Read Lamnso Esta 1 Bible Online

Esta 1 - Lamnso bible

Esta 1

¹Yì‑iì dzə̀ é ghan se Ahasuru‑uù[1] dzəə̀n fon woó Persia, wù‑uù sáʼ woŋ, a wú kéʼ fó India, e dù, e mày e Etiopia[2]. Vishév ve wòŋ və̀n vi‑iì dzə̀ nshòv saàmbà e mbaà é wiì (127).

²Wù‑uù sàʼ vifon, wáa dzə e mvə̀m kiya kee ji taár, wù yiì ŋkàʼ bìʼ atǎr wòŋ wùn à vé lìm vəə́ adzə̀m, a wù dzə̀ e wun ntoʼ ye yì‑iì dzəə̀n é ŋkàlaʼ ye kuʼùn yee Susa[3]. Amfòómé rər veé Persia wùn à veé Mediàa, aàtǎr laʼ wùn aàtǎr saʼ bàràʼa wáa dzə fo ŋkàʼ fóo fèy.

⁴Áwune‑eè yì ŋkàʼ vən ŋwee ntuùfú, a fòn kù din bùʼ və moo fon, din vifá ve sùsù wùn à vikuʼùy və́ ví.

⁵Ŋwee woo ntuùfú və́ne lòo mày, wun woo Ahasuru nèn yiì ŋkàʼ fo wìr dzə̀m wo wù‑uù dzəə̀n é Susa, a dzə̀ ŋkàlaʼ ye kuʼùn fo sáʼ yeé wòŋe lo. Á wáa yi ŋkàʼ vən kishiíy saàmbà e maàndzə ŋgày fo kiboó ke vicí wùn à vibuushì ve ví‑iì teʼ sho ki‑iì dzəə̀n, aá yí wir dzə̀m, à wír ve kuʼkìné, aàghéʼnceyí.

⁶Maàndzə ŋgày‑iì dzə̀, aá sə́ŋ ndzə̀y se fəvír sí wùn à se səənén sí fó, e kaàrí, e tàr. Aàkfəə̀ ve vé‑eè səŋen shóo dzə̀, aá bá sá e ndzə̀y sin si, e sə̀ə́y aàndzə̀ŋgwáŋ ve á fèrìn e *kisha ke mbàm ke fəvír kí, aá bárír é vitom ve á bomen e tíy ye fəvírí. Vé‑eè fiì maàndzə ŋgày e tíy ye yí baaŋè baàŋèné, à ye fəvírí, à kfəə́ se tiy seé kilùm see moo saàkìnshìy sí, e nèn tìír antaʼ fo, a dzə̀ ve vé‑eè fèrìn e kisha ke mbàm ke fəvír kí, à ke baar kí.

⁷Vé‑eè jav meluʼ aàbàr ve vé‑eè fèrìn e kisha ke mbàm ke baar kí. Abàr vìne kù‑uù dzə̀ vé ntayi, kér mbom jeéy jeéy. Fòn‑eè yiì viwìr və́, e fə̀ə́r meluʼ feyì nyanyày.

⁸Á yòʼ‑oò cí ji wìr sà nò é le á, bìʼ fo fòn‑eè foon ne sáʼ aàtǎr ntoʼ vəə́ ji wìr ku nò á mo wù kòŋèn.

⁹Kú a dzə e ghan fóo fèy, a Yaà Vashti yii sa ŋkàʼ é mbìv yìmòʼ e Fòn Ahasuru mvə̀m ntoʼ fèn, a vəə́‑əə̀ dzə̀ wó vikìy.

¹⁰Á yí ŋkàʼ, kí meé ji kishiíy saàmbà, a fòn nó ne, wúné wáa tekír wun tékín, wù toóy nsheèlav see saàmbà se sí yii shiy wun, a yír sév sí dzə̀ jii, Mehuman wùn à Bista, à Harbona, à Bigta, à Abagta, à Setar, e lì Karkas.

