Read Lamnso Esta 8 Bible Online

Esta 8 - Lamnso bible

Esta 8

¹Mo á səŋen Haman e kici, kú a dzə e kishiíy fóo fèy, Fòn Ahasuru nèn fò kéŋ wun woo Haman woo ŋgaà vibàn wìr veé Juda e Yaà Esta. Esta tóʼ e fòn ji wùn Mordekay dzə̀ á afə́r, Mordekay nèn kòóy kintóʼ ké a dù e fòn si.

²Fòn lò, e shòʼ ndzə̀ŋgwáŋ woo kifin keé ntoʼ, a dzə̀ wùwun wo vé‑eè səən fo Haman, e fò e Mordekay. Yaà Esta kfən lèm Mordekay ji wù wáa leéy a vitsə́ʼ ve yì‑iì dzəə̀n kéŋ Haman.

³Yaà Esta kfən lò, e dù ji wun‑éè súŋnín á e fòn. Wù dù, e tsə̀m ndzəə́ e fòn si, a səʼə́r mensíy, a lon fon ji wù ku keèrí a mendzən, e tèér a vinyo ve bi ve Haman woo wír woó Agag‑iì baʼtin ji á wíy yiì e wír veé Judàa.

⁴Fòn yén Esta, e ràmsì kitoómé kfə́ ke á fèrìn e *kisha ke mbàm ke baar kí, wù nánén, e kòʼtí, e tìím e fòn si,

⁵e bùn fon, e sùúy jii, «Nyàr, a kí fey ghèén fon, a m fey ghèén wun, fòn kfən yèn ji kinyo ke m kì suuyin kí dzə̀ kee tìítiy, a liì wom fey bòŋ rú fon, fòn kù fə̀ə́r a sáʼ. Á fəərì, aá sáŋ á ji á sə̀ʼsí ne a kinyo ke Haman woo wan Hammedata woo rám wìr veé Agag‑iì saŋen ji á laar á wír veé Juda ve á dzə́ e virə̀ʼ ve fòn sáʼ a vidzə̀m.

⁶A dzə̀ mo woo Esta, m ghàn é le, e bóo yu fóo kur tím, a yen mo rə́mrə́m kinyòo gbu e wír vémé kitu? A kù yòʼ dzə̀ m kùr tím, a dzə, a yen mo á laar wír vém á?»

⁷Fòn Ahasuru bìnèr e Yaà Esta wùn Mordekay woo wír woó Juda jii, «Rúrú, m fò ne kéŋ Haman e Yaà Esta, e kfə̀n sùúy, á sə́ŋ wun woo Haman e kici ke wù‑uù taan, bìʼ antaŋ ve wù‑uù bá ji wun lo, e yuyrí a wír veé Juda.

⁸Fo kén kí, vèn keʼ, a saŋ yìmòʼ yee nsər ye yì gheenen ven bìʼ wír veé Juda. Vèn lóo saŋ, á kù sàŋ e fòn yir, e fìnèr e ndzə̀ŋgwáŋ woó ntoʼ. Vèn kú a kuumé ji kinyo ke á saŋen e fòn yir, e fìnèr e ndzə̀ŋgwáŋ woó ntoʼ ki dzə̀ a bó yòʼ dzə̀ wìr kfə̀n kàr.»

⁹Á bèy, á nèn kù tòóy vé saŋ veé ntoʼ e ghan fóo fèy, a yì‑iì dzə̀ é kishiíy kee nshòv sitaár e mbaà fó ŋwee wo wú meen ji taár e kiya, aá yoŋ ji Sivan[14]. Áwune nèn a saŋ kinyo réŋréŋ, kù mo Mordekay‑iì yoŋè. Vé‑eè sáŋ ji nsər ye á yíi tsənsí e wír veé Judàa, e tsənsí e wír ve á sáʼ kitúme, à ve á sáʼ vishév ve wòŋ jeéy jeéyí, e lì atǎr wòŋ adzə̀m vee kèʼ fó India, e dù, e meé e Etiopia[15], a woŋ fòn və̀ne‑eè dzə̀ vishév nshòv saàmbà e mbaà é wiì (127). Ŋwàʼa‑aà lóo dù e kirə̀ʼ kee shó, á kù sàŋ a dzə̀ é dzəə ye wír vee fóo yii sáŋ vinyo vév shó, e kù sàŋ a dzə̀ aáwuné làm sí jeéy jeéy. Á nen kù sàŋ sá wó wìr veé Juda a dzə̀ mo áwune yii sáŋ vév vee vinyo aáwuné làm.

