Read Lamnso Esta 6 Bible Online

Esta 6 - Lamnso bible

Esta 6

¹Mo Haman taan kicí kiy, fòn siíy kfə́, e shìíy vitsə́ʼ vee shooy, e làa yòʼ ker ŋgay mbuùné. Wù nèn tòóy ji á wiy á e ŋwàʼ wo á yii sáŋ vinyo veé wòŋ shoo, a yòŋ, é wun wáa yuurí.

²Á lòo yòŋ, e mèé e kirə̀ʼ ke vé‑eè saŋen ji Mordekay‑iì tòʼ á ji Bigtana wùn Teresh, vee nsheèlav se fòn se sí‑iì shiy shúu kibùʼ woó faáy kishiíyí báʼti a ji á laar á fon.

³Fòn yuúrí, e lò, e dzə̀r jii, «Mordekay sà‑aà tòʼ kinyo moo kin, á búʼ wun a dzə̀ e ka kí á?» Nsheèlav se fòn si bìnèr jii, «Nyàr, á yòʼ‑oò lo bùʼ a wun e kifá ki.»

⁴Á bèy, fòn nèn dzə̀r ji sà dzə̀ la é maàndzə ntoʼ a? Dzə́r bèy, a kì sì ghán se Haman kì wiy ji wun bun fon a ji fòn ku fò sáʼ, aá sə́ŋ á Mordekay e kici ke wun kì taan ne.

⁵Nsheèlav si nèn bùn fon ji nyàr, wìr wo wù tíy e maàndzə ntoʼ dzə̀ á Haman. Fòn nèn sùúy jii, «Vèn yoŋ, é wù wiy fen.»

⁶Haman nəə́, fòn dzə́r shó jii, «A m lò, a tàʼ ji m buʼ wír, m yèe le e ŋgaàŋ?» Haman sə́ʼə́m, e kwàʼtì ji sà kfə̀n dzə̀ kfə́ la wo wù shaàn wun wo a dzə̀ fòn wàa tàʼ ji wù buʼ á?

⁷Haman bùn fon, e bìnèr sho jii, «Nyàr, a fòn kòŋ ji wun‑éè buʼ wír,

⁸fòn kù sùúy, aá wiy á e ndzə̀ynjav ye fòn kurin ne, e wìy a e nyàmŋkoʼ ye fòn koʼon ne, a yì kér kifin keé ntoʼ e wun yírvishi.[12]

⁹Á wiy sho, aá fó á vifá vìn e kitú ke vibày ki, é kí siysi ndzə̀y e wìr wo fòn kì taʼ, e bùʼ wùn. Siysì, é wù dzəʼər ŋgaàŋ e kitu ke nyàmnkoʼ, e lì wun, a ghan, a kaarí ŋkàlaʼ sho, a fuŋ jii, ‹Á mo á yii yii e wìr wo fòn kòŋèn ji wun buʼ ben.› »

¹⁰Fòn ku nèn bìnèr e Haman jii, «Dù ri cér, e lì ndzə̀y sí wùn à nyàmŋkoʼ mo à kì suuyin, e wìy sho, e bùʼ Mordekay woo wír woó Juda wo wù dzə́ e shùu kibùʼ keé ntoʼ sho.»

¹¹Á bèy, Haman nèn lì ndzə̀ynjav wùn à nyàmŋkoʼ, e kùr ndzə̀y e Mordekay wùn, wù nèn kòʼ nyamŋkoʼ. Haman nèn a dù fo mbìy wùn wun, a tosín ŋkàlaʼ, Haman wáa fuŋ jii, «Á mo á yii buʼ wír wo fòn koŋè bèn.»

¹²Kee shooy ki shaà, Mordekay kfə́n é bàm e fòn ntoʼ. Yii bèy, Haman kfə́n e wun laʼ e kinyeŋ ki. Kfə́n bèy, diyì, e kitú kí nsay.

¹³Wù kfə́n bey, e fèr kinyo kidzə̀m ke kí kooyin e yeè lav və Seresh wùn à ŋkar sə́ sí. Ŋkar sə́ see afií wùn à yeè lav və suúy shó jii, «Leéy, e yèn mo vinyo vé vi kèʼèn, a sen e Mordekay kiwo. Mo wù dzəə̀n wír woó Juda, bo bó à yòʼ yíi tam vèn wun. À kù yíi kar ntéŋ ntéŋ, e gbù.»

¹⁴Kù mo áwune dzə́ súŋnin bèy, nsheèlav se fòn si nèn bvə̀y, a gìr ji á li á Haman, e dù sho fo ŋkàʼ wo Yaà Esta‑aà baʼtin.