¹¹Á wìy, wù suúy ji á du, e tòóy a Yaà Vashti. Á tooyì, á sùúy shó a ji wù lóo wìy, wù sòv á tán rə́ viyaà. Yaà Vashti‑iì dzə̀, a wù bóŋ é ŋàŋ, fòn nèn a tàʼ, e dìn vijuŋ ve Yaà e wíri wùn aàtǎr laʼa, aá yén.

¹²Nsheèlav si dù, e tiìsí toóy vəy, Yaà Vashti ŋwáy ŋwayín. Kí nèn tìnsín fon, wù yú nyár sho ŋkóŋkóŋ.

¹³Á bèy, fòn nèn a mbaà vé sii é kinyò fèn, áwune ve á yii səəm vinyo ve ví shaàn ne, bìʼ fo kù dzə̀ mo kinyo ki‑iì gháʼ fon, wù beè wír ve á kiìn nsər, e kfə̀n a kiíy móo tinén kinyo kijuŋ.

¹⁴Wír ve wùn à fòn‑eè yám táŋ vinyóo dzə̀ wír saàmbà, a dzə̀ vibay ve kuʼkìn ví é mvə̀m saʼ yeé Persia wùn à Media, a yír sév sí‑iì dzə̀ jii, Karshena wùn à Shetar, à Admataa, à Tarshish, à Merses, à Marsena, e lì Memukan.

¹⁵Fòn nèn dzə̀r aáwune jii, «A dzə̀ mo nsər taʼà, bo dzə̀ vèsən yèe le e Yaà Vashti, mo wù tenen ne toóy? Toóy féyì feyì, a tsə́nsí mo woo Fòn Ahasuru.»

¹⁶Memukan kóʼtí, e tìím e fòn wùn aàtàá wòŋé si, e bùn fon, e sùúy jii, «Yaà Vashti yoʼ tìnsín a dzə̀ fon cáʼ. Wù tìnsín sa atǎr laʼ wùn à wìr dzə̀m wo Fòn Ahasuru sáʼá.

¹⁷Kinyo ke Yaà Vashti bùʼùn kin ki yíi to e vikǐy kitùʼùr, bo á sí yiì a kay alúm vév, a sevtí ji bó fòn yòʼ sà‑aà lo tòóy Yaà Vashti, wù tén toóy á.

¹⁸Fə̀m lán, vikǐybaá veé Persia wùn à veé Mediàa kù ló yu kinyo ke Yaà Vashti kìn, yú, bo á sí lo, e kèʼ e kishiíy ké lán ki, a lovtí e vibay vee alúm vév ví sá bèy. Á bèy, bo dòʼshwiíy wùn à kitáŋnìn ki yòʼ dzəə́ wìy mày fo áwuné nsàn.

¹⁹Kí nén a dzə jii, a kí lòo dzə, e ghèén fon, fòn fò sáʼ, aá sáŋ é ŋwàʼ wo nsər seé Persia wùn à seé Media si dzəə̀n shó, nsər se bó yòʼ dzə̀ wìr kùvsín. A nsər rə̀n kér fó a dzə jii, ‹Bó yòʼ dzə̀ féyì Yaà Vashti dzəə wìy tìím e fòn si. Fòn ku sù a suùn, e ghàr á wo sən wo wù kér ghvə́m, e shaà wun.›

²⁰A fòn fə̀ə́r sáʼ rə̀n, yí ghánén vitóŋtóŋ vidzə̀m, bo vikǐy wìr ve kuʼkìné, à vé wìr vee víyi kù sí lo, a yunín alúm vév.»

²¹Fòn wùn à vibay və́ ví yú ntir yee shooy, yì gheén áwune féyì. Fòn nèn kù yiì mo Memukan kì shuùn.

²²Fòn tsə́nsí aŋwàʼ e vishev ve ví‑iì dzəə̀n e wun wòŋ vidzə̀m. Ŋwàʼa kù‑uù du e kishev kee shó, aá sáŋ a dzə̀ e wír ve á dzə́ foó làm. A ŋwàʼa din e wírí làm sí jeéy jeéy ji wìr mòʼón mòʼón kú a saʼ a nsaàlav rə.