¹⁰Mordekay‑iì sáŋ aŋwàʼ vìn a dzə̀ e Fòn Ahasuru yir. Wù‑uù sàŋ, e fìnèr e ndzə̀ŋgwáŋ woó ntoʼ, e nèn a tum vé ntum ve á yii kóʼ nyám se ŋkoʼ seé ntoʼ se sí yii léʼ kitávín, á wáa lì aŋwàʼ vìn, a ghan sho, a jàvtì.

¹¹Aŋwàʼ vìne‑eè yiì, fòn fó vitaáví e wír veé Judàa ntèʼ sidzə̀m ji áwune fiʼ bàʼtí, e kìŋsìn a vitú vév. A dzə̀ jii, a wíri lò, a ghiʼ áwune e rə́r sí, kìn dzə̀ veé kitum kiné kí, kìn kí kòóy a dzə̀ é kishev ke wòŋ kiné kí, bo wír veé Judàa kù‑úù yúyrí áwune vee aŋgaà vév vibàn, e laàr. Aá laar, à wón ve terií, e laàr bèn à vikìy shó, e tatí kéŋ yév e dzə̀m, e faàsì.

¹²Kishiíy ke vé‑eè foon ji dzə̀ wír veé Judàa kìŋsìn vitú vév é virə̀ʼ ve Fòn Ahasuru‑uù sáʼ vidzə̀m kìn ki kù dzə̀ kee shó ke vé‑eè tombìy lèm ji á laar áwune, a dzə̀ kishiíy kee nshòv sitaár e ghvə̀m fo ŋwee wo wú meen ji nshòv sibaà e ghvə̀m fo kiya, aá yoŋ ji Adar.

¹³Vé‑eè yíi lì sáʼ rə̀n, e way ji nsər e vishev ve wòŋ vidzə̀m, e sàmèr ye dzə̀ wìr dzə̀m yù, é wír veé Judàa fiʼ bàʼtí kijuŋ, e siìr ŋkfə́tír áàŋgaà vév vibàné.

¹⁴Vé ntume ku nèn lì sáʼ yee shoon, e kòʼ nyám se ŋkoʼ seé ntoʼ, e tùmnín, a dù, a sàmèr mo fòn suuyin. Á nèn fə̀ə́r sáʼ yee shooy e Susa, fo sáʼ yeé wòŋe‑eè lo.

¹⁵Mordekay‑iì lo fo ntoʼ, a wù kér ndzə̀y sé vifòn se sí kér virə́ʼ ve səənén ví wùn à ve fəvír ví e wun wùn. Wù kfə̀n‑eè sòv ntáráʼ wo wiy, aá fér e kisha ke mbàm ke baar kí, e ndzə̀m e kinsàr ke ndzə̀y ke kí baaŋè, kiʼ kijuŋ ki. Wír veé Susàa wáa dzə kév, a sheʼrí sáʼ fòn, a seŋ, a sàvnìn.

¹⁶Fo ké wìr veé Juda ki, áwune wáa sheʼrí rán ye yí‑iì wìyìn aáwuné wùn, a yu vijuŋ, a sàvnìn. Wíri kfə́n a ghvəm áwune.

¹⁷Sáʼ fòne ku nèn a ghanén e mbìv wòŋ, a ghanén e ŋkà se laʼ, wír veé Juda ve vé‑eè dzə̀kìn fóo wáa sheʼrí adzə̀m. Áwune nèn a yu vijuŋ, a kàʼ ŋkàʼ sí, a ker kibaámé, a yinín. Wír ve dzəə̀n féyì ji wón nsayi ku nèn lò, a bìnkìr anín, a kfən ji wír veé Juda, bìʼ fo vé‑eè sí fan wír veé Juda fánen.