Read Lamnso Esta 9 Bible Online

Esta 9 - Lamnso bible

Esta 9

¹Kishiíy kee nshòv sitaár e ghvə̀m fo ŋwee Adar ki nèn ghèén, a dzə̀ kishiíy ke wír veé Judàa‑aà yíi yiì mo sáʼ ye vé‑eè fəərin fó ntoʼo dzəə̀n, a kfə̀n dzə̀ kishiíy ke aŋgàa vibàn véví‑iì kwaʼtì ji á lo, e lovtí e wír veé Judàa, e tòn áwune. Kí nèn dù e fəə̀ jeéy ji yì‑iì lò wír vée Juda, e ghàʼ aŋgaà vév vibàn.

²Virə́ʼ vidzə̀m ve Fòn Ahasuru‑uù sáʼá, wír veé Judàa ku nèn a baʼtí e mvə̀m sé laʼ se áwune‑eè dzə́kir sho, a baʼtí ji á funen á wír ve á taʼ, e ghiʼ áwune, e laàr. A bó yòʼ‑oò dzə̀ wìr taàmé áwune, bìʼ fo wìr dzə̀m kù‑uù sí fan áwune fánen.

³Wír ve vé‑eè sáʼ vishév ve wòŋ ve kuʼkìn vií bínkír, a tom a dzə̀ wír veé Juda, aàtǎr ntoʼo shó, e lì taà saʼ e dzə̀m wo wù‑uù sáʼ kitúm, bìʼ fo wìr dzə̀m kù‑uù sí fan Mordekay fánen.

⁴Wìr dzə̀m kù‑uù kìíy ne ji Mordekay sì á wír wo kuʼùn é ntoʼ, a leŋ vəə́ sámér ne, sáʼ rəə́ wáa kuy kuyín, wíri wáa yunín wun.

⁵Á bèy, wír veé Judàa nèn kù lòvtí aàŋgaà vév vibàné mo áwune‑eè taʼ ji á ku yiì. Vé‑eè nə̀ə́ áwune e rə́r sí, e seèrí wir dzə̀m.

⁶E ŋkàlaʼ yee Susa fo ntoʼ fòn‑eè dzəə̀n féyì feyì, wír veé Judàa yúyrí wíri fó ghii tàn.

⁷Fo mvə̀m wìr vìn, vé‑eè yùyrí wón Haman woo wan Hammedata wo yì‑iì dzəə̀n ŋgaà vibàn wìr veé Juda. Wón vəə́‑əə̀ dzə̀ e ghvə̀m, aá dzə̀ jii, Parshan‑Data wùn à Dalfon, à Aspata, à Porata, à Adaliya, à Aridata, à Parmashta, à Arisay, à Ariday, e lì Vayisata. Vé‑eè yùyrí aŋgàa vibàn vév bey, e làa yòʼ màʼ kiwó aáwuné keŋ gheéy.

¹¹Á ku nèn bùn fon e nsənnsən, kù é si kishiíy, e fìʼtì sho mo á yuyrin wíri é ŋkàlaʼ yee Susa e kishiíy fóo fèy.

¹²Fòn nèn a suŋnín e Yaà Esta, a ghay wún jii, «A wír veé Judàa yùyrí wíri, a dzə̀ə́ e Susa cáʼ, wír ghii tàn, e lì wón Haman vee ghvə̀m, bo keé ŋkà se laʼ símóʼ sí kí yíi a kìʼ kfə́ é le? Ké lèn ki, Yaà Esta, à taʼ a dzə̀ ka, é m fó kíwun. À kér shií a dzə̀ é gha, é m yii kíwun.»

¹³Yaà Esta bùn fon, e sùúy sho jii, «Nyàr, fòn ku fò á vitaáví e wír veé Juda ve á dzə́ e Susàa, aá bvəə́shí, e kfə̀n yiì a kinyo ke á yiìn lán, aá ku lì dzə́n sé wón Haman see ghvə̀m, e sə̀ŋ é vici.»

¹⁴Fòn ku nèn biìmé, á fəə́r sáʼ yee shooy e ŋkàlaʼ yee Susa. Á fəə́r, e nèn lì dzə́n sé wón Haman see ghvə̀m, e sə̀ŋ é kici.

¹⁵Wír veé Juda ve vé‑eè dzə́ e ŋkàlaʼ yee Susàa nèn kfə̀n siì bàʼtí e kishiíy kee nshòv sikweè e mbaà e ŋwee Adar fèy, e fəə̀, e kfə̀n yùyrí wíri ghii taár. Yii bèy, e làa yòʼ màʼ kiwó aáwuné keŋ gheéy.

¹⁶Fo kibér ke wìr veé Juda ki, áwune ve vé‑eè dzəə̀n kév é vishev ve wòŋ vee fó ghaŋ, á báʼtí sá e virə̌ʼ virə̀ʼ ji á kiŋsin á vitú vév, e fíʼ yòyrì fo aŋgaà vév vibàné wo. Áwune‑eè yùyrí aŋgaà vév vibàn wír nsə̀kì nshòv sitàn e msaàmbà (75,000), yii bèy, e làa yòʼ màʼ kiwó aáwuné keŋ gheéy.

¹⁷Vé‑eè yiì kinyo kìn e kishiíy kee nshòv sitaár e ghvə̀m e ŋwee Adar. Yì bvəə́shí, e ràn é kishiíy ke kí‑iì meen ji nshòv sikweè e ghvə̀m, áwune nèn meèmè, e lì kee shooy ji kishiíy ke á wáa sheʼrí, a yi ŋkàʼ.

¹⁸Yii bèy, wír veé Juda ve vé‑eè dzəə̀n kév é Susàa‑aà bàʼtí é kishiíy ke kí meen ji nshòv sitaár e ghvə̀m ji á yúyrí á aŋgaà vév vibàn, e nèn bvəə̀shí, e kfə̀n yiì bèy, e bóo meèmè e kishiíy kee nshòv sitàn e ghvə̀m. Áwune nèn lì kév a dzə̀ kishiíy kee shooy ji ke á wáa yi ŋkàʼ, a sàvnìn.

¹⁹Á nsàv ye wír veé Juda ve á dzə́ e ntèʼ sií‑iì bàrìn kishiíy ke kí meen ji nshòv sikweè e ghvə̀m e ŋwee Adar kìn, a lèm jeéy ji kishiíy ké bam ke kisheʼrì, é kú a dzə ghán se á meemè, yí ŋkàʼ, yú vijuŋ, kfə̀n fó afómo.

²⁰Mordekay‑iì lò, e sàŋ vinyo vìn vidzə̀m e nsay, e tsə̀nsí aŋwàʼ, á ghánén e wír veé Juda ve vé‑eè dzə́ e virə̌ʼ virə̀ʼ e wòŋ woo Persia wo Fòn Ahasuru‑uù sáʼá. Wù‑uù tsə̀nsí aŋwàʼ vìn e wìr dzə̀m, à vee fó mentsə̀mé, à vee kwaʼdáa,

²¹e wày nsər ji á wáa lèm a kishiíy kee nshòv sikweè e ghvə̀m keé ŋwee Adar wùn à kee nshòv sitàn e ghvə̀m ki ji vishiíy vé ŋkàʼ, e kù a lèm bèy viyá vidzə̀m.

²²Kù dzə̀ á vishiíy ve áwune‑eè bòyìn fo aŋgaà vév vibàné wo. Ku kfə̀n a dzə a ŋwee woo shó wo mendzən mev mè‑eè kfənen é kisheʼrì, diy yéví bínkír é ŋkàʼ wo yiíné. Wù‑uù sàŋ ŋwàʼ ji áwune wáa lèm a vishiíy vin ji vé ŋkàʼ, é wìr dzə̀m wáa yinín, a yu vijuŋ, a fo afómo, e kfə̀n a fo e vé kitàne.

²³Wír veé Judàa ku nèn bìnsí kinyo ke Mordekay‑iì saŋen, e tìr áwune shó, e nèn kù shaà fo mbìy, a yi ŋkàʼ vən kiyá kidzə̀m, réŋréŋ mo vé‑eè yiin é ghan see shooy.

²⁴Aá yí ŋkàʼ vən, bìʼ fo Haman woo wan Hammedata woo wír woo Agag ram, wo yì‑iì dzəə̀n ŋgaà vibàn wìr veé Juda‑aà karin ne menàŋ ji wun yíi laàr a áwune. Wù‑uù kàr menàŋ, e sə̀r fú woo Pur, e shwèŋ kishiíy ke á yíi laàr áwune, e səʼsí adzə̀m.

²⁵Yii bèy, Yaà Esta dù, e bùn fon, fòn nèn sàŋ sáʼ, e fə̀ə́r e nsənnsən ji á biner á menàŋ me Haman kì kár kùm wír veé Juda mèy, a dzə̀ e wun woo Haman kitu. Fòn kfən sə̀ntì ji á ku tàtí a wùn à wóné adzə̀m, e sə̀ŋ é vici.

²⁶Á nsàv ye á yoŋ ŋkàʼ vən ji *Ŋkǎʼ Purim, bìʼ fú yee Pur ye vé‑eè màʼàn. Mo Mordekay‑iì fəərin sáʼ ji á wáa lèm vishiíy vee vibaà vin, a kuumé vinyo ve áwune‑eè yenen, à ve ví‑iì kooyin áwune ví,

²⁷wír veé Judàa nèn wày nsər, e shìvìr jii, wìr woó Juda e dzə̀m, kìn wír wo wù ràmèn rámen fo áwune, kìn dzə̀ wír wo wù wíy a bìnkìr bìnkìn ji wír woó Juda, ŋgaàŋ wáa yen a fó wìy shaàrì fó a lèm vishiíy vé ŋkàʼ vee vibaà vin e ghan se sí dzəə̀n é kitu ke kiya.

²⁸Áwune nèn tà mban ji wìr woó kfəə Juda e dzə̀m mo melav mev mè dzə̀kìn, ve á dzəə̀n é vishev ve wòŋ vidzə̀m, à ve á dzə́ e ŋkà se laʼa, e lì ŋgwàʼ ye yì dzəə́ wìy a koʼ koʼón kù kér fóo wìy a kuumé a vishiíy vé ŋkàʼ vin, a lèm, é wìr wáa yen fó shaàrì.

²⁹Á bèy, Yaà Esta woo wan Abihail wùn Mordekay woo wír woó Juda nèn kfə̀n sàŋ sá ŋwàʼ wúmóʼó. Áwune‑eè sàŋ é vitaaví vé saʼ ve Yaà‑aà kérí. Vé‑eè sàŋ ji á tóm á ŋwàʼ mbìyi wo Mordekay‑iì saŋen bìʼ Ŋkǎʼ Purim və̀n.

³⁰Vé‑eè sàŋ ŋwàʼ və̀n a dzə̀ fo wír veé Judàa adzə̀m, e nèn tsə̀nsí, wú ghánén é vishev ve wòŋ vee nshòv saàmbà e mbaà é wiì vee Fòn Ahasuru wòŋ. Vé‑eè sáŋ ŋwàʼ və̀n, shaʼtì wír veé Juda sho sháʼtin ji nyaáŋ kú a dzə a aáwuné mvəm, aáwune kfə́n a dzə a akiŋsìn.

³¹Á fó sáʼ a jii, á kú a lèm a vishiíy vé Ŋkǎʼ Purim vìn kiyá kidzə̀m, a lèm réŋréŋ mo áwune vee wír veé Juda wùn à ŋgwàʼ sév sí yii bar vishiíy vímóʼ ví ji á wáa lèm jíŋ, a dìy, a shèŋ kitú. Kù dzə̀ á nsər mo Mordekay woo wír woó Juda wùn Yaà Esta‑aà wayin bey.

³²Sáʼ ye Yaà Esta‑aà fəəriné nèn tà mban e ntò se Ŋkǎʼ Purim sìn. Á nèn sàŋ é ŋwàʼ mo sí dzəə̀n, e lèm.