vindzəʼ vesən.»

²¹Vèr ku nèn a ghìtìr e shùu lìm, kintoʼnìn ke wìr ki wáa tiy e kòŋ sí wo, kèʼ fo kijàvndzə, e dù, e meé e ŋkuùr mo á yíi yen mejiy e yuv.

²²Mò‑oò yòŋ e wíri é ghan fen jii, «Wìr wùn wìr lìm və sí yiì a shiíy a dzə̀ á e Jerusalem, e fíʼ a shìy shiy vitsə́ʼə́, a yiì lim, e shùy.»

²³Bó wìr fo vèr yòʼ‑oò lo yiì shòʼ ndzə̀y fó wùn, kìn mo, kìn afə́r vém, kìn vé lìme, kìn anshìy ve vé‑eè jumrì mo. Wìr‑iì lo, wù kù a ker kifá ke rər é kiwo, fə̀m é ghan se wù du, e no mendzə́v.[